(ព្រៃវែង)៖ ថ្វីត្បិតតែការធ្វើស្រែចំការជាមុខរបរចម្បងដែលមិនអាចខ្វះបានសម្រាប់ប្រជាកសិករខ្មែរ ប៉ុន្តែបច្ចុប្បន្ន និន្នាការនៃការបង្កើតមុខរបររង ឬរបរបន្ទាប់បន្សំកំពុងតែមានការកើនឡើង។ ក្នុងនោះ របរចិញ្ចឹមទាយកពង នៅតែជាជម្រើសដ៏ពេញនិយមមួយសម្រាប់ប្រជាពលរដ្ឋមួយចំនួន ដោយសារវាបានដើរតួនាទីយ៉ាងសំខាន់ក្នុងការជួយសម្រួល និងទប់ទល់ជីវភាពគ្រួសារបានមួយកម្រិតធំ បន្ទាប់ពីការប្រមូលផលស្រូវ និងដំណាំផ្សេងៗ។

ទោះជាយ៉ាងណាក៏ដោយ កសិករក៏បានបញ្ជាក់ដែរថា របរនេះក៏ទាមទារឲ្យមានការយកចិត្តទុកដាក់លើកត្តាអាកាសធាតុ ការចាក់វ៉ាក់សាំងការពារជំងឺ និងការគ្រប់គ្រងតម្លៃចំណីនៅលើទីផ្សារផងដែរ ដើម្បីធានាបាននូវប្រាក់ចំណេញខ្ពស់។

​ឆ្លងតាមរយៈជោគជ័យនៃការចិញ្ចឹមជាលក្ខណៈគ្រួសារទាំងនេះ បង្ហាញឲ្យឃើញថា របរចិញ្ចឹមទាយកពងមិនត្រឹមតែជាការបំពេញបន្ថែមលើការធ្វើកសិកម្មនោះទេ ប៉ុន្តែវាបានក្លាយជាខ្នងបង្អែកសេដ្ឋកិច្ចយ៉ាងរឹងមាំ ដែលជួយកាត់បន្ថយភាពក្រីក្រ និងទប់ស្កាត់ការចំណាកស្រុករបស់ប្រជាពលរដ្ឋនៅតាមមូលដ្ឋានបានយ៉ាងមានប្រសិទ្ធភាព៕