(ភ្នំពេញ)៖ លោក UENO Atsushi ឯកអគ្គរាជទូតជប៉ុន ប្រចាំព្រះរាជាណាចក្រកម្ពុជា បានកោតសរសើរ និងវាយតម្លៃខ្ពស់ចំពោះកិច្ចខិតខំប្រឹងប្រែងរបស់ក្រសួងបរិស្ថានកម្ពុជា ដែលបានរួមចំណែកយ៉ាងសំខាន់ក្នុងការប្រែក្លាយប្រទេសកម្ពុជាឱ្យក្លាយជា «ផ្ទះដ៏ស្អាត និងមានបរិស្ថានល្អ» សម្រាប់ប្រជាពលរដ្ឋគ្រប់រូប។

ការកោតសរសើរបែបនេះ របស់ឯកអគ្គរាជទូតជប៉ុន បានធ្វើឡើងក្នុងឱកាសដែលលោកបានអញ្ជើញចូលជួបពិភាក្សាការងារ និងជម្រាបលា លោកបណ្ឌិត អ៊ាង សុផល្លែត រដ្ឋមន្រ្តីក្រសួងបរិស្ថាន នាទីស្តីការក្រសួងបរិស្ថាន នៅថ្ងៃទី៦ ខែកក្កដា ឆ្នាំ២០២៦។

ក្នុងជំនួបដ៏មានអត្ថន័យនោះ លោក UENO Atsushi បានគូសបញ្ជាក់អំពីការវិវត្តជាវិជ្ជមានគួរឱ្យកត់សម្គាល់ នៃការគ្រប់គ្រងបរិស្ថាននៅកម្ពុជា ក្រោមការដឹកនាំប្រកបដោយចក្ខុវិស័យរបស់ក្រសួងបរិស្ថាន។

លោកបានសង្កត់ធ្ងន់ថា កិច្ចខិតខំប្រឹងប្រែងទាំងនេះ មិនត្រឹមតែបានលើកកម្ពស់សោភ័ណភាព និងអនាម័យសាធារណៈប៉ុណ្ណោះទេ ប៉ុន្តែថែមទាំងបានរួមចំណែកដល់ការកែលម្អគុណភាពជីវិតរបស់ប្រជាពលរដ្ឋកម្ពុជាផងដែរ។

ជាមួយគ្នានេះ ឯកអគ្គរាជទូតជប៉ុន ក៏បានប្រកាសប្តេជ្ញាចិត្តយ៉ាងមុតមាំរបស់ប្រទេសជប៉ុន ក្នុងការបន្តពង្រឹង និងពង្រីកកិច្ចសហប្រតិបត្តិការទ្វេភាគីជាមួយកម្ពុជាឱ្យកាន់តែស៊ីជម្រៅ ដោយផ្តោតជាពិសេសលើវិស័យបរិស្ថាន និងការប្រែប្រួលអាកាសធាតុ ដែលត្រូវបានចាត់ទុកជាអាទិភាពគន្លឹះមួយនៃទំនាក់ទំនងរវាងប្រទេសទាំងពីរ។

ជាការឆ្លើយតប លោកបណ្ឌិត អ៊ាង សុផល្លែត បានថ្លែងអំណរគុណយ៉ាងជ្រាលជ្រៅចំពោះរាជរដ្ឋាភិបាល និងស្ថានទូតជប៉ុនប្រចាំកម្ពុជា ដែលបានផ្តល់ការគាំទ្រយ៉ាងសកម្ម និងទូលំទូលាយដល់វិស័យបរិស្ថាននៅកម្ពុជា។ ការគាំទ្រទាំងនេះ រួមមានទាំងផ្នែកថវិកា សម្ភារៈបច្ចេកទេស និងកិច្ចសហប្រតិបត្តិការយុទ្ធសាស្ត្រ ដែលជាកម្លាំងចលករដ៏សំខាន់ឆ្ពោះទៅរកការអភិវឌ្ឍប្រកបដោយចីរភាព និងអព្យាក្រឹតកាបូន។

