(កណ្តាល)៖ ប្រជាពលរដ្ឋរស់នៅឃុំព្រែកតាមាក់ និងឃុំពុកឬស្សី ពិសេសអ្នកនៅទីរួមស្រុកខ្សាច់កណ្ដាល ខេត្តកណ្ដាល បានស្នើសុំថ្នាក់ដឹកនាំខេត្ត ជួយដោះស្រាយបញ្ហាទីតាំងចាក់សំរាមរបស់ក្រុមហ៊ុន ស៊ិន ទ្រី ដែលមានទំហំជាង ៦ហិកតា បានបំភាយក្លិន និងផ្សែងកើតចេញពីការដុតសំរាម ដែលបង្កផលប៉ះពាល់ដល់សុខភាពសាធារណៈយ៉ាងធ្ងន់ធ្ងរ និងប៉ះពាល់ដល់បរិស្ថាន។

អ្នកភូមិម្នាក់ដែលរស់នៅជិតនោះ បានសម្តែងការបារម្ភផង ខឹងផង និងធុញទ្រាន់ផង ចំពោះករណីក្លិនស្អុយ និងក្លិនផ្សែងដ៏គគ្រក់នេះ ព្រោះបង្កឲ្យពលរដ្ឋកើតជំងឺផ្សេងៗ ដកដង្ហើមពិបាក និងគ្មានផាសុកភាពសោះឡើយ។ ការរស់នៅជាមួយនឹងផ្សែងពុល និងក្លិនស្អុយ បានបង្កឱ្យកើតមានអារម្មណ៍តានតឹង និងពិបាករស់នៅជាខ្លាំង។

អ្នកភូមិផ្សេងទៀតជាច្រើននាក់ ក៏បានសម្តែងការយល់ឃើញ និងអារម្មណ៍ស្រដៀងគ្នានេះដែរ ដ្បិតពួកគាត់រស់នៅជាមួយបញ្ហានេះជាយូរមកហើយ និងបានស្នើដល់អាជ្ញាធរស្រុកជួយដោះស្រាយជាច្រើនលើកច្រើនសារមកហើយ។ ប៉ុន្តែបញ្ហានៅតែជាបញ្ហា មិនបានបាត់ទៅណាទេ អ្នកវេទនា នៅតែរស់នៅវេទនាដដែល។

ជុំវិញបញ្ហានេះ លោក ចេង ឌីណា អភិបាលស្រុកខ្សាច់កណ្ដាល បានថ្លែងប្រាប់អ្នកយកព័ត៌មាន Fresh News ឱ្យដឹងថា បញ្ហានេះ រដ្ឋបាលស្រុកតែងតែដោះស្រាយឱ្យរហូតមក។ ប៉ុន្តែអ្នកបង្កបញ្ហានោះ គឺកើតចេញពីអ្នកកាយសំរាមនេះឯង។

ពួកគាត់រើកកាយសំរាមផង ហើយលួចដុតសំរាមជាច្រើនលើកច្រើនសារមកហើយ ខណៈដែលអាជ្ញាធរធ្លាប់បានដាស់តឿន ក្រើនរំលឹក និងអប់រំជាច្រើនលើកមកហើយ។ ពួកគេនោះ ស្ដាប់បានមួយរយៈកាលខ្លី ក៏លួចដុតសំរាមទៀត ខណៈដែលរដ្ឋបាលស្រុកតែងតែអន្តរាគមន៍ស្ទើររាល់ថ្ងៃ ដោយយកឡានទឹកទៅបាញ់ពន្លត់។

លោកអភិបាលស្រុក បានបន្តថា៖ ការងារនេះ ដូចវែកចកអីចឹង ប្រាប់ថាកុំឱ្យដុត ស្ដាប់បានតែមួយភ្លែត ក៏លួចដុតទៀត។ ទោះយ៉ាងនេះក្ដី ក្នុងនាមអភិបាលស្រុក លោក ចេង ឌីណា នៅតែបន្តខិតខំដោះស្រាយបញ្ហានេះ ឱ្យបានលឿនរហ័សបំផុតតាមដែលអាចធ្វើបាន។

លោកបានស្នើប្រជាពលរដ្ឋឱ្យថែទាំសុខភាពឱ្យបានល្អ ទុកដាក់សំរាមឱ្យមានរបៀបរៀបរយ កុំចោលសំរាមផ្ដេសផ្ដាស រួមគ្នាថែរក្សាបរិស្ថានស្រុកខ្សាច់កណ្ដាលយើងឱ្យបានល្អស្អាត។ បញ្ហាបរិស្ថាន និងសុខភាពសាធារណៈដែលកើតចេញពីការគ្រប់គ្រងសំរាម គឺជាកង្វល់រួមដែលទាមទារការចូលរួមពីគ្រប់ភាគីពាក់ព័ន្ធ ដើម្បីធានាបាននូវបរិស្ថានរស់នៅប្រកបដោយផាសុកភាព និងសុវត្ថិភាពសម្រាប់ប្រជាពលរដ្ឋទាំងអស់៕