(កំពង់ធំ)៖ អនុវត្តតាមការចង្អុលដឹកនាំដ៏ខ្ពង់ខ្ពស់ពីនាយឧត្ដមសេនីយ៍ ស ថេត អគ្គស្នងការនគរបាលជាតិ នៅថ្ងៃទី៦ ខែកក្កដា ឆ្នាំ២០២៦ ឧត្តមសេនីយ៍ទោ ហេង សុផល ស្នងការនគរបាលខេត្តកំពង់ធំ បានដាក់ចេញទិសដៅ ៣ ចំណុចដល់កងកម្លាំងអនុវត្តឱ្យទទួលបានប្រសិទ្ធភាពខ្ពស់។

លោកឧត្តមសេនីយ៍ទោ ហេង សុផល បានថ្លែងសំណេះសំណាលជាមួយនឹងកងកម្លាំងជាង ៣០០នាក់។

លោកបានថ្លែងកោតសរសើរបងប្អូនកងកម្លាំងគ្រប់លំដាប់ ដែលអនុវត្ត តួនាទី ភារកិច្ច បានល្អប្រសើរ នាពេលកន្លងមក បង្ការ ទប់ស្កាត់បទល្មើសគ្រប់ប្រភេទ ធានារក្សា សន្តិសុខ សុវត្ថិភាព សណ្តាប់ធ្នាប់សាធារណៈ ជូនសង្គមជាតិ និងប្រជាពលរដ្ឋ ស្របគោលនយោបាយភូមិ-ឃុំ សង្កាត់មានសុវត្ថិភាព។

បន្ថែមលើ ប្រសាសន៍សំណេះសំណាល លោកស្នងការ បានថ្លែងក្រើនរំលឹកលើការងារ ដូចខាងក្រោម៖

*ទី១៖ ការងារដឹកនាំបញ្ជា ប្រកបដោយស្មារតី សាមគ្គីភាព ឯកភាពផ្ទៃក្នុង ថ្នាក់ដឹកនាំការិយាល័យជំនាញ ត្រូវបន្តពង្រឹងការគ្រប់គ្រងត្រួតពិនិត្យមន្ត្រីក្រោមឱវាទ ឱ្យបានម៉ឺងម៉ាត់ ក្នុងការអនុវត្តតួនាទី ភារកិច្ចជាប្រចាំថ្ងៃ ការងារគោរពទង់ជាតិ ការងារប្រចាំបញ្ជា និងការងារសប្បុរសធម៌។

*ទី២៖ បន្តយកចិត្តទុក ការធ្វើអនាម័យសុខភាព និងបរិស្ថាន បោសសំអាតសំរាម ទីកន្លែងបំពេញភារកិច្ច ក្នុង-ក្រៅ បរិវេណអង្គភាព រៀបចំប្រមូលទុកដាក់វត្ថុ ឱ្យមានសណ្ដាប់ធ្នាប់ល្អ។

*ទី៣៖ កងអនុសេនាតូចទាំង ០២ ក្រុម នៃស្នងការដ្ឋាននគរបាលខេត្តកំពង់ធំ ត្រូវបន្តត្រៀមខ្លួនរួចជាស្រេច រង់ចាំអនុវត្តបទបញ្ជា របស់រាជរដ្ឋាភិបាល ការពារបូរណភាព អធិបតេយ្យភាពទឹកដី នៃកម្ពុជា៕