(កណ្តាល)៖ ក្រុមការងារគណៈកម្មការរៀបចំការបោះឆ្នោតថ្នាក់ស្រុក និងថ្នាក់ឃុំ នៅថ្ងៃទី០៥ ខែកក្កដា ឆ្នាំ២០២៦នេះ បានរៀបចំពិធីបោះឆ្នោតជ្រើសរើសថ្នាក់ដឹកនាំយុវជនគណបក្សឃុំរកាកោងទី២ ស្រុកមុខកំពូល ខេត្តកណ្ដាល ប្រកបដោយបរិយាកាសរីករាយ និងលទ្ធិប្រជាធិបតេយ្យ។

ពិធីនេះត្រូវបានប្រារព្ធឡើងក្រោមអធិបតីភាពលោក រស់ បរម អនុប្រធានក្រុមការងារគណបក្សចុះមូលដ្ឋានស្រុក និងជាប្រធានក្រុមការងារគណបក្សចុះមូលដ្ឋានឃុំរកាកោងទី២ រួមជាមួយលោក យី យ៉េន សមាជិកគណៈកម្មាធិការគណបក្សខេត្តកណ្ដាល និងជាប្រធានគណបក្សប្រជាជនស្រុកមុខកំពូល, លោក អោង គឹមលាង អនុប្រធានប្រចាំការគណបក្សស្រុកមុខកំពូល ព្រមទាំងលោក លោកស្រីជាច្រើនរូបទៀត ដែលជាក្រុមការងារគណបក្សចុះមូលដ្ឋានស្រុកមុខកំពូល និងក្រុមការងារគណបក្សចុះមូលដ្ឋានឃុំរកាកោងទី២។

លើសពីនេះ ក៏មានការចូលរួមពីប្រធានគណបក្សឃុំ គណៈអចិន្ត្រៃយ៍គណបក្សឃុំរកាកោងទី២ លោក លោកស្រីគណៈកម្មការរៀបចំការបោះឆ្នោតថ្នាក់ស្រុក និងថ្នាក់ឃុំ លោក លោកស្រីប្រធាន អនុប្រធានសាខាបក្សភូមិ បេក្ខជនឈរឈ្មោះចំនួន ១០រូប និងសមាជិកអង្គបោះឆ្នោតសរុប ២០៩នាក់ ដែលបានមកចូលរួមយ៉ាងផុសផុល។

លោក រស់ បរម បានផ្ដាំផ្ញើដ៏មានអត្ថន័យជ្រាលជ្រៅទៅកាន់ថ្នាក់ដឹកនាំយុវជនដែលទើបនឹងជាប់ឆ្នោតថ្មី។ លោកបានសង្កត់ធ្ងន់ថា ថ្នាក់ដឹកនាំយុវជនទាំងអស់ ត្រូវតែខិតខំប្រឹងប្រែងដឹកនាំការងារគណបក្សប្រកបដោយយុទ្ធសាស្ត្រច្បាស់លាស់ និងប្រសិទ្ធភាពខ្ពស់។ គោលបំណងសំខាន់គឺដើម្បីគៀងគរ និងពង្រឹងការគាំទ្រពីសំណាក់ប្រជាពលរដ្ឋចំពោះគណបក្សប្រជាជនកម្ពុជា ក្នុងការបោះឆ្នោតជ្រើសរើសក្រុមប្រឹក្សា ឃុំ-សង្កាត់ ដែលនឹងប្រព្រឹត្តទៅនៅឆ្នាំ២០២៧ ខាងមុខនេះ។ ការងារនេះទាមទារនូវការលះបង់ ភាពជាអ្នកដឹកនាំល្អ និងការយល់ដឹងស៊ីជម្រៅអំពីតម្រូវការរបស់ប្រជាពលរដ្ឋនៅមូលដ្ឋាន។

