(ភ្នំពេញ)៖ លោក អ៊ឹង ឌីប៉ូឡា អគ្គនាយកនៃអគ្គនាយកដ្ឋានធនធានរ៉ែ និងជាអ្នកនាំពាក្យក្រសួងរ៉ែ និងថាមពល បានបញ្ជាក់ឲ្យដឹងថា គិតត្រឹម៦ខែ ដើមឆ្នាំ២០២៦ ចំណូលសួយសារប្រមូលពីវិស័យរ៉ែ បានជាង៩០លានដុល្លារ ខណៈចំណូលពីពន្ធនាំចេញ និងពន្ធដារផ្សេងៗ ប្រមូលបានប្រហែល ១៥០លានដុល្លារបន្ថែមទៀត។

ការបញ្ជាក់ឲ្យដឹងបែបនេះ របស់លោក អ៊ឹង ឌីប៉ូឡា ធ្វើឡើងក្នុងសន្និសីទសារព័ត៌មាន ស្ដីពីករណីហិង្សារវាងប្រជានេសាទ និងក្រុមហ៊ុនបូមខ្សាច់ នៅក្នុងមូលដ្ឋានព្រំប្រទល់ខេត្តព្រៃវែង និងខេត្តកណ្ដាល។ សន្និសីទនេះ ធ្វើឡើងនៅទីស្ដីការក្រសួងរ៉ែ និងថាមពល នារសៀលថ្ងៃទី៥ ខែកក្កដា ឆ្នាំ២០២៦។

លោក អ៊ឹង ឌីប៉ូឡា បានបញ្ជាក់យ៉ាងដូច្នេះថា «ចំណូលពីវិស័យរ៉ែ ខ្ញុំនិយាយតែចំណូលរឿងសួយសារទេ [...] ខ្ញុំសូមជូនជាតួលេខត្រឹមរយៈពេល៦ខែ យើងប្រមូលបានប្រមាណ៩៣លានដុល្លារ»។

បន្ថែមពីនោះទៀត លោក អ៊ឹង ឌីប៉ូឡា បានឲ្យដឹងថា រយៈពេល៦ខែ ដើមឆ្នាំ២០២៦នេះ ក្រសួងក៏បានទទួលផងដែរ នូវចំណូលពន្ធនាំចេញ ក៏ដូចជាចំណូលពន្ធដារ ដែលចំណូលទាំងពីរនេះ បូកចូលគ្នាប្រហែលជា១៥០លានដុល្លារ។

លោក អ៊ឹង ឌីប៉ូឡា បានលើកឡើងថា ចំណូលនៅក្នុងវិស័យរ៉ែ រដ្ឋបានទទួលច្រើន ហើយវិស័យរ៉ែ បានបង្កើតការងារ បានជាង១.២ម៉ឺននាក់ ក្នុងនោះស្ត្រី៧ភាគរយ ដែលបម្រើការនៅក្នុងវិស័យរ៉ែ ដែលចូលទៅក្នុងស្តង់ដារអន្តរជាតិ៕