(ភ្នំពេញ)៖ ឧត្តមសេនីយ៍ឯក ហោ សំអាត អគ្គនាយក នៃអគ្គនាយកដ្ឋានបច្ចេកវិទ្យាឌីជីថល និងផ្សព្វផ្សាយអប់រំ នៃក្រសួងមហាផ្ទៃ បានគូសបញ្ជាក់ថា វិជ្ជាជីវៈសារព័ត៌មាន ត្រូវបានចាត់ទុកជាផ្នែកដ៏សំខាន់មិនអាចខ្វះបានក្នុងស្ថាប័ន ឬអង្គភាពមួយ ដើម្បីផ្សារភ្ជាប់ទំនាក់ទំនងជាមួយសាធារណមតិ ដើម្បីលើកកម្ពស់កិត្យានុភាពរបស់អង្គភាព និងប្រសិទ្ធភាពការងារផ្សព្វផ្សាយអប់រំ។

ឧត្តមសេនីយ៍ឯក ហោ សំអាត លេីកឡេីងបែបនេះ ធ្វើ នាឱកាសអញ្ជើញជាអធិបតីក្នុងពិធីបើក «វគ្គបណ្តុះបណ្តាលមន្ត្រីសារព័ត៌មាន លើកទី២» នៅថ្ងៃទី៦ ខែកក្កដា ឆ្នាំ២០២៦ នេះដោយមានការអញ្ជើញចូលរួមពី អគ្គនាយករង ប្រធាននាយកដ្ឋាន ប្រធានស្ថានីយ៍ គ្រូឧទ្ទេស និងសិក្ខាកាម នៅទីស្ដីការក្រសួងមហាផ្ទៃ។

ឧត្តមសេនីយ៍ឯក ហោ សំអាត បានបន្ដថា ពិតណាស់ថា វិជ្ជាជីវៈសារព័ត៌មាន ជាវិជ្ជាជីវៈឯករាជ្យមួយ ក៏ប៉ុន្តែវិជ្ជាជីវៈនេះបានក្លាយជាអំណាចទី៤ និងក្លាយជាអាវុធយុទ្ធសាស្ត្រលើសង្គ្រាមចិត្តសាស្ត្រដ៏សំខាន់សម្រាប់សង្គម និងមនុស្សជាតិទាំងអស់លើភពផែនដី។

ឧត្តមសេនីយ៍ឯក អគ្គនាយក បន្ថែមថា «ដោយសារសារៈសំខាន់ទាំងអស់ខាងលើនេះហើយ ទើបទាមទារឲ្យអ្នកសារព័ត៌មានមានភាពឆ្លាតវៃ និងមានភាពបត់បែនក្នុងការអនុវត្តនូវតួនាទី» ភារកិច្ចរបស់ខ្លួនឲ្យទទួលបានជោគជ័យជាអតិបរមា៕