(បាត់ដំបង)៖ នៅថ្ងៃទី៦ ខែកក្កដា ឆ្នាំ២០២៦ សាខាកាកបាទ ក្រហមកម្ពុជា ខេត្តបាត់ដំបង សហការជាមួយមន្រ្តីទីស្នាក់ការកណ្តាលកាកបាទក្រហមកម្ពុជា បានបើកវគ្គបណ្តុះបណ្តា លស្តីពី «ការអប់រំអំពីហានិភ័យនៃគ្រាប់មីន សំណល់ជាតិផ្ទុះពីសង្គ្រាម និងប្រតិបត្តិការមនុស្សធម៌ប្រកបដោយសុវត្ថិភាពសម្រាប់បុគ្គលិកនិងអ្នកស្ម័គ្រចិត្ត» ជូនដល់មន្រ្តីប្រតិបត្តិសាខា អនុសាខា និងអ្នកស្ម័គ្រចិត្តកាកបាទក្រហមកម្ពុជា ខេត្តបាត់ដំបង មកពីក្រុង ស្រុក ចំនួន១៤ ក្នុងខេត្តបាត់ដំបង សរុប២៥នាក់ ធ្វើឡើងរយៈ៤ថ្ងៃ ចាប់ពីថ្ងៃទី៦ ដល់ថ្ងៃទី៩ ខែកក្កដា ឆ្នាំ២០២៦។

ពិធីនេះត្រូវបានប្រារព្ធឡើងក្រោមអធិបតីភាពលោក ផេង សិទ្ធី អនុប្រធានអចិន្រ្តៃយ៍គណៈកម្មាធិការសាខាកាកបាទក្រហមកម្ពុជា ខេត្តបាត់ដំបង តំណាងលោក សុខ លូ អភិបាលខេត្ត និងជា ប្រធានគណៈកម្មាធិការសាខាកាកបាទក្រហមកម្ពុជា ខេត្តបាត់ដំបង, លោក ប៊ីស្នុ ម៉ាហាត (Bishnu Mahat) អ្នកជំនាញផ្នែកអាវុធយុទ្ធភណ្ឌ នៃគណៈគម្មាធិការអន្តរជាតិ នៃកាកបាទក្រហម (ICRC) ទទួលបន្ទុកកិច្ចប្រតិបត្តិការមនុស្សធម៌ និងសុវត្ថិភាពអាវុធយុទ្ធភណ្ឌ, លោក មុំ ភិរក្ស នាយករងនាយកដ្ឋានទំនាក់ទំនង នៃទីស្នាក់ការកណ្តាលកាកបាទក្រហមកម្ពុជា ដោយមានការអញ្ជើញចូលរួមពីសំណាក់គ្រូឧទ្ទេសនាមមកពីទីស្នាក់ការកណ្តាល មន្ត្រីប្រតិបត្តិសាខា-អនុសាខា ព្រមទាំងអ្នកស្ម័គ្រចិត្តដែលជាសិក្ខាកាមប្រមាណ ២៥នាក់។

វគ្គបណ្តុះបណ្តាលនេះក្នុងគោលបំណងសំខាន់ដើម្បី ពង្រឹងសមត្ថភាព និងការយល់ដឹងបន្ថែមដល់បុគ្គលិក ក៏ដូចជាអ្នកស្ម័គ្រចិត្តនៅមូលដ្ឋាន យល់ដឹងពីរបៀបបង្ការ និងការពារសុវត្ថិភាពផ្ទាល់ខ្លួនពីគ្រាប់មីន និងសំណល់ជាតិផ្ទុះពីសង្គ្រាម ក្នុងពេលចុះបំពេញបេសកកម្មមនុស្សធម៌និងបង្កើនចំណេះដឹងដើម្បីយកទៅអប់រំ និងផ្សព្វផ្សាយបន្តដល់ប្រជាពលរដ្ឋនៅក្នុងសហគមន៍ ជាពិសេសតំបន់ដែលប្រឈមនឹងហានិភ័យខ្ពស់។

វគ្គបណ្តះបណ្តាលខាងនេះក្រោមការសម្របសម្រួលនិងឧទ្ទេសនាមដោយមន្រ្តីទីស្នាក់ការកណ្តាលកាកបាទក្រហមកម្ពុជា និងក្រុមការងារ ដោយផ្តោចលើប្រធានបទសំខាន់ៗរួមមាន៖ ការផ្សព្វផ្សាយអំពីចលនាកាកបាទក្រហម យល់ដឹងពីគោលការណ៏គ្រឹះ ទាំង៧ របស់ចលនា ច្បាប់មនុស្សធម៌អន្តរជាតិ ,ក្របខណ្ឌបំពេញការងារដោយសុវត្ថិភាព, ផលប៉ះពាល់នៃគ្រាប់យុទ្ធភណ្ឌមិនទាន់ផ្ទុះ និងការសិក្សាពីឥរិយាបថប្រឈមហានិភ័យ, សសរស្តម្ភទាំង៥ នៃសកម្មភាពមីន (រួមមានអនុសញ្ញាអូតាវ៉ា និងគ្រាប់បែកចង្កោម) ការសម្គាល់តំបន់គ្រោះថ្នាក់ និងការអនុវត្តឥរិយាបថសុវត្ថិភាព, ជំនាញនិយាយជាសាធារណៈ សម្រាប់គ្រូបង្គោល,ជំនាញសម្របសម្រួល និងការគ្រប់គ្រងក្រុម,ការអប់រំសុខភាពផ្លូវចិត្ត និងការអនុវត្តន៍ចុះសហគមន៍ជាក់ស្តែងផងដែរ៕