លើសពីនេះ លោក រស់ បរម ក៏បានផ្ដាំផ្ញើដល់អាជ្ញាធរមូលដ្ឋានទាំងអស់ ឱ្យបន្តខិតខំបំពេញតួនាទីបម្រើប្រជាពលរដ្ឋឲ្យបានល្អប្រសើរ ជាមួយនឹងស្មារតីទទួលខុសត្រូវខ្ពស់។ លោកបានណែនាំឱ្យអាជ្ញាធរត្រូវដោះស្រាយរាល់បញ្ហាប្រឈម និងសំណូមពររបស់ប្រជាពលរដ្ឋប្រកបដោយយុត្តិធម៌ តម្លាភាព និងឆាប់រហ័ស ដើម្បីធានាថាប្រជាពលរដ្ឋទទួលបាននូវសេវាសាធារណៈប្រកបដោយគុណភាព និងប្រសិទ្ធភាព។ ការបម្រើប្រជាពលរដ្ឋដោយអស់ពីចិត្ត និងជៀសវាងការបង្កឱ្យមានការថ្នាំងថ្នាក់ណាមួយ គឺជាកត្តាចាំបាច់ដើម្បីរក្សាបាននូវទំនុកចិត្ត និងការគាំទ្រពីមហាជន។

ពិធីបោះឆ្នោតនេះបានបង្ហាញឲ្យឃើញពីការយកចិត្តទុកដាក់របស់គណបក្សប្រជាជនកម្ពុជា ក្នុងការបណ្ដុះបណ្ដាល និងផ្ដល់ឱកាសដល់យុវជនឲ្យចូលរួមចំណែកក្នុងកិច្ចការនយោបាយ និងការអភិវឌ្ឍសង្គមជាតិ។ យុវជនគឺជាទំពាំងស្នងឫស្សី និងជាកម្លាំងចលករដ៏សំខាន់ក្នុងការជំរុញវឌ្ឍនភាពរបស់ប្រទេសជាតិ។ តាមរយៈការជ្រើសរើសថ្នាក់ដឹកនាំយុវជនថ្មីនេះ គណបក្សសង្ឃឹមយ៉ាងមុតមាំថា នឹងមានធនធានមនុស្សវ័យក្មេងប្រកបដោយសមត្ថភាព និងឆន្ទៈខ្ពស់ ក្នុងការបន្តបេសកកម្មបម្រើជាតិ និងប្រជាជន។

សូមជម្រាបថា បេក្ខជនដែលបានជាប់ឆ្នោតជាថ្នាក់ដឹកនាំយុវជនគណបក្សឃុំរកាកោងទី២ រួមមាន៖

*លេខ១៖ ឈ្មោះ ផៃ បុរី មកពីភូមិស្ពានថ្មី ឃុំរកាកោងទី២ ស្រុកមុខកំពូល ខេត្តកណ្ដាល
*លេខ២៖ ឈ្មោះ ស្តើង ស្រីមាស មកពីភូមិពោធិ៍រលំ ឃុំរកាកោងទី២ ស្រុកមុខកំពូល ខេត្តកណ្ដាល
*លេខ៣៖ ឈ្មោះ រ័ត្ន ចាន់ម៉ូនីកា មកពីភូមិស្ពានថ្មី ឃុំរកាកោងទី២ ស្រុកមុខកំពូល ខេត្តកណ្ដាល
*លេខ៤៖ ឈ្មោះ គង់ ស្រីស មកពីភូមិព្រែកជ្រៅ ឃុំរកាកោងទី២ ស្រុកមុខកំពូល ខេត្តកណ្ដាល
*លេខ៥៖ ឈ្មោះ នីម ជូឡាយ មកពីភូមិព្រែកជ្រៅ ឃុំរកាកោងទី២ ស្រុកមុខកំពូល ខេត្តកណ្ដាល។

ការបោះឆ្នោតជ្រើសរើសថ្នាក់ដឹកនាំយុវជននេះ គឺជាផ្នែកមួយនៃការត្រៀមលក្ខណៈរបស់គណបក្សប្រជាជនកម្ពុជា ដើម្បីពង្រឹងរចនាសម្ព័ន្ធ និងយន្តការការងារនៅថ្នាក់មូលដ្ឋាន ឆ្ពោះទៅរកជ័យជម្នះក្នុងការបោះឆ្នោតនាពេលខាងមុខ។ ថ្នាក់ដឹកនាំយុវជនដែលជាប់ឆ្នោតថ្មីទាំងអស់ ត្រូវបានរំពឹងទុកថា នឹងក្លាយជាកម្លាំងស្នូលក្នុងការផ្សព្វផ្សាយគោលនយោបាយគណបក្ស និងចូលរួមយ៉ាងសកម្មក្នុងការអភិវឌ្ឍសហគមន៍របស់ខ្លួន៕