លោករដ្ឋមន្រ្តីបានលើកឡើងថា ប្រទេសជប៉ុនបានដើរតួនាទីយ៉ាងសំខាន់ក្នុងការគាំទ្រដល់ភាពស្អាតរបស់កម្ពុជា តាមរយៈការផ្តល់ធុងសំរាមញែក និងរថយន្តប្រមូលសំរាម ដែលបានជួយកម្ពុជាដោះស្រាយបញ្ហាសំណល់រឹងនៅតាមសហគមន៍ផ្ទាល់។ លើសពីនេះ ជំនួយទាំងនេះក៏បានជួយជំរុញយុទ្ធនាការកាត់បន្ថយការប្រើប្រាស់ប្លាស្ទិក ដែលធ្វើឱ្យពលរដ្ឋកម្ពុជាផ្លាស់ប្តូរទម្លាប់រស់នៅប្រចាំថ្ងៃ ឆ្ពោះទៅរកភាពស្អាត និងសុខភាពល្អ។

ជាមួយគ្នានេះដែរ លោកបណ្ឌិត អ៊ាង សុផល្លែត ក៏បានបន្តប្តេជ្ញាចិត្តពង្រឹង និងពង្រីកកិច្ចសហការរវាងប្រទេសទាំងពីរ កម្ពុជា-ជប៉ុន ក្នុងនោះរួមមានការចែករំលែកចំណេះដឹង និងបច្ចេកវិទ្យាបៃតងទំនើបៗមកកម្ពុជា។ លោកក៏បានស្នើសុំឱ្យជប៉ុនបន្តការគាំទ្រ «យុទ្ធសាស្ត្រចក្រាវិស័យបរិស្ថាន» របស់កម្ពុជា ដែលជាយុទ្ធសាស្ត្រដ៏សំខាន់មួយធានាថា កម្ពុជានឹងមានភាពធន់ និងចីរភាពនាពេលអនាគត។

គួររំលឹកផងដែរថា ប្រទេសជប៉ុន បានគាំទ្រយ៉ាងពេញទំហឹងដល់ «យុទ្ធសាស្ត្រចក្រាវិស័យបរិស្ថាន» របស់កម្ពុជា ដែលផ្តោតលើសសរស្តម្ភបីយ៉ាងគឺ ភាពស្អាត ភាពបៃតង និងចីរភាព។ ជាក់ស្តែង កាលពីពេលថ្មីៗកន្លងមកនេះ ប្រទេសជប៉ុន បានសហការជាមួយកម្មវិធីអភិវឌ្ឍន៍អង្គការសហប្រជាជាតិ (UNDP) ផ្តល់ធុងញែកសំរាម និងទុកដាក់សំណល់ប្លាស្ទិក ចំនួន ៣,០០០ធុង ជូនដល់ក្រសួងបរិស្ថាន ដើម្បីដាក់ពង្រាយតាមបណ្តារាជធានី-ខេត្តគោលដៅសំខាន់ៗ ដូចជា ភ្នំពេញ សៀមរាប និងតំបន់មាត់សមុទ្រ។ លើសពីនេះ គម្រោងជំនួយ Kusanone របស់ប្រទេសជប៉ុនក៏បានផ្តល់រថយន្តប្រមូលសំរាម និងឧបករណ៍សម្ភារៈនានា ដើម្បីជួយសម្រួលដល់រដ្ឋបាលថ្នាក់ក្រោមជាតិ ក្នុងការសម្អាតអនាម័យបរិស្ថាន និងលើកកម្ពស់សោភ័ណភាពមូលដ្ឋានឱ្យកាន់តែប្រសើរឡើង។

កិច្ចសហប្រតិបត្តិការដ៏រឹងមាំរវាងកម្ពុជា និងជប៉ុន ក្នុងវិស័យបរិស្ថាននេះ គឺជាសក្ខីភាពបញ្ជាក់ពីការប្តេជ្ញាចិត្តរួមគ្នាក្នុងការកសាងអនាគតមួយប្រកបដោយនិរន្តរភាព និងបរិស្ថានល្អប្រសើរសម្រាប់ប្រជាជនទាំងពីរ និងសម្រាប់ពិភពលោកទាំងមូល។ តាមរយៈការបន្តពង្រឹងភាពជាដៃគូនេះ កម្ពុជានឹងអាចសម្រេចបាននូវគោលដៅអភិវឌ្ឍន៍ប្រកបដោយចីរភាព និងក្លាយជាប្រទេសមួយដែលមានបរិស្ថានស្អាត និងបៃតងពិតប្រាកដ៕