(ភ្នំពេញ)៖ ការប្រកួតរ៉ូបូតថ្នាក់ជាតិ លើកទី១៣ ឆ្នាំ២០២៦ ABU Robocon Cambodia 2026 កាន់តែមានលក្ខណៈពិសេស និងទំនើបជាងមុន ដោយសារការបញ្ចូលនូវបច្ចេកវិទ្យាបញ្ញាសិប្បនិម្មិត AI មុខងារគណនាស្មុគស្មាញ Algorithms និងប្រព័ន្ធទំនើបៗ ដែលបង្ហាញពីសមត្ថភាពខ្ពស់របស់យុវជនកម្ពុជា។

ព្រឹត្តិការណ៍ប្រកួតប្រជែងរ៉ូបូតថ្នាក់ជាតិ លើកទី១៣ ឆ្នាំ២០២៦ ដើម្បីបង្ហាញពីសមត្ថភាពយុវជនខ្មែរ ក្នុងយុគសម័យ AI និងស្វែងរកក្រុមជើងឯកតំណាងឱ្យកម្ពុជា ទៅចូលរួមប្រកួតប្រជែងកម្រិតអន្តរជាតិនៅទីក្រុងហុងកុង។

ព្រឹត្តិការណ៍នេះបានធ្វើឡើងពេញ១ថ្ងៃទី៥ ខែកក្កដា ឆ្នាំ២០២៦ នៅសាលដំបូលទូក នៃសាកលវិទ្យាល័យភូមិន្ទភ្នំពេញ ក្រោមការរៀបចំរបស់ទូរទស្សន៍ជាតិកម្ពុជា ដោយមានការចូលរួមពីសំណាក់លោក ហេង សួរ រដ្ឋមន្ត្រីក្រសួងការងារ និងបណ្ដុះបណ្ដាលវិជ្ជាជីវៈ តំណាងក្រសួងពាក់ព័ន្ធជាច្រើន រួមមាន ក្រសួងព័ត៌មាន, ក្រសួងអប់រំ យុវជន និងកីឡា និងក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍។

សម្រាប់ឆ្នាំ២០២៦នេះ មានចូលរួមប្រកួតប្រជែងយ៉ាងស្វិតស្វាញពីសំណាក់សាកលវិទ្យាល័យ និងវិទ្យាស្ថានល្បីៗទាំង៥ រួមមានទី១. វិទ្យាស្ថានបច្ចេកវិទ្យាកម្ពុជា (ITC) មានរ៉ូបូតចំនួន២ក្រុម, ទី២. វិទ្យាស្ថានជាតិពហុបច្ចេកទេសកម្ពុជា (NPIC) មានរ៉ូបូតចំនួន២ក្រុម, ទី៣. វិទ្យាស្ថានជាតិបណ្តុះបណ្តាលបច្ចេកទេស (NTTI) មានរ៉ូបូតចំនួន១ក្រុម, ទី៤. សាកលវិទ្យាល័យជាតិគ្រប់គ្រង (NUM) មានរ៉ូបូតចំនួន២ក្រុម, និងទី៥. វិទ្យាស្ថានពហុបច្ចេកទេសព្រះកុសុមៈ (PPI) មានរ៉ូបូតចំនួន ១ក្រុម។

ការប្រកួតនៅថ្ងៃនេះ គឺដើម្បីស្វែងរកក្រុមជើងឯកលេខ១ ប្រចាំព្រះរាជាណាចក្រកម្ពុជា ដើម្បីតំណាងឱ្យជាតិយើងទាំងមូល ធ្វើដំណើរទៅចូលរួមការប្រកួតប្រជែងកម្រិតអន្តរជាតិ ABU Robocon 2026 នៅទីក្រុងហុងកុង នាខែសីហា ឆ្នាំ២០២៦ ខាងមុខនេះ ក្រោមប្រធានបទដ៏គួរឱ្យជក់ចិត្តគឺ ក្បាច់គុណកុងហ្វូ "Kung Fu Quest” ដែលជាការរួមបញ្ចូលគ្នារវាងក្បាច់គុនបុរាណចិន និងបច្ចេកវិទ្យារ៉ូបូត AI។

ព្រឹត្តិការណ៍នេះពិតជាបានរួមចំណែកយ៉ាងសំខាន់ក្នុងការលើកកម្ពស់វិស័យបច្ចេកវិទ្យា និងនវានុវត្តន៍នៅកម្ពុជា ស្របតាមចក្ខុវិស័យរបស់រាជរដ្ឋាភិបាលក្នុងការកសាងសេដ្ឋកិច្ចឌីជីថល៕