(ភ្នំពេញ)៖ លោក អ៉ឹង ឌីប៉ូឡា អគ្គនាយកនៃអគ្គនាយកដ្ឋានធនធានរ៉ែ និងជាអ្នកនាំពាក្យក្រសួងរ៉ែ និងថាមពល បានថ្លែងស្នើឱ្យប្រជាពលរដ្ឋប្តឹងទៅអាជ្ញាធរដែនដីដែលនៅក្បែរខ្លួន ប្តឹងទៅមន្ទីររ៉ែ និងថាមពល និងអាចប្តឹងទៅក្រសួងរ៉ែ តាមរយៈ Hotline 095 727 727 និងតាមរយៈបណ្តាញសង្គមផ្សេងៗ បើសិនសង្ស័យថា មានក្រុមហ៊ុនធ្វើអាជីវកម្មរ៉ែណាធ្វើល្មើសច្បាប់ តែហាមដាច់ខាតកុំប្រើអំពើហិង្សា។

នៅក្នុងសន្និសីទសារព័ត៌មានស្ដីពីករណីហិង្សារវាងប្រជានេសាទ និងក្រុមហ៊ុនបូមខ្សាច់ នៅក្នុងមូលដ្ឋានព្រំប្រទល់ខេត្តព្រៃវែង និងខេត្តកណ្ដាល នៅរសៀលថ្ងៃទី៥ ខែកក្កដា ឆ្នាំ២០២៦ លោក អ៉ឹង ឌីប៉ូឡា បានថ្លែងបញ្ជាក់ថា ​ក្រសួងរ៉ែ បានដាក់គោលការច្បាស់ណាស់, ក្នុងនាមជាសេនាធិការឲ្យរាជរដ្ឋាភិបាល ក្រសួងរ៉ែ និងថាមពល បានគិតណាស់លើវិស័យរ៉ែ គឺគិតពីផលប៉ះពាល់សង្គម បរិស្ថាន គិតពីការអភិវឌ្ឍ ការអភិរក្ស គិតពីសុខសុវត្ថិភាពមិនថាសុខសុវត្ថិភាពរបស់កម្មករកម្មការិនីនោះទេ គឺគិតដល់ប្រជាពលរដ្ឋដែលរស់នៅជុំវិញ ហើយការធ្វើរ៉ែគឺប្រមូលចំណូលចូលជាតិ ដើម្បីអភិវឌ្ឍប្រទេសជាតិ, យើងមិនធ្វើអ្វីមួយដើម្បីឱ្យប្រជាពលរដ្ឋទឹកភ្នែក ទឹកសំបោរ និងរស់នៅក្នុងក្តីបារម្ភនោះទេ។

ស្របជាមួយគ្នានោះលោក អ៉ឹង ឌីប៉ូឡា ក៏បានថ្លែងទៀតថា «ឆ្លៀតក្នុងឱកាសនេះដែរក៏សុំវិញដែរ សុំឱ្យប្រជាពលរដ្ឋប្តឹងមក ប្តឹងមកអាជ្ញាធរដែនដីដែលនៅក្បែរខ្លួន ប្តឹងមកមន្ទីររ៉ែ និងថាមពល ដែលគាត់នៅខេត្តនោះស្រាប់ ប្តឹងមកក្រសួងតាមរយៈ HotLine និងតាមរយៈបណ្តាញសង្គមផ្សេងៗ សូមអញ្ជើញប្តឹងមកបើមានមន្ទិលសង្ស័យថា អាជីវករណាមួយ ក្រុមហ៊ុនរ៉ែណាមួយបានធ្វើល្មើសច្បាប់ ក៏ប៉ុន្តែសុំអង្វរកុំប្រើអំពើហិង្សា»។

សូមបញ្ជាក់ថា កាលពីពេលថ្មីៗកន្លងទៅនេះ មានករណីហិង្សារវាងប្រជានេសាទ និងក្រុមហ៊ុនបូមខ្សាច់ នៅព្រំប្រទល់ខេត្តព្រៃវែង និងខេត្តកណ្ដាល ដែលជម្លោះនេះបានផ្ទុះឡើងបន្ទាប់ពីប្រជានេសាទបានអះអាងថា សកម្មភាពបូមខ្សាច់បានបង្កឱ្យបាក់ច្រាំងទន្លេ ប៉ះពាល់ដល់ផ្ទះសម្បែង និងរំខានដល់ការរស់នៅប្រចាំថ្ងៃរបស់ពួកគាត់។

ជាការឆ្លើយតប នៅថ្ងៃទី៤ ខែកក្កដា ឆ្នាំ២០២៦ មន្ត្រីជាន់ខ្ពស់ក្រសួងរ៉ែ និងថាមពល និងលោក សួន សុម៉ាលីន អភិបាលខេត្តព្រៃវែង ក៏បានចុះទៅដោះស្រាយបញ្ហាដោយផ្ទាល់ នៅសាលាស្រុកពាមរក៍។ ទោះបីក្រុមហ៊ុនបូមខ្សាច់អះអាងថា មានអាជ្ញាបណ្ណត្រឹមត្រូវក៏ដោយ ក៏ប្រជាពលរដ្ឋនៅតែស្នើសុំឱ្យមន្ត្រីជំនាញ និងអាជ្ញាធរមូលដ្ឋានតាមដាន និងចុះពិនិត្យជាប្រចាំ៕