(ភ្នំពេញ)៖ ការតេស្តទទួលស្គាល់ជំនាញពីមុន (RPL) របស់ក្រសួងការងារ ជាកម្មវិធីមួយដែលរៀបចំឡើងដោយ ក្រសួងការងារ និងបណ្តុះបណ្តាលវិជ្ជាជីវៈ ដើម្បីទទួលស្គាល់ចំណេះដឹង ជំនាញ និងបទពិសោធន៍ការងារដែលមានស្រាប់របស់បេក្ខជន ឱ្យក្លាយជាវិញ្ញាបនបត្រជាតិផ្លូវការ។

កម្មវិធីនេះមានគោលបំណងសំខាន់ក្នុងការបង្កើនឱកាសការងារ និងលើកកម្ពស់ប្រាក់ចំណូលសម្រាប់អតីតពលករខ្មែរ ជាពិសេសអ្នកដែលបានត្រឡប់មកពីប្រទេសថៃ និងធ្លាប់មានបទពិសោធន៍ការងារ។

អតីតពលករ ២រូប ដែលធ្លាប់បានចំណាកស្រុកទៅធ្វើការនៅប្រទេសថៃ បានបង្ហាញចំណាប់អារម្មណ៍ត្រេកអរចំពោះការយកចិត្តរបស់រាជរដ្ឋាភិបាល ក្នុងការបើកឱកាសជូនពួកគាត់អាចស្វែងរកការងារដែលមានប្រាក់ឈ្មួលខ្ពស់ជាងមុន តាមរយៈវិញ្ញាបនបត្របញ្ជាក់ជំនាញដែលមានពីមុន។

ជាមួយគ្នានេះ វិស័យឯកជន បានលើកទឹកចិត្តដល់បងប្អូនអតីតពលករ មកចូលរួមធ្វើតេស្តទទួលស្គាល់ជំនាញឱ្យបានច្បាស់លាស់ ដើម្បីបង្កើនទំនុកចិត្ដដល់និយោជកក្នុងការជ្រើសរើសបុគ្គលិក។

ចំពោះការចុះឈ្មោះ អតីតពលករអាចចុះឈ្មោះធ្វើតេស្ត RPL បានតាម ៤ វិធី រួមមាន៖ ចុះឈ្មោះដោយផ្ទាល់នៅមជ្ឈមណ្ឌលវាយតម្លៃសមត្ថភាពទាំង ៩ កន្លែង ឬចុះឈ្មោះតាមប្រព័ន្ធអនឡាញតាមអាសយដ្ឋាន https://erpl.mlvt.gov.kh៕