(បរទេស)៖ ២ប្រកួតចុងក្រោយនៃវគ្គ ១៦ក្រុមក្នុងព្រឹត្តិការណ៍ពានរង្វាន់ជើងឯកពិភពលោក FIFA World Cup 2026 នៅពេលម្ចាស់ការពារតំណែងជើងឯកអាហ្សង់ទីន ត្រូវប៉ះអេហ្ស៊ីប លេងម៉ោង ១១យប់ថ្ងៃអង្គារ ទី០៧ ខែកក្កដាមុនគេ (ម៉ោងនៅកម្ពុជា)។

ពពកសដែលមាន Lionel Messi នឹងក្លាយជាក្រុមដំបូងគេមកពីតំបន់អាមេរិកឡាទីន ក្នុងការឆ្ពោះទៅវគ្គ ៨ក្រុម ប្រសិនបើអាចទម្លាក់ក្រុមមកពីតំបន់អាហ្រ្វិក អេហ្ស៊ីប មុនពេលកូឡុំប៊ីដែលមកពីតំបន់ជាមួយគ្នាត្រូវប៉ះស្វីស លេងម៉ោង ៣ទៀបភ្លឺ បន្ទាប់ពីប៉ារ៉ាហ្គាយ និងសាំបាប្រេស៊ីល ហាលអាវដូចគ្នា។

សម្រាប់ឈ្នះទាំង ២ប្រកួតចុងក្រោយនេះដែរ នឹងឡើងទៅប៉ះគ្នាក្នុងវគ្គចាញ់-ធ្លាក់ ៨ក្រុមចុងក្រោយជាបន្តទៀត នៅពេលក្រុមរងជើងឯកកាល World Cup 2022 មាន់គកបារាំងត្រូវប៉ះម៉ារ៉ុក, ន័រវេស ប៉ះអង់គ្លេស និងអេស្ប៉ាញ ប៉ះប៊ែលហ្ស៊ិក ចាប់ពីថ្ងៃទី១០-១២ ខែកក្កដា ឆ្នាំ២០២៦។

គិតមកទល់ពេលនេះ មានក្រុមមកតែ ២តំបន់ប៉ុណ្ណោះបានឡើងវគ្គ ៨ក្រុម (quarter final) ដោយម៉ារ៉ុក មកពីអាហ្រ្វិកនិង ៤ក្រុមទៀតនៅតំបន់អឺរ៉ុបរួមមាន បារាំង ន័រវេស អង់គ្លេស និងប៊ែលហ្សិក គិតចាប់តាំងពីថ្ងៃបើកឆាកប្រកួតចាប់ពីរាត្រីថ្ងៃទី១១ ខែមិថុនា ឆ្នាំ២០២៦ រហូតមក ដោយមានសហរដ្ឋអាមេរិក មិចស៊ិក និងកាណាដា ធ្វើម្ចាស់ផ្ទះរួមគ្នា និងបានហាលអាវអស់ហើយដែរ៕