(ព្រះវិហារ)៖ លោក ចេង លឹមហ៊ាន់ សមាជិកគណៈអចិន្ត្រៃយ៍ គណៈកម្មាធិការគណបក្សប្រជាជនកម្ពុជាខេត្តព្រះវិហារ ជាអនុប្រធានក្រុមការងារគណបក្សខេត្តចុះមូលដ្ឋានស្រុកជ័យសែន និងជាប្រធានក្រុមការងារគណបក្សចុះមូលដ្ឋានឃុំស្អាង និងឃុំធ្មា បានថ្លែងអំណរគុណយ៉ាងជ្រាលជ្រៅដល់សមាជិកថ្មីគណបក្សប្រជាជនកម្ពុជា ដែលមានភាពជឿជាក់លើការដឹកនាំរបស់គណបក្សប្រជាជន ពិសេសលើការដឹកនាំដ៏ឈ្លាសវៃរបស់សម្តេចតេជោ ហ៊ុន សែន ប្រធានគណបក្ស។

ការថ្លែងបែបនេះបានធ្វើឡើងក្នុងឱកាសដែលលោកអញ្ជើញចូលរួមប្រកាសបញ្ចូលសមាជិកថ្មីគណបក្សប្រជាជនកម្ពុជា នៅឃុំស្អាង ស្រុកជ័យសែន ខេត្តព្រះវិហារ ដោយមានការចូលរួមពីមន្ត្រីគណបក្ស និងសមាជិក សមាជិកា ជាច្រើនរូបទៀត នារសៀលថ្ងៃទី០៥ ខែកក្កដា ឆ្នាំ២០២៦។

លោក ចេង លឹមហ៊ាន់ បានផ្តាំផ្ញើសាកសួរសុខទុក្ខពីសំណាក់លោក ប្រាក់ សុវណ្ណ សមាជិកគណៈកម្មាធិការកណ្តាល និងជាប្រធានគណបក្សប្រជាជនកម្ពុជា ខេត្តព្រះវិហារ ព្រមទាំងលោក គីម រិទ្ធី សមាជិកគណៈកម្មាធិការកណ្តាល និងជាអនុប្រធានគណបក្សខេត្ត ផ្ញើជូនសមាជិក សមាជិកា គណបក្សប្រជាជនកម្ពុជា ដែលត្រូវប្រកាសបញ្ចូលជាសមាជិកបក្សនាពេលនេះ ក៏ដូចជាសមាជិក សមាជិកា គណបក្សប្រជាជនកម្ពុជា ទូទាំងស្រុកជ័យសែនផងដែរ។ សារសួរសុខទុក្ខនេះបានឆ្លុះបញ្ចាំងពីការយកចិត្តទុកដាក់ និងការគាំទ្រយ៉ាងពេញទំហឹងពីថ្នាក់ដឹកនាំគណបក្សចំពោះសកម្មភាពពង្រឹងកម្លាំងនៅមូលដ្ឋាន។

បើតាមការបញ្ជាក់របស់លោក ចេង លឹមហ៊ាន់ ការប្រកាសបញ្ចូលសមាជិកថ្មីគណបក្សប្រជាជនកម្ពុជានាពេលនេះមានចំនួន ៥៣នាក់ ក្នុងនោះមានស្រ្តីចំនួន ៣០នាក់។ សមាជិកថ្មីទាំងអស់នេះបានបង្ហាញយ៉ាងច្បាស់ពីការជឿជាក់ និងការគាំទ្រយ៉ាងមុតមាំចំពោះការដឹកនាំរបស់គណបក្សប្រជាជនកម្ពុជា ក៏ដូចជាឆន្ទៈដ៏មោះមុតក្នុងការចូលរួមពង្រឹងសាមគ្គីភាព និងពង្រីកកម្លាំងរបស់គណបក្សនៅមូលដ្ឋានឱ្យកាន់តែរឹងមាំ និងមានប្រសិទ្ធភាពខ្ពស់។ ការកើនឡើងនូវចំនួនសមាជិកថ្មីនេះ គឺជាសញ្ញាណវិជ្ជមានមួយដែលបង្ហាញពីប្រជាប្រិយភាព និងការទទួលស្គាល់ពីសាធារណជនចំពោះគោលនយោបាយ និងសមិទ្ធផលនានារបស់គណបក្ស។

លោក ចេង លឹមហ៊ាន់ ក៏បានសម្តែងនូវការស្វាគមន៍យ៉ាងកក់ក្តៅចំពោះសមាជិកថ្មីទាំងអស់ ដែលបានសម្រេចចិត្តចូលរួមជាមួយគ្រួសារគណបក្សប្រជាជនកម្ពុជា។

ទន្ទឹមនឹងនេះ លោកក៏បានជំរុញ និងលើកទឹកចិត្តឱ្យសមាជិកថ្មីទាំងអស់ខិតខំបំពេញតួនាទី ភារកិច្ចរបស់ខ្លួនឱ្យបានល្អប្រសើរ ព្រមទាំងចូលរួមយ៉ាងសកម្មក្នុងការថែរក្សាសន្តិភាព ស្ថិរភាព សណ្តាប់ធ្នាប់សង្គម និងរួមចំណែកអភិវឌ្ឍមូលដ្ឋានឱ្យកាន់តែមានការរីកចម្រើនជាលំដាប់ ស្របតាមគោលនយោបាយដ៏ត្រឹមត្រូវ និងចក្ខុវិស័យវែងឆ្ងាយរបស់គណបក្សប្រជាជនកម្ពុជា។

ការប្រកាសបញ្ចូលសមាជិកថ្មីជាង ៥០នាក់នៅស្រុកជ័យសែន ខេត្តព្រះវិហារ នាពេលនេះ មិនត្រឹមតែជាការបង្ហាញពីការរីកចម្រើននៃកម្លាំងគណបក្សប៉ុណ្ណោះទេ ប៉ុន្តែក៏ជាសក្ខីភាពបញ្ជាក់ពីការគាំទ្រយ៉ាងទូលំទូលាយពីប្រជាពលរដ្ឋចំពោះការដឹកនាំរបស់គណបក្សប្រជាជនកម្ពុជា ក្នុងការបន្តកសាង និងអភិវឌ្ឍប្រទេសជាតិឱ្យកាន់តែរីកចម្រើនលើគ្រប់វិស័យ ក្រោមម្លប់សន្តិភាព និងស្ថិរភាព៕