(កំពង់ធំ)៖ លោក ចាន់ ស៊ីណាត ប្រធានក្រុមការងារគណបក្សចុះមូលដ្ឋានឃុំចំណាលើ ស្រុកស្ទោង ខេត្តកំពង់ធំ បានផ្ដល់នូវគន្លឹះសំខាន់ៗជាច្រើនចំណុច ដើម្បីជាផែនការយុទ្ធសាស្ត្រដ៏រឹងមាំ ឆ្ពោះទៅរកជ័យជម្នះក្នុងការបោះឆ្នោតជ្រើសរើសក្រុមប្រឹក្សាឃុំ-សង្កាត់ អាណត្តិទី៦ នៅឃុំចំណាលើ ខេត្តកំពង់ធំ។

អនុសាសន៍ទាំងនេះ ត្រូវបានលោកលើកឡើងនៅក្នុងកិច្ចប្រជុំត្រួតពិនិត្យការងារបរិស្ថានបៃតង ការរៀបចំស្នាក់ការបក្ស និងផែនការសកម្មភាពឆ្ពោះទៅកាន់ការបោះឆ្នោត នៅក្នុងឃុំចំណាលើ ស្រុកស្ទោង។

លោក ចាន់ ស៊ីណាត បានសង្កត់ធ្ងន់ថា ការកសាងសំណង់ហេដ្ឋារចនាសម្ព័ន្ធឱ្យបានគ្រប់គ្រាន់ និងការផ្ដល់សេវាសាធារណៈប្រកបដោយភាពជឿជាក់ ប្រសិទ្ធភាព និងដល់ជណ្ដើរផ្ទះប្រជាពលរដ្ឋ គឺជាគន្លឹះដ៏សំខាន់បំផុត។ លើសពីនេះ ការជួយបង្កើតការងារជូនប្រជាពលរដ្ឋក្នុងមូលដ្ឋាន ក៏ជាកត្តាចាំបាច់ដែលឆ្លើយតបទៅនឹងតម្រូវការជាក់ស្ដែងរបស់ពួកគាត់ផងដែរ។ កិច្ចការទាំងនេះ នឹងរួមចំណែកយ៉ាងធំធេងក្នុងការកសាងទំនុកចិត្ត និងការគាំទ្រពីសំណាក់ប្រជាពលរដ្ឋ។

ទន្ទឹមនឹងនេះ ការពង្រឹងកម្លាំងយុវជនស្នូល ត្រូវបានលោក ចាន់ ស៉ីណាត ចាត់ទុកជាសកម្មភាពចម្បងមួយទៀតដែលត្រូវជំរុញ និងចលនាឱ្យធ្វើសកម្មភាពយ៉ាងសកម្ម និងផុសផុលបំផុតនៅក្នុងមូលដ្ឋាន ដោយមិនស្ពឹកស្រពន់។ កម្លាំងយុវជនចំនួន ១៤៤នាក់ ក្នុងនោះមានស្រី ៧៨នាក់ ត្រូវបែងចែកភារកិច្ចជាក្រុមការងារចុះផ្ទាល់តាមខ្នងផ្ទះ ដើម្បីក្ដាប់សភាពការណ៍ និងតម្រូវការរបស់ប្រជាពលរដ្ឋ។

លោកក៏បានណែនាំឱ្យប្រើប្រាស់កម្លាំងយុវជនជាស្ត្រី (៧៨នាក់) ក្នុងការងារផ្សារភ្ជាប់ទំនាក់ទំនង និងការងារសង្គមដែលទាមទារភាពទន់ភ្លន់ និងភាពជិតស្និទ្ធជាមួយប្រជាពលរដ្ឋ។ យុវជនទាំងនេះ នឹងក្លាយជាក្រុមគំរូដល់មហាជន និងប្រជាពលរដ្ឋខ្លួនឯង។

ជាមួយគ្នានេះ ដើម្បីបង្ហាញពីការយកចិត្តទុកដាក់ខ្ពស់ចំពោះសុខុមាលភាព និងសុខទុក្ខរបស់ប្រជាពលរដ្ឋ, លោកបានណែនាំឱ្យអនុវត្តយន្តការគាំពារសង្គមភ្លាមៗ ឱ្យបានម៉ត់ចត់បំផុត។ ឧទាហរណ៍ ក្នុងករណីមរណភាព ត្រូវឧបត្ថម្ភអង្ករ ៥០គីឡូក្រាម និងថវិកា ១០ម៉ឺនរៀល ក្នុងមួយគ្រួសារ ដើម្បីចូលរួមរំលែកទុក្ខ។ ចំពោះករណីមានជំងឺប្រចាំកាយ ត្រូវរៀបចំក្រុមការងារចុះសួរសុខទុក្ខ នាំយកអំណោយ និងការលើកទឹកចិត្តដល់បងប្អូនប្រជាពលរដ្ឋដល់ខ្នងផ្ទះ។ លើសពីនេះ ការគ្រប់គ្រង និងបែងចែកអង្ករចំនួន ៧តោន ត្រូវធ្វើឡើងឱ្យចំគោលដៅ ជូនដល់គ្រួសារខ្វះខាត និងរងគ្រោះពិតប្រាកដ។

លោកបានសង្កត់ធ្ងន់បន្ថែមថា ការតម្កល់ផលប្រយោជន៍ពលរដ្ឋជាធំ និងច្បាប់ជាចម្បង គឺជាគោលការណ៍ស្នូល។ ក្រុមការងារទាំងអស់ ត្រូវធ្វើការងារផ្អែកលើគោលការណ៍ច្បាប់ ភាពត្រឹមត្រូវ និងតម្លាភាព ជៀសវាងបក្សពួកនិយម គ្រួសារនិយម អញនិយម។ មិនត្រូវយកច្បាប់ធ្វើជាខែល និងជាខ្នងបង្អែក ដើម្បីកេងចំណេញផ្ទាល់ខ្លួន ឬធ្វើបាបប្រជាពលរដ្ឋ ដែលនាំឱ្យបាត់បង់ភាពកក់ក្ដៅ និងសេចក្ដីទុកចិត្តពីពលរដ្ឋឡើយ។ ផ្ទុយទៅវិញ ត្រូវអនុវត្តយ៉ាងខ្ជាប់ខ្ជួននូវគោលនយោបាយរបស់ថ្នាក់ដឹកនាំ និងក្រុមការងារទាំងអស់។

លោក ចាន់ ស៊ីណាត បានអំពាវនាវឱ្យក្រុមការងារទាំងអស់ រួមសាមគ្គីគ្នាជាធ្លុងមួយ អនុវត្តផែនការខាងលើឱ្យមានប្រសិទ្ធភាព ឆ្លើយតបម្ចាស់ការ និងបម្រើប្រជាពលរដ្ឋដោយបេះដូងពិតប្រាកដ ក្រោមទិសស្លោក «រួមគិត រួមធ្វើ រួមទទួលខុសត្រូវ ដើម្បីជ័យជម្នះ!»។

តាមរយៈការអនុវត្តនូវគន្លឹះយុទ្ធសាស្ត្រទាំងនេះ លោកមានជំនឿយ៉ាងមុតមាំថា នឹងអាចនាំមកនូវជ័យជម្នះដ៏ត្រចះត្រចង់ក្នុងការបោះឆ្នោតជ្រើសរើសក្រុមប្រឹក្សាឃុំ-សង្កាត់ អាណត្តិទី៦ នៅឃុំចំណាលើ៕