(កណ្តាល)៖ ក្រោយពីមានការផ្ទុះឡើងនូវជំងឺគ្រុនឈាមយ៉ាងគំហុកនៅស្រុកកោះធំ ខេត្តកណ្ដាល ដែលបណ្ដាលឱ្យពលរដ្ឋជិត ៦០០នាក់ឆ្លងជំងឺនេះ និងមានករណីធ្ងន់ធ្ងរចំនួន ៦នាក់កំពុងសម្រាកព្យាបាលនៅមន្ទីរពេទ្យគន្ធបុប្ផា កាលពីថ្ងៃទី៤ ខែកក្កដា ឆ្នាំ២០២៦ លោកស្រីវេជ្ជបណ្ឌិត យក់ សម្បត្តិ រដ្ឋលេខាធិការទទួលបន្ទុកជំងឺឆ្លង នៃក្រសួងសុខាភិបាល បានចុះទៅពិនិត្យ និងតាមដានផ្ទាល់នូវស្ថានភាពជំងឺគ្រុនឈាមនៅស្រុកកោះធំ។

ពិធីនេះដោយលោកវេជ្ជបណ្ឌិត ហុក គឹមចេង អគ្គនាយកបច្ចេកទេសសុខាភិបាល រួមជាមួយប្រធានកម្មវិធីគ្រុនឈាម មន្ទីរសុខាភិបាល នៃរដ្ឋបាលខេត្តកណ្ដាល និងការិយាល័យសុខាភិបាលស្រុកប្រតិបត្តិកោះធំ បានចុះទៅពិនិត្យ និងតាមដានផ្ទាល់នូវស្ថានភាពជំងឺគ្រុនឈាមនៅស្រុកកោះធំ។ ដំណើរទស្សនកិច្ចនេះ មានគោលបំណងវាយតម្លៃពីការឆ្លងរាលដាលនៃជំងឺ និងពង្រឹងវិធានការទប់ស្កាត់ ក៏ដូចជាការព្យាបាលអ្នកជំងឺ។

ក្នុងឱកាសនោះ លោកស្រីរដ្ឋលេខាធិការបានជួបប្រជុំជាមួយថ្នាក់ដឹកនាំ និងក្រុមគ្រូពេទ្យនៃមន្ទីរពេទ្យតេជោសែន កោះធំ ដើម្បីពិនិត្យមើលការផ្ដល់សេវាសុខាភិបាល និងការទទួលអ្នកជំងឺគ្រុនឈាម ដែលកំពុងសម្រាកព្យាបាល រួមទាំងអ្នកជំងឺទូទៅ និងកុមារ។

ក្នុងកិច្ចប្រជុំនេះ លោកស្រីវេជ្ជបណ្ឌិត យក់ សម្បត្តិ បានដាក់ចេញនូវវិធានការបន្ទាន់មួយចំនួន រួមមាន៖

ទី១៖ មន្ទីរពេទ្យត្រូវធានាឱ្យមានសម្ភារៈ ឱសថ និងក្រុមគ្រូពេទ្យគ្រប់គ្រាន់ ដើម្បីសង្គ្រោះ និងព្យាបាលប្រជាពលរដ្ឋឱ្យបានទាន់ពេលវេលា និងប្រកបដោយប្រសិទ្ធភាព។

ទី២៖ បន្តយុទ្ធនាការដាក់ថ្នាំអាបែតតាមផ្ទះ និងបាញ់ថ្នាំកម្ចាត់មូសតាមសហគមន៍ សាលារៀន ព្រមទាំងពង្រឹងការផ្សព្វផ្សាយអប់រំសុខភាព និងពន្យល់ប្រជាពលរដ្ឋឱ្យយល់ច្បាស់អំពីការការពារ និងការទប់ស្កាត់ជំងឺគ្រុនឈាម។

លើសពីនេះ លោកស្រីវេជ្ជបណ្ឌិត យក់ សម្បត្តិ និងប្រតិភូសុខាភិបាល រួមជាមួយអាជ្ញាធរដែនដី បានបន្តចូលរួមក្នុងការអប់រំផ្សព្វផ្សាយដល់កូនសិស្សតូចៗនៅសាលាបឋមសិក្សាព្រែកថ្មី អំពីការបង្ការ និងទប់ស្កាត់ជំងឺគ្រុនឈាម ដែលបណ្ដាលមកពីមូសខ្លា។ បន្ទាប់មក ក្រុមការងារក៏បានចុះពិនិត្យមើលសកម្មភាពក្រុមការងារដែលកំពុងអនុវត្តយុទ្ធនាការបាញ់ថ្នាំមូសតាមភូមិ ឃុំ សាលារៀន និងផ្ទះរបស់ប្រជាពលរដ្ឋ ដើម្បីកម្ចាត់ជម្រកមូសខ្លា។

របាយការណ៍ដែលទទួលបានពីមន្ទីរសុខាភិបាលខេត្ត ពីស្រុកប្រតិបត្តិកោះធំ និងមន្ទីរពេទ្យតេជោសែន កោះធំ បានបង្ហាញថា ចាប់ពីថ្ងៃទី១៦ ខែមិថុនា ដល់ថ្ងៃទី៤ ខែកក្កដា ឆ្នាំ២០២៦ មានអ្នកជំងឺគ្រុនឈាមចំនួន ៥៧៨នាក់។ ក្នុងនោះ អ្នកជំងឺធ្ងន់ធ្ងរចំនួន ៦នាក់ត្រូវបានបញ្ជូនទៅមន្ទីរពេទ្យគន្ធបុប្ផា ហើយពុំទាន់មានករណីស្លាប់ណាមួយត្រូវបានរាយការណ៍ជាផ្លូវការនោះទេ។ មូលដ្ឋានដែលមានការឆ្លងគ្រុនឈាមច្រើនជាងគេ គឺក្រុងសំពៅពូន ឃុំឈើខ្មៅ ឃុំព្រែកជ្រៃ និងមានការឆ្លងរាយប៉ាយនៅតាមឃុំផ្សេងៗទៀតនៃស្រុកកោះធំ។

ទោះជាយ៉ាងណា ក្រោយការផ្ទុះជំងឺគ្រុនឈាមនៅក្រុងសំពៅពូន មានសេចក្ដីរាយការណ៍ក្រៅផ្លូវការមួយចំនួនបានឱ្យដឹងថា មានកុមារចំនួន ៦នាក់បានស្លាប់បាត់បង់ជីវិត។ អាជ្ញាធរ និងក្រសួងសុខាភិបាលកំពុងបន្តតាមដានយ៉ាងយកចិត្តទុកដាក់ចំពោះស្ថានការណ៍នេះ និងជំរុញឱ្យប្រជាពលរដ្ឋទាំងអស់បង្កើនការប្រុងប្រយ័ត្ន និងចូលរួមអនុវត្តវិធានការការពារ ដើម្បីទប់ស្កាត់ការរាលដាលនៃជំងឺគ្រុនឈាមឱ្យបានទាន់ពេលវេលា និងមានប្រសិទ្ធភាព៕