(កណ្តាល)៖ បេក្ខជន និងសកម្មជនចំនួន ១២៤ នាក់ របស់គណបក្សភ្លើងទៀន នៅខេត្តកណ្ដាល បានប្រកាសផ្ដាច់ខ្លួនជាផ្លូវការពីគណបក្សប្រឆាំង និងបានគោរពស្នើសុំចូលរួមជីវភាពនយោបាយជាមួយគណបក្សប្រជាជនកម្ពុជា។ ការសម្រេចចិត្តដ៏សំខាន់នេះ បានធ្វើឡើងនៅថ្ងៃទី៦ ខែកក្កដា ឆ្នាំ២០២៦ ដោយមានការចូលរួមពីសមាជិកគណបក្សភ្លើងទៀន ២០ នាក់ មកពីសង្កាត់រការខ្ពស់ ក្រុងតាខ្មៅ និង ១០៤ នាក់ មកពីឃុំឃ្វាំង ស្រុកពញាឮ ខេត្តកណ្ដាល។

លោកបណ្ឌិត ទុយ ប៉ោហេង និងលោក បាន រតនា ដែលជាសមាជិកការងារចលនាកសាងសមាជិកគណបក្សប្រជាជននៅមូលដ្ឋានខេត្ត បានបញ្ជាក់ថា ការផ្ដល់ភាពកក់ក្ដៅ និងការយកចិត្តទុកដាក់ពីលោក គួច ចំរើន ប្រធានគណៈកម្មាធិការគណបក្សខេត្ត បានជំរុញឱ្យបេក្ខជន និងសកម្មជនគណបក្សនយោបាយនានានៅខេត្តកណ្ដាល សម្រេចចិត្តចុះចូលរួមជីវភាពនយោបាយជាមួយគណបក្សប្រជាជនកម្ពុជា។ នៅថ្ងៃជាមួយគ្នានេះ លោក ស៊ុយ ឆៃលាង ប្រធានក្រុមការងារចលនាកសាងសមាជិកគណបក្សប្រជាជនកម្ពុជាចុះមូលដ្ឋានខេត្តកណ្ដាល រួមជាមួយក្រុមការងារ បានចុះជួបផ្ទាល់ជាមួយបងប្អូនដែលមកពីគណបក្សប្រឆាំងទាំងនេះ នៅក្រុងតាខ្មៅ និងស្រុកពញាឮ ខេត្តកណ្ដាល។

លោកបណ្ឌិត ទុយ ប៉ោហេង បានបន្តថា ក្រុមសកម្មជនទាំងនេះបានប្រកាសឈប់មានទំនាក់ទំនងជាមួយបក្សប្រឆាំងបន្តទៀតហើយ បន្ទាប់ពីបានមើលឃើញយ៉ាងច្បាស់ថា សកម្មភាពនយោបាយរបស់បក្សប្រឆាំងពុំបានរួមចំណែកជួយដល់ជាតិ និងប្រជាជននោះឡើយ។ ពួកគេបានបង្ហាញពីការយល់ដឹងកាន់តែស៊ីជម្រៅអំពីតួនាទី និងគុណបំណាច់របស់គណបក្សប្រជាជនកម្ពុជា។ ទន្ទឹមនឹងការប្រកាសបញ្ឈប់ទំនាក់ទំនងជាមួយបក្សប្រឆាំង ពួកគេក៏បានសុំការអនុគ្រោះពីសម្ដេចតេជោ ហ៊ុន សែន ប្រធានគណបក្សប្រជាជនកម្ពុជា ដើម្បីទទួលបានឱកាសរួមរស់ និងធ្វើសកម្មភាពនយោបាយជាមួយគណបក្សប្រជាជនកម្ពុជា។

ក្រុមសកម្មជនទាំង ១២៤ នាក់ បានអះអាងថា ពួកគេបានមើលឃើញយ៉ាងច្បាស់ដោយឥតសង្ស័យថា គណបក្សប្រជាជនកម្ពុជា គឺជាបក្សនយោបាយតែមួយគត់ ដែលមានគុណបំណាច់ដ៏ធំធេងសម្រាប់ជាតិ និងប្រជាជនកម្ពុជា។ ជាពិសេស សម្ដេចតេជោ ហ៊ុន សែន ត្រូវបានគេចាត់ទុកជាមេដឹកនាំដ៏ខ្លាំងពូកែ ដែលបានប្រឹងប្រែងរំដោះអាយុជីវិតជាតិ និងប្រជាជនពីរបបប្រល័យពូជសាសន៍នាថ្ងៃទី៧ ខែមករា ឆ្នាំ១៩៧៩។ សម្ដេចតេជោ បានយកជីវិតធ្វើដើមទុន ដើម្បីបញ្ចប់សង្គ្រាម ហើយឈានដល់ការបង្រួបបង្រួមជាតិ និងកសាងជាតិឱ្យរីកចម្រើនដូចពេលបច្ចុប្បន្ន។

លើសពីនេះ ក្រុមសកម្មជនទាំងអស់បានមើលឃើញទៀតថា គណបក្សប្រជាជនកម្ពុជា ជាគណបក្សដែលមានគោលនយោបាយច្បាស់លាស់ក្នុងការដឹកនាំជាតិ និងកសាងជាតិឆ្ពោះទៅរកភាពរុងរឿង។ គណបក្សប្រជាជនកម្ពុជា គឺជាបង្អែក និងជាទីទុកចិត្តរបស់ប្រជាពលរដ្ឋ ក្នុងការធានារក្សាបានសុខសន្តិភាព និងស្ថិរភាពសង្គម ដែលជាលក្ខខណ្ឌដ៏ចាំបាច់សម្រាប់ធានាការរស់នៅប្រកបដោយភាពរីករាយរបស់ប្រជាពលរដ្ឋគ្រប់រូប។

ជាមួយគ្នានេះ ពួកគេក៏បានធ្វើការអំពាវនាវដល់អ្នកបម្រើបក្សប្រឆាំងទាំងអស់ ឱ្យភ្ញាក់រលឹក និងឈប់ចាញ់បោកបក្សប្រឆាំងបន្តទៅទៀត ហើយចូលរួមសកម្មភាពនយោបាយជាមួយគណបក្សប្រជាជនកម្ពុជា ដើម្បីរួមចំណែកកសាងជាតិមាតុភូមិឱ្យកាន់តែរុងរឿង និងរីកចម្រើនទៅមុខ។ ការសម្រេចចិត្តរបស់បេក្ខជន និងសកម្មជនទាំង ១២៤ នាក់នេះ គឺជាសញ្ញាមួយដែលបង្ហាញពីការជឿជាក់កាន់តែខ្លាំងឡើងទៅលើភាពដឹកនាំរបស់គណបក្សប្រជាជនកម្ពុជា ក្នុងការធានាអនាគតដ៏ភ្លឺស្វាងសម្រាប់កម្ពុជា៕