(ភ្នំពេញ)៖ លោក ហាក់ ម៉ុងហួត អភិបាលស្រុកតាំងគោក នៅថ្ងៃទី០៦ ខែកក្កដា ឆ្នាំ២០២៦នេះ បានដឹកនាំកិច្ចប្រជុំគណៈបញ្ជាការឯកភាពរដ្ឋបាលស្រុក ដើម្បីពិនិត្យ និងវាយតម្លៃលើស្ថានភាពសន្តិសុខ សណ្តាប់ធ្នាប់សាធារណៈ និងការងារអភិវឌ្ឍន៍នានាក្នុងមូលដ្ឋានស្រុក ដោយមានការចូលរួមពីលោកអភិបាលរងស្រុក លោកមេបញ្ជាការកងរាជអាវុធហត្ថស្រុក លោកអធិការនគរបាលស្រុក ប្រធានការិយាល័យជុំវិញស្រុក មេឃុំ មេប៉ុស្តិ៍ និងការិយាល័យជំនាញជាច្រើនរូបទៀត។

គោលបំណងសំខាន់នៃកិច្ចប្រជុំនេះគឺដើម្បីពង្រឹងយន្តការសហការ និងសម្របសម្រួលការងាររវាងកម្លាំងមានសមត្ថកិច្ច និងអាជ្ញាធរមូលដ្ឋាន ក្នុងការធានាសុវត្ថិភាពជូនប្រជាពលរដ្ឋ និងជំរុញការអនុវត្តគោលនយោបាយ ភូមិ ឃុំ សង្កាត់ មានសុវត្ថិភាពឱ្យកាន់តែមានប្រសិទ្ធភាព។ ក្នុងរបៀបវារៈកិច្ចប្រជុំ ក៏បានពិភាក្សាលម្អិតអំពីលទ្ធផលការងារដែលសម្រេចបានកន្លងមក ក៏ដូចជាបញ្ហាប្រឈមនានាដែលកើតមានឡើងក្នុងដែនសមត្ថកិច្ចរបស់ខ្លួន។

នាឱកាសនោះលោក ហាក់ ម៉ុងហួត បានគូសបញ្ជាក់ថា សន្តិសុខ សណ្តាប់ធ្នាប់សាធារណៈ និងសុវត្ថិភាពសង្គម គឺជាកត្តាចាំបាច់សម្រាប់ធានាដល់ការរស់នៅប្រកបដោយភាពសុខដុមរមនា និងការអភិវឌ្ឍរីកចម្រើនរបស់មូលដ្ឋាន ដោយលោកបានកោតសរសើរចំពោះកិច្ចខិតខំប្រឹងប្រែងរបស់កងកម្លាំងមានសមត្ថកិច្ច និងអាជ្ញាធរមូលដ្ឋានទាំងអស់ ដែលបានលះបង់កម្លាំងកាយចិត្តក្នុងការថែរក្សាសន្តិភាព និងទប់ស្កាត់បទល្មើសគ្រប់ប្រភេទ។

ទន្ទឹមនឹងនេះលោកក៏បានណែនាំឱ្យបន្តយកចិត្តទុកដាក់ខ្ពស់លើការងារល្បាត ការបង្ក្រាបបទល្មើសគ្រឿងញៀន ល្បែងស៊ីសង និងបទល្មើសចោរកម្ម ដែលជាក្តីកង្វល់របស់ប្រជាពលរដ្ឋ ពិសេសជាងនេះទៅទៀត គឺការត្រួតពិនិត្យ និងអនុវត្តច្បាប់ចរាចរណ៍ផ្លូវគោក ដើម្បីកាត់បន្ថយគ្រោះថ្នាក់ចរាចរណ៍ដែលតែងតែកើតមានឡើង។

ជាមួយគ្នានោះលោកអភិបាលស្រុក ហាក់ ម៉ុងហួត ក៏បានសង្កត់ធ្ងន់លើសារៈសំខាន់នៃការផ្តល់សេវាសាធារណៈជូនប្រជាពលរដ្ឋឱ្យបានទាន់ពេលវេលា ប្រកបដោយតម្លាភាព និងគណនេយ្យភាព ដោយបានអះអាងថា អាជ្ញាធរមូលដ្ឋានត្រូវតែជាអ្នកបម្រើប្រជាពលរដ្ឋពិតប្រាកដ និងត្រូវឆ្លើយតបទៅនឹងសំណូមពរ និងកង្វល់របស់ពួកគាត់ដោយយកចិត្តទុកដាក់។

បន្ថែមពីនេះលោកអភិបាលស្រុក បានជំរុញឱ្យគ្រប់ភាគីពាក់ព័ន្ធទាំងអស់ បន្តពង្រឹងកិច្ចសហការ និងសាមគ្គីភាពផ្ទៃក្នុងឱ្យកាន់តែរឹងមាំ ដើម្បីសម្រេចបាននូវគោលដៅរួម គឺការធានាសន្តិសុខ សណ្តាប់ធ្នាប់សាធារណៈ និងការអភិវឌ្ឍមូលដ្ឋានប្រកបដោយចីរភាព។ លោកបានសង្ឃឹមយ៉ាងមុតមាំថា តាមរយៈកិច្ចប្រជុំគណៈបញ្ជាការឯកភាពនេះ ការងារគ្រប់គ្រងរដ្ឋបាលស្រុកនឹងកាន់តែមានប្រសិទ្ធភាពខ្ពស់ ឆ្លើយតបទៅនឹងតម្រូវការជាក់ស្តែងរបស់ប្រជាពលរដ្ឋ និងចូលរួមចំណែកក្នុងការកសាងសង្គមជាតិឱ្យកាន់តែរីកចម្រើន៕