(កណ្តាល)៖ ជំងឺគ្រុនឈាមកំពុងតែបន្តផ្ទុះរីករាលដាលយ៉ាងគំហុកនៅក្នុងស្រុកកោះធំ ខេត្តកណ្ដាល ដែលបានបណ្ដាលឲ្យពលរដ្ឋជិត ៦០០នាក់ឆ្លងជំងឺនេះ និងមានករណីធ្ងន់ធ្ងរចំនួន ៦នាក់កំពុងសង្គ្រោះបន្ទាន់នៅមន្ទីរពេទ្យ គន្ធបុប្ផា។ ក្នុងចំណោមអ្នកឆ្លងជំងឺនេះ កុមារមូស្លីមចំនួន ៧នាក់ ដែលរស់នៅក្នុងភូមិចាមលើ ឃុំព្រែកថ្មី ស្រុកកោះធំ ក៏បានកើតជំងឺគ្រុនឈាមផងដែរ ហើយបច្ចុប្បន្នកំពុងសម្រាកព្យាបាលនៅមន្ទីរពេទ្យបង្អែកតេជោសែនកោះធំ។

ក្រុមការងារសុខាភិបាលបានចុះយុទ្ធនាការយ៉ាងសកម្ម ដើម្បីបាញ់ថ្នាំកម្ចាត់មូស ដាក់ថ្នាំអាល់បេត (Abate) និងធ្វើយុទ្ធនាការសម្អាតជម្រកមូសនៅតាមមូលដ្ឋាននានា។ ក្នុងនោះ ពលរដ្ឋមូស្លីមទាំងអស់នៅភូមិចាមលើ ក៏បានចូលរួមអនុវត្តតាមការណែនាំទាំងនេះយ៉ាងខ្ជាប់ខ្ជួនផងដែរ ដើម្បីរួមចំណែកទប់ស្កាត់ការរីករាលដាលនៃជំងឺគ្រុនឈាម។

លោក ឡា ស្លេះ អភិបាលរងស្រុកកោះធំ បានបញ្ជាក់ឲ្យដឹងថា អាជ្ញាធរស្រុកកំពុងតែបន្តខិតខំប្រឹងប្រែងធ្វើយុទ្ធនាការទប់ស្កាត់ជំងឺគ្រុនឈាមនេះជារៀងរាល់ថ្ងៃ ដោយមានគោលបំណងមិនឲ្យមានការរីករាលដាល កាន់តែខ្លាំងឡើង។

លោកបានថ្លែងថា ក្រុមការងារបានធ្វើការងារនេះយ៉ាងសស្រាក់សស្រាំបំផុត ហើយបានអំពាវនាវដល់ពលរដ្ឋទាំងអស់ឲ្យបង្កើនការប្រុងប្រយ័ត្នខ្ពស់ចំពោះការខាំរបស់មូសខ្លាលើកូនក្មេង និងត្រូវមើលថែកូនៗឲ្យបានល្អ។ លោកក៏បានសង្កត់ធ្ងន់ថា ប្រសិនបើកុមារមានអាការៈក្ដៅខ្លួន សូមរួសរាន់នាំយកទៅមន្ទីរពេទ្យបង្អែកតេជោសែនជាបន្ទាន់ កុំទុកយូរឲ្យសោះ ដើម្បីទទួលបានការព្យាបាលទាន់ពេលវេលា និងជៀសវាងផលវិបាកធ្ងន់ធ្ងរ។

ក្នុងនាមអភិបាលរងស្រុក លោក ឡា ស្លេះ ក៏បានថ្លែងអំណរគុណយ៉ាងជ្រាលជ្រៅចំពោះក្រុមការងារទាំងអស់ ដែលបានខិតខំចុះជួយដល់បងប្អូនពលរដ្ឋទូទាំងស្រុកកោះធំ ក្នុងនោះភូមិចាមលើក៏ទទួល បានការចុះជួយអន្តរាគមន៍យ៉ាងយកចិត្តទុកដាក់ផងដែរ។ ការចូលរួមសហការពីគ្រប់ភាគីពាក់ព័ន្ធ គឺជារឿងចាំបាច់បំផុតក្នុងការប្រយុទ្ធប្រឆាំងនឹងជំងឺគ្រុនឈាម ដើម្បីធានាសុខភាព និងសុវត្ថិភាពរបស់សហគមន៍ទាំងមូល៕