(បរទេស)៖ មិចស៊ិក សហម្ចាស់ផ្ទះ FIFA World Cup 2026 បានជ្រុះចេញត្រឹមវគ្គ ១៦ក្រុមចុងក្រោយដូចគ្នានឹងកាណាដាផងដែរ ក្រោយស៊ុតគ្នាទៅវិញទៅមកមានដល់ទៅ ៥គ្រាប់នាព្រឹកថ្ងៃចន្ទ ទី០៦ ខែកក្កដានេះ (ម៉ោងនៅកម្ពុជា)។

នេះមានន័យថា សហម្ចាស់ផ្ទះទាំង៣ នៃ World Cup ជំនាន់ទី២៣ នេះបានហាលអាវ ២ក្រុមហើយ លើកលែងតែអាមេរិកដែលត្រូវប៉ះប៊ែលហ្ស៊ិកមិនទាន់ប្រកួតវគ្គ ១៦ក្រុម។

ក្នុងការលេង ៩០នាទីពេញ ម្ចាស់ផ្ទះមិចស៊ិកដែលរក្សាសំណាញ់ទីបាន ៤ប្រកួតកន្លងមកនេះ ត្រូវបានតោកំណាចអង់គ្លេស អតីតជើងឯក World Cup តែ ១លើកកាលឆ្នាំ១៩៦៦ បានបើកការនាំមុខ ២គ្រាប់មុនក្នុងរយៈពេល ៣៨នាទីនៃវគ្គទី១ ពីការធ្វើបានដោយខ្សែបម្រើ Jude Bellingham មកពីក្លិប Real Madrid មុនពេល ៤នាទីបន្ទាប់ Quinones រកបាន ១គ្រាប់វាយបកតាមពីក្រោយ។

ទោះយ៉ាងណាប្រទេសស្ថិតនៅតំបន់អាមេរិក មិចស៊ិកដែលទទួលបានសិទ្ធិរៀបចំព្រឹត្តិការណ៍បាល់ទាត់ពិភពលោកជាលើកទី៣ បន្តរកបានគ្រាប់ទី២ ដោយប្រធានក្រុម Raul Jimenez ដោយបាល់ ១១ម៉ែត្រ និងមានគម្លាតត្រឹមតែ ៨នាទីប៉ុណ្ណោះ បន្ទាប់ពីប្រធានក្រុម Harry Kane រកបានគ្រាប់ទី៣ សម្រាប់ក្រុមនៅអឺរ៉ុបដោយបាល់ពិន័យប៉េណាល់ទីនេះដែរ។

វាជាការឆ្លងទៅវគ្គ ៨ក្រុមជាលើកទី៣ ជាប់ៗនៅ World Cup សម្រាប់អង់គ្លេស គិតចាប់តាំងពីឆ្នាំ២០១៨ មក និងបានចាញ់ក្រូអាត ២-១ ផងដែរកាលវគ្គពាក់កណ្តាលផ្តាច់ព្រ័ត្រឆ្នាំ២០១៨ នៅប្រទេសរុស្ស៊ី។ ក្រុមដែលដឹកនាំ ដោយអ្នកចាត់ការសញ្ជាតិអាល្លឺម៉ង់ Thomas Tuchel ត្រូវប្រឈមមុខនឹងន័រវេស ដែលបានទម្លាក់ជើងឯក World Cup ៥សម័យ សាំបាប្រេស៊ីលដោយលទ្ធផល ២-១៕