(ភ្នំពេញ)៖ ប្រៃសណីយ៍កម្ពុជា បានចុះហត្ថលេខាលើអនុស្សរណៈយោគយល់គ្នា (MOU) រវាងគណៈកម្មាធិការជាតិគ្រប់គ្រងគ្រោះមន្តរាយ (គ.ជ.គ.ម.) និងប្រៃសណីយ៍កម្ពុជា (ប.ក.) «ស្តីពី កិច្ចសហប្រតិបត្តិការលើការងារកាត់បន្ថយហានិភ័យគ្រោះមហន្តរាយ និងការឆ្លើយតបគ្រោះអាសន្ន ក្នុងវិស័យប្រៃសណីយ៍» ក្រោមអធិបតីភាព លោក គីម វីរៈ អនុប្រធាន និងជាអគ្គលេខាធិការនៃគណៈកម្មាធិការជាតិគ្រប់គ្រងគ្រោះមហន្តរាយ និងលោក ថេន សំវិសុទ្ធ អគ្គនាយកប្រៃសណីយ៍កម្ពុជា នារសៀលថ្ងៃទី០៣ ខែកក្កដា ឆ្នាំ២០២៦។

លោក ថេន សំវិសុទ្ធ បានថ្លែងថា ជាធម្មតានៅពេលដែលសាធារណៈជននឹកឃើញដល់ «ប្រៃសណីយ៍កម្ពុជា» ពួកគាត់តែងតែគិតដល់ការផ្ញើសំបុត្រ ការបញ្ជូនបញ្ញើ និងការធ្វើពាណិជ្ជកម្ម។ ប៉ុន្តែតាមពិតទៅតួនាទីស្នូលរបស់ប្រៃសណីយ៍កម្ពុជាគឺ «ការភ្ជាប់ទំនាក់ទំនង»។ ប្រៃសណីយ៍កម្ពុជាជាបណ្តាញទំនាក់ទំនងរបស់ជាតិគួរឱ្យទុកចិត្តបាន ដែលបានចាក់ឫសយ៉ាងជ្រៅ និងផ្សាភ្ជាប់យ៉ាងជិតស្និទ្ធទៅនឹងជីវភាពរបស់ប្រចាំថ្ងៃរបស់ប្រជាពលរដ្ឋគ្រប់រាជធានី ខេត្ត ទូទាំងព្រះរាជាណាចក្រកម្ពុជា ចាប់តាំងពីទីក្រុងរហូតដល់សហគមន៍ដាច់ស្រយាលបំផុត។

លោក ថេន សំវិសុទ្ធ បានបន្ដថា យើងមានមោទនាភាពយ៉ាងក្រៃលែង ក្នុងការបោះជំហានទៅមុខប្រកបដោយការតាំងចិត្ត តាមរយៈការទាញយកប្រយោជន៍ ពីបណ្តាញទំនាក់ទំនងសម្រាប់គោលបំណងដ៏ខ្ពង់ខ្ពស់នោះគឺ «ភាពធន់របស់ជាតិ សុវត្ថិភាព និងការត្រៀមលក្ខណៈបង្ការគ្រោះមហន្តរាយ»។ នៅក្នុងបរិបទនៃការប្រែប្រួល អាកាសធាតុសកល បញ្ហាប្រឈមរបស់យើងកាន់តែមានភាពស្មុគស្មាញ។

គ្រោះមហន្តរាយធម្មជាតិ ដូចជាទឹកជំនន់ និងហានិភ័យផ្សេងៗ មិនរង់ចាំយើងឡើយ។ កត្តានេះទាមទារឱ្យយើងត្រៀមលក្ខណៈជាមុន និងមានការសហការគ្នាយ៉ាងសកម្មពីគ្រប់វិស័យ។ ម្យ៉ាងវិញទៀត កិច្ចសហប្រត្តិបត្តិការនេះ ឆ្លើយតបដោយផ្ទាល់ ជាមួយនឹងការប្តេជ្ញាចិត្តរបស់ប្រៃសណីយ៍កម្ពុជា ស្របតាមក្របខ័ណ្ឌគ្រប់គ្រងហានិភ័យគ្រោះមហន្តរាយ របស់សហភាពប្រៃសណីយ៍សកល (UPU DRM Framework)។ នេះជាការបញ្ជាក់បន្ថែម របស់លោក ថេន សំវិសុទ្ធ។

តាមរយៈអនុស្សារណៈនៃការយោគយល់នេះ ប្រៃសណីយ៍កម្ពុជា មានមោទនភាពក្នុងការចូលរួម និងបញ្ចេញអស់សមត្ថភាពជាមួយនិងធនធានមនុស្ស និងសម្ភារៈទាំងឡាយរបស់ប្រៃសណីយ៍កម្ពុជា ដើម្បីគាំទ្រដល់ទិសដៅអាទិភាពជាតិរបស់គណៈកម្មាធិការជាតិគ្រប់គ្រងគ្រោះមន្តរាយ ក្នុងការត្រៀមលក្ខណៈបង្ការ ការផ្សព្វផ្សាយដំណឹងព្រមានជាមុន និងការឆ្លើយតបបានទាន់ពេលវេលា។

លោក ថេន សំវិសុទ្ធ បានបញ្ជាក់បន្ថែមទៀតថា តាមរយៈកិច្ចសហការនេះ ប្រៃសណីយ៍កម្ពុជា និងគណៈកម្មាធិការជាតិគ្រប់គ្រងគ្រោះមន្តរាយ កំពុងផ្ញើសារយ៉ាងច្បាស់លាស់មួយ ជូនដល់ប្រជាជនកម្ពុជាថា «យើងបានត្រៀមខ្លួនរួចជាស្រេច យើងរួបរួមគ្នា ហើយយើងកំពុងធ្វើការជាមួយគ្នា ដើម្បីការពារអនាគតរបស់អ្នក»។

លោក គីម វីរៈ បានថ្លែងថា ការចុះអនុស្សារណៈនៃការយោគយល់គ្នានេះ គឺជាសក្ខីភាពនៃការឆ្លុះបញ្ចាំង ពីការប្តេជ្ញាចិត្តយ៉ាងមុតមាំ និងជាជំហ៊ានយុទ្ធសាស្ត្រថ្មីមួយទៀត ក្នុងការរួមចំណែកកាត់បន្ថយផលប៉ះពាល់ពីការប្រែប្រួលអាកាសធាតុ និងគ្រោះមហន្តរាយនានា។ គណៈកម្មាធិការជាតិគ្រប់គ្រងគ្រោះមន្តរាយ គឺជាសេនាធិការរបស់រាជរដ្ឋាភិបាល ក្នុងការដឹកនាំសម្របសម្រួល និងគ្រប់គ្រងការងារគ្រោះមហន្តរាយនៅកម្ពុជា ស្របតាមទស្សនៈវិស័យរបស់រាជរដ្ឋាភិបាល នីតិកាលទី៧ នៃរដ្ឋសភា។

ការងារគ្រប់គ្រងគ្រោះមហន្តរាយតម្រូវឱ្យមានការចូលរួមពីគ្រប់វិស័យពាក់ព័ន្ធ។ ការចុះហត្ថលេខាលើអនុស្សារណៈនៃការយោគយល់នេះ នឹងរួមចំណែកយ៉ាងធំធេង លើកកម្ពស់ការងារកាត់បន្ថយហានិភ័យគ្រោះមហន្តរាយ ដោយសារប្រៃសណីយ៍កម្ពុជាមានឧត្តមភាពខាងបណ្តាញប្រត្តិបត្តិការគ្របដណ្តប់ទូទាំងប្រទេស និងមានលទ្ធភាពខ្ពស់ចូលទៅដល់សហគមន៍ដាច់ស្រយាល ទោះបីជាស្ថិតក្នុងស្ថានភាពវិបត្ត ឬគ្រោះអាសន្នក៏ដោយ។

អនុស្សារណៈនៃការយោគយល់គ្នានេះ នឹងចាប់ផ្តើមកិច្ចសហប្រត្តិបត្តិការជាក់ស្តែង និងស៊ីជម្រៅដោយផ្តោតលើកិច្ចការសំខាន់ៗចំនួន ៥ រួមមាន៖
១៖ ការចែករំលែកព័ត៌មាន៖ យើងមានប្រព័ន្ធដោះដូរព័ត៌មានទាន់ហេតុការ ដើម្បីត្រៀមឆ្លើយតបឱ្យបានរហ័ស។
២៖ ភស្តុរភាកម្ម៖ ប្រៃសណីយ៍កម្ពុជានឹងផ្តល់ទីតាំងឃ្លាំងស្តុកនៅតាមបណ្តាខេត្ត ដើម្បីឱ្យយើងត្រៀមបម្រុងស្បៀង និងសម្ភារៈសង្គ្រោះបានគ្រប់ជ្រុងជ្រោយ។
៣៖ មធ្យោបាយដឹកជញ្ជូន៖ នេះជាចំណុចគន្លឹះដោយប្រៃសណីយ៍កម្ពុជា នឹងផ្តល់អាទិភាពដល់ការបញ្ជូនរថយន្តដឹកទំនិញ ដើម្បីដឹកជញ្ជូនសម្ភារៈសង្គ្រោះបន្ទាន់ទៅកាន់តំបន់រងគ្រោះ។ ៤៖ និរន្តរភាពការងារ៖ យើងនឹងជួបគ្នាផ្នែកបច្ចេកទេស ដើម្បីលើកកម្ពស់និរន្តរភាពអាជីវកម្មទោះបីមានគ្រោះមហន្តរាយកើតឡើង
និង៥៖ ការកសាងសមត្ថភាពៈ យើងនឹងរួមគ្នាដើម្បីពង្រឹងសមត្ថភាពមន្ត្រីឱ្យកាន់តែមានជំនាញច្បាស់លាស់។

តាមរយៈក្របខ័ណ្ឌនៃកិច្ចសហប្រត្តិបត្តិការនេះ យើងមានមោទនភាពក្រៃលែង ដែលវិស័យប្រៃសណីយ៍ត្រូវបានកំណត់តួនាទី «អ្នកឆ្លើយតបលំដាប់ទី២» ដ៏សំខាន់​ ក្នុងប្រត្តិបត្តិការភស្តុភារកម្មមនុស្សធម៌។ សកម្មភាពរួមគ្នានេះ គឺពិតជាឆ្លើយតបយ៉ាងមានសង្គតិភាពទៅនឹង «ផែនការសកម្មភាពជាតិសម្រាប់ កាត់បន្ថយហានិភ័យគ្រោះមហន្តរាយ ២០២៤-២០២៨» របស់រាជរដ្ឋាភិបាលកម្ពុជា៕