(សៀមរាប)៖ បន្ទាប់ពីបានអញ្ជើញជាអធិបតីក្នុងពិធីសំណេះសំណាលជាមួយប្រជាសហគមន៍ និងប្រតិបត្តិករទេសចរណ៍នៅឧទ្យានជាតិព្រះជ័យវរ្ម័ននរោត្តម «ភ្នំគូលែន» រួចមក លោក ហួត ហាក់ រដ្ឋមន្ត្រីក្រសួងទេសចរណ៍ នៅថ្ងៃទី៣ ខែកក្កដា ឆ្នាំ២០២៦ បានដឹកនាំក្រុមការងារ អញ្ជើញចុះពិនិត្យស្ថានភាពជាក់ស្តែងនៅតាមទីតាំងសំខាន់ៗក្នុងឧទ្យានជាតិព្រះជ័យវរ្ម័ននរោត្តម «ភ្នំគូលែន» ដើម្បីវាយតម្លៃសក្តានុពល ស្ថានភាពហេដ្ឋារចនាសម្ព័ន្ធ បរិស្ថាន និងសេវាកម្មទេសចរណ៍ សំដៅរៀបចំទិសដៅអភិវឌ្ឍប្រកបដោយប្រសិទ្ធភាព និងចីរភាព។

ការចុះពិនិត្យនេះ បានផ្តោតលើការកំណត់វិធានការគន្លឹះ ដើម្បីលើកកម្ពស់គុណភាពគោលដៅទេសចរណ៍ ពង្រឹងការអភិរក្សធនធានធម្មជាតិ បេតិកភណ្ឌវប្បធម៌ និងប្រវត្តិសាស្ត្រ ព្រមទាំងជំរុញការចូលរួមរបស់ប្រជាសហគមន៍ក្នុងការគ្រប់គ្រង និងអភិវឌ្ឍទេសចរណ៍។

ក្នុងឱកាសនោះ លោករដ្ឋមន្ត្រី បានណែនាំឱ្យគ្រប់ភាគីពាក់ព័ន្ធ បន្តសហការយ៉ាងជិតស្និទ្ធ ដើម្បីរៀបចំ និងអភិវឌ្ឍតំបន់ភ្នំគូលែនឱ្យក្លាយជាគោលដៅទេសចរណ៍ធម្មជាតិ វប្បធម៌ និងជំនឿដ៏ទាក់ទាញ ដែលមានគុណភាព សុវត្ថិភាព អនាម័យ និងបរិយាបន្ន ស្របតាមចក្ខុវិស័យអភិវឌ្ឍទេសចរណ៍របស់រាជរដ្ឋាភិបាល៕