(កំពង់ធំ)៖ រដ្ឋបាលស្រុកតាំងគោក ខេត្តកំពង់ធំ បានចេញសេចក្តីបំភ្លឺជាសាធារណៈមួយ ដើម្បីបកស្រាយជុំវិញការផ្សាយព័ត៌មានតាមបណ្តាញសង្គមហ្វេសប៊ុក របស់គណនីហ្វេសប៊ុក SK News KH ដែលបានលើកឡើងអំពីបញ្ហាដីធ្លីរបស់ប្រជាពលរដ្ឋ នៅភូមិគោកត្របែក ឃុំស្រឡៅ ស្រុកតាំងគោក, រដ្ឋបាលស្រុកបញ្ជាក់ថា បញ្ហាដីធ្លីរបស់ប្រជាពលរដ្ឋនោះ ជាដីតំបន់៣ ដែលរាជរដ្ឋាភិបាលមិនបានកាត់ឆ្វៀលឱ្យពលរដ្ឋនោះឡើយ នឹងហាមដាច់ខាត់ការទន្ទ្រានលើដីតំបន់៣នោះ។

សេចក្តីបំភ្លឺរបស់រដ្ឋបាលស្រុងតាំងគោក ដែលបណ្តាញព័ត៌មាន Fresh News ទទួលនៅថ្ងៃទី០៦ ខែកក្កដា ឆ្នាំ២០២៦នេះ មានខ្លឹមសារទាំងស្រុងដូចនេះថា៖ នៅវេលា ម៉ោង១២:០៦នាទី ថ្ងៃទី៥ ខែកក្កដា ឆ្នាំ២០២៦ មានគណនីហ្វេសប៊ុក SH News KH បានធ្វើការផ្សាយផ្ទាល់ចំនួន ២២:០៩នាទី ថា ប្រជាពលរដ្ឋប្រមាណ ១០០គ្រួសារ រស់នៅភូមិគោកត្របែក ឃុំស្រឡៅ ស្រុកតាំងគោក ខេត្តកំពង់ធំ កំពុងបង្ហើរសំឡេងដង្ហើយស្វែងរកកិច្ចអន្តរាគមន៍ពីសម្តេចបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា និងសម្តេចតេជោ ហ៊ុន សែន ប្រធានព្រឹទ្ធសភា ក្រោយពីអាជ្ញាធរស្រុកតាំងគោក បានចុះហាមឃាត់ពួកគាត់មិនឱ្យអាស្រ័យផលនៅលើដីស្រែដែលពួកគាត់អះអាងថា បានអាស្រ័យផលជាច្រើន ទស្សវត្សរ៍មកហើយ។

រដ្ឋបាលស្រុកសូមជម្រាបជូនសាធារណៈជនថា៖

ទី១៖ បងប្អូនដែលបានចូលរួមប្រមាណជាង ១០០នាក់នោះ មិនមែនសុទ្ធតែបងប្អូនរស់នៅក្នុងភូមិគោកត្របែកទាំងអស់នោះទេ គឺមួយចំនួនមកពីភូមិផ្សេងនៃឃុំស្រឡៅ និងឃុំផ្សេង ខេត្តផ្សេងៗផងដែរ ។

២៖ រដ្ឋបាលស្រុក ដែលមានទីបញ្ជាការស្រាលប្រចាំនៅកោះរះ បានបន្តអនុវត្តនូវចំណាត់ការរបស់រាជរដ្ឋាភិបាល ក្នុងការទប់ស្កាត់នៃការទន្ទ្រានដីដែលរាជរដ្ឋាភិបាលមិនបានកាត់ឆ្វៀល (ក្នុងដីតំបន់៣) ឱ្យបានម៉ឺងម៉ាត់ ។

៣៖ កន្លងមកនេះទីបញ្ជាការស្រាលបានចុះទប់ស្កាត់ពាក់ព័ន្ធនឹងបងប្អូនប្រជាពលរដ្ឋយើងដែលបង្ករបង្កើនផលក្រៅតំបន់ឆ្វៀល (ដីតំបន់៣) ដែលនៅក្នុងភូមិគោកត្របែក ឃុំស្រឡៅ មិនអនុញ្ញាតឱ្យបងប្អូនបង្ករបង្កើនផល។ ការទប់ស្កាត់នេះបានប៉ះពាល់ទៅលើបងប្អូនប្រជាពលរដ្ឋចំនួន ៣៥គ្រួសារ លើផ្ទៃដី ១០០,៧៣ហិកតា លើផ្ទៃដីដែលរាជរដ្ឋាភិបាលមិនបានកាត់ឆ្លៀត(ដីតំបន់៣) ។ នៅក្នុងការទប់ស្កាត់ទាំងនេះបងប្អូនប្រជាពលរដ្ឋមានការស្នើ សុំបង្ករបង្កើនផលដីទាំងនោះ (ដីមិនបានកាត់ឆ្វៀល) ។

៤៖ ក្រោយពីបានទទួលសំណូមពរពីបងប្អូនប្រជាពលរដ្ឋ លោកអភិបាលខេត្តកំពង់ធំ បានអញ្ជើញចុះទៅភូមិគោកត្របែក នៅថ្ងៃទី១៧ ខែមីនា ឆ្នាំ២០២៦ ដើម្បីសំណេះសំណាល និងបានមានប្រសាសន៍ជូនបងប្អូនថា ទីបញ្ជាការស្រាលចុះទប់ស្កាត់តែការប៉ុនប៉ងបង្ករបង្កើនផលតែក្នុងដីតំបន់៣នោះទេ ចំពោះតំបន់ដែលបានកាត់ឆ្វៀលជូនបងប្អូន ទីបញ្ជាការស្រាលមិនមានការហាមឃាត់នោះទេ និងឱ្យបងប្អូនគោរពតាមគោលការណ៍សម្រេច របស់រាជរដ្ឋាភិបាលដែលរក្សាតំបន់ណាជាតំបន់៣ និងតំបន់ណាជាតំបន់២ ដើម្បីផលប្រយោជន៍រួមទៅមុខ ទាំងអស់គ្នា។ ក្រោយទទួលបានសំណូមពរពីប្រជាពលរដ្ឋទាំង ៣៥គ្រួសារ លោកអភិបាលខេត្ត ក៏បានអញ្ជើញ ចុះពិនិត្យស្ថានភាពដីជាក់ស្តែងផងដែរ ។

ថ្មីៗនេះទីបញ្ជាការស្រាល ពុំបានជួបប្រទះការបង្ករបង្កើនផលលើដីក្រៅតំបន់ឆ្វៀលនោះទេ ហើយទីបញ្ជាការស្រាលបានបន្តផ្សព្វផ្សាយវិធានការផ្សេងៗរបស់រាជរដ្ឋាភិបាលផងដែរ៕