រដ្ឋមន្ត្រីក្រសួងបរិស្ថាន ដឹកនាំសកម្មភាពដាំដើមឈើនៅទូទាំងស្រុកអូររាំងឪ ខេត្តត្បូងឃ្មុំ ក្នុងយុទ្ធនាការបង្កើនគម្របបៃតង និងឆ្លើយតបទៅនឹងការប្រែប្រួលអាកាសធាតុនៅតាមមូលដ្ឋាន
05-07-2026 20:53
(ត្បូងឃ្មុំ)៖ លោកបណ្ឌិត អ៊ាង សុផល្លែត រដ្ឋមន្ត្រីក្រសួងបរិស្ថាន និងជាប្រធានក្រុមការងាររាជរដ្ឋាភិបាលចុះមូលដ្ឋានខេត្តត្បូងឃ្មុំ នៅថ្ងៃអាទិត្យ ទី៥ ខែកក្កដា ឆ្នាំ ២០២៦ បានជំរុញសកម្មភាពដាំដើមឈើ ក្នុងពេលតែមួយ នៅក្នុងមូលដ្ឋានឃុំទាំង៧ នៅទូទាំងស្រុកអូររាំងឪ ខេត្តត្បូងឃ្មុំ។
យុទ្ធនាការនេះធ្វើឡើងដោយមានការចូលរួមពីក្រុមការងារថ្នាក់ជាតិ និងក្រុមការងារគណបក្សចុះមូលដ្ឋានគ្រប់ថ្នាក់ ស្រុកអូររាំងឪ រដ្ឋបាលស្រុក អាជ្ញាធរមូលដ្ឋានគ្រប់ថ្នាក់ យុវជន ប្រជាពលរដ្ឋ និងមានការនិមន្តចូលរួមពីព្រះសង្ឃជាច្រើនអង្គ នាក់។ យុទ្ធនាការនេះធ្វើឡើង ក្នុងគោលបំណងបង្កើនគម្របបៃតង និង ឆ្លើយតបទៅនឹងការប្រែប្រួលអាកាសធាតុ។ ការដាំកូនឈើដាំដើមឈើនៅរដូវវស្សា គឺដើម្បីបង្កើតខែលការពារធម្មជាតិ ជួយស្រូបយកឧស្ម័នផ្ទះកញ្ចក់ បន្សុទ្ធខ្យល់ និងពង្រឹងភាពធន់របស់កម្ពុជាប្រឆាំងនឹងបាតុភូត El Niño (អែលនីញ៉ូ)។
នៅរដូវវស្សាឆ្នាំនេះ រដ្ឋបាលស្រុកអូររាំងឪមានគម្រោងដាំកូនឈើតាមមូលដ្ឋាន និងតាមដងផ្លូវឱ្យបានប្រមាណ ១ម៉ឺនដើម។
នៅក្នុងស្រុកអូររាំងឪ ខេត្តត្បូងឃ្មុំ ក្រសួងបរិស្ថានបានបង្កើតថ្នាលបណ្តុះកូនឈើថ្នាក់តំបន់ដ៏ធំមួយ ដែលមានសមត្ថភាពបណ្តុះកូនឈើចម្រុះបានជាង ១លានដើម (រួមមានឈើប្រណិត ឈើហូបផ្លែ និងកូនត្នោត) សម្រាប់ផ្តល់ជូនសាធារណជន និងរដ្ឋបាលមូលដ្ឋានយកទៅដាំដោយឥតគិតថ្លៃ។
លើសពីនេះ ការដាំដើមឈើបង្កើនប្រាក់ចំណូលសហគមន៍៖ ដើមឈើដែលដាំនឹងជួយបង្កើនគម្របព្រៃឈើ បង្កើនសោភ័ណភាពនៅតាមសហគមន៍ ដែលអាចអនុញ្ញាតឱ្យកម្ពុជាទាក់ទាញអ្នកទេសចរណ៍ អ្នកវិនិយោគ ដើម្បីទាញយកប្រាក់ចំណូលមកអភិវឌ្ឍហេដ្ឋារចនាសម្ព័ន្ធ និងលើកកម្ពស់ជីវភាពប្រជាពលរដ្ឋ។
សូមបញ្ជាក់ថាចាប់ពីថ្ងៃទី១០ ដល់ថ្ងៃទី១៣ ខែកក្កដា ឆ្នាំ ២០២៦ ក្រសួងបរិស្ថានបានរៀបចំយុទ្ធនាការថ្នាក់ជាតិ ចែកកូនឈើចំនួន ៥លានដើម ជូនសាធារណជនដោយឥតគិតថ្លៃ ដើម្បីធានាការដាំដើមឈើឱ្យបានច្រើន ឆ្ពោះទៅរកប្រទេសអព្យាក្រឹតកាបូននៅឆ្នាំ២០៥០៕
