(ព្រះវិហារ)៖ លោក ឃិត សុធារ៉ា អភិបាលស្រុកឆែប ខេត្តព្រះវិហារ បានថ្លែងលើកទឹកចិត្តបេក្ខជនប្រឡងសញ្ញាបត្រមធ្យមសិក្សាបឋមភូមិទាំងអស់ ឱ្យប្រកាន់ខ្ជាប់នូវស្មារតីរឹងមាំ និងអនុវត្តតាមគោលការណ៍ «ចេះ គឺ ជាប់» ដើម្បីឆ្លងកាត់ការប្រឡងដោយសមត្ថភាពពិត និងសម្រេចបានលទ្ធផលល្អ។

ការថ្លែងលើកឡើងនេះ ធ្វើឡើងក្នុងឱកាសដែលលោក ឃិត សុធារ៉ា បានអញ្ជើញបើកប្រអប់វិញ្ញាសា និងកាត់ស្រោមប្រធានវិញ្ញាសា សម្រាប់ការប្រឡងសញ្ញាបត្រមធ្យមសិក្សាបឋមភូមិ សម័យប្រឡងថ្ងៃទី៦-៧ ខែកក្កដា ឆ្នាំ២០២៦ នៅមណ្ឌលប្រឡងអនុវិទ្យាល័យស្រុកឆែប។

ពិធីបើកប្រអប់វិញ្ញាសានេះ មានការចូលរួមពីគណៈមេប្រយោគ ប្រធាន និងអនុប្រធានមណ្ឌល អ្នកត្រួតពិនិត្យតាមអគារ ព្រមទាំងអ្នកពាក់ព័ន្ធ ដើម្បីរួមគ្នាពិនិត្យភាពបិទជិត ស្កុត និងត្រាស្រោមប្រធានវិញ្ញាសា នៅចំពោះមុខបេក្ខជន ដោយធានាឱ្យដំណើរការប្រឡងប្រព្រឹត្តទៅប្រកបដោយតម្លាភាព យុត្តិធម៌ និងស្តង់ដារត្រឹមត្រូវ។

ក្នុងឱកាសនោះ លោក ឃិត សុធារ៉ា បានថ្លែងជំរុញឱ្យបេក្ខជនទាំងអស់ រក្សាភាពជឿជាក់លើសមត្ថភាពរបស់ខ្លួន ខិតខំប្រឹងប្រែងធ្វើវិញ្ញាសាឱ្យអស់ពីសមត្ថភាព និងត្រូវប្រកាន់ខ្ជាប់នូវគោលការណ៍ «ចេះ គឺ ជាប់