(រតនគិរី)៖ កាលពីថ្ងៃទី៤ ខែកក្កដា ឆ្នាំ២០២៦ អាជ្ញាធរស្រុកអណ្តូងមាស ខេត្តរតនគិរី បានដឹកនាំកម្លាំងចម្រុះចុះទៅពិនិត្យ និងវាស់វែងទីតាំងដីជាក់ស្តែងដែលមានទំនាស់វិវាទដីធ្លីនៅឃុំតាឡាវ ដើម្បីស្វែងរកដំណោះ ស្រាយសមស្រប និងណែនាំឲ្យភាគីពាក់ព័ន្ធបញ្ឈប់សកម្មភាពកាប់រានដីបន្តទៀត។ ការចុះអនុវត្តការងារនេះ ធ្វើឡើងតាមការណែនាំផ្ទាល់ពីលោក ញ៉ែម សំអឿន អភិបាលខេត្តរតនគិរី និងជាប្រធានគណៈកម្មាការគ្រប់គ្រង ដីរដ្ឋថ្នាក់ខេត្ត។

ប្រតិបត្តិការចុះដោះស្រាយវិវាទនេះ ត្រូវបានដឹកនាំដោយលោក មាស សារ៉េត អភិបាលស្រុកអណ្តូងមាស ដោយមានការចូលរួមពីមន្ត្រីជំនាញ កម្លាំងសមត្ថកិច្ច និងអាជ្ញាធរឃុំតាឡាវ។ គោលបំណងសំខាន់គឺដើម្បីពិនិត្យ និងវាយតម្លៃលើករណីវិវាទដីធ្លីរវាងប្រជាពលរដ្ឋភូមិកាណាត ឃុំតាឡាវ ស្រុកអណ្តូងមាស ជាមួយលោក ហង្ស សាវីន ភេទប្រុស អាយុ ៣៩ឆ្នាំ ជនជាតិខ្មែរ ដែលមានទីលំនៅបច្ចុប្បន្នភូមិត្រពាំងឈូក សង្កាត់ទឹកថ្លា ខណ្ឌសែនសុខ រាជធានីភ្នំពេញ។ ទីតាំងដីដែលមានទំនាស់នេះ មានទំហំសរុបប្រមាណ ១៥២,៣៩០ ម៉ែត្រការ៉េ ឬជាង ១៥ ហិកតា ដោយមានទទឹង ២០៥ ម៉ែត្រ និងបណ្តោយ ៧៤៦ ម៉ែត្រ ដែលស្ថិតនៅក្នុងភូមិកាណាត ឃុំតាឡាវ ស្រុកអណ្តូងមាស។

ក្នុងអំឡុងពេលចុះពិនិត្យ និងវាស់វែង ក្រុមការងារថ្នាក់ខេត្ត ថ្នាក់ស្រុក រួមទាំងអាជ្ញាធរឃុំតាឡាវ បានប្រមូលព័ត៌មាន និងស្តាប់ការបំភ្លឺពីភាគីទាំងសងខាង ដើម្បីស្វែងយល់ពីឫសគល់នៃបញ្ហា។ វិវាទនេះបានកើតឡើង ដោយសារសកម្មភាពកាប់រានពង្រីកដីនៅត្រង់ចំណុចព្រៃអារក្ស ភ្នំចែង ដែលជាតំបន់រសើប និងមានការទាមទារពីប្រជាពលរដ្ឋក្នុងភូមិកាណាត។ ការអន្តរាគមន៍របស់អាជ្ញាធរគឺមានសារៈសំខាន់ណាស់ ដើម្បីធានាបាននូវសន្តិសុខ សណ្តាប់ធ្នាប់សាធារណៈ និងការពារផលប្រយោជន៍ស្របច្បាប់របស់ប្រជាពលរដ្ឋ។

ជាលទ្ធផល នៃការចុះពិនិត្យ និងពិភាក្សា ក្រុមការងារបានឯកភាពគ្នាឲ្យលោក សៀក សីហា ភេទប្រុស អាយុ ២៨ឆ្នាំ ដែលមានតួនាទីជាមេការរបស់លោក ហង្ស សាវីន ម្ចាស់ដី ធ្វើកិច្ចសន្យាចំពោះមុខសមត្ថកិច្ច។ ខ្លឹមសារនៃកិច្ចសន្យានេះ គឺតម្រូវឲ្យផ្អាករាល់សកម្មភាពកាប់រានពង្រីកដីដែលពាក់ព័ន្ធជាមួយនឹងប្រជាពលរដ្ឋភូមិកាណាតត្រង់ចំណុចព្រៃអារក្ស ភ្នំចែង ចាប់ពីពេលនេះតទៅ រហូតដល់មានដំណោះស្រាយចុងក្រោយ នៅពេលក្រោយ។ ចំណែកឯដីទំហំ ១៥ ហិកតាដែលមិនមានទំនាស់ ត្រូវបានអនុញ្ញាតឲ្យប្រើប្រាស់អាស្រ័យផលតាមធម្មតា។

ការសម្រេចចិត្តនេះ គឺជាជំហានដំបូងដ៏សំខាន់មួយក្នុងការដោះស្រាយវិវាទដីធ្លីដ៏ស្មុគស្មាញនេះ ប្រកបដោយតម្លាភាព និងយុត្តិធម៌។ អាជ្ញាធរខេត្ត និងស្រុកប្តេជ្ញាបន្តតាមដាន និងសម្របសម្រួលរហូតដល់បញ្ហា ត្រូវបានដោះស្រាយចប់សព្វគ្រប់ ដើម្បីធានាថាប្រជាពលរដ្ឋគ្រប់រូបទទួលបាននូវសិទ្ធិ និងផលប្រយោជន៍ស្របច្បាប់របស់ខ្លួន ព្រមទាំងរក្សាបាននូវសុខដុមរមនាក្នុងសហគមន៍។ ករណីនេះក៏ជាការរំលឹកដល់សាធារណជន អំពីសារៈសំខាន់នៃការគោរពច្បាប់ភូមិបាល និងការជៀសវាងសកម្មភាពដែលនាំឲ្យមានទំនាស់ដីធ្លី ដែលអាចបង្កផលវិបាកដល់សន្តិភាពសង្គម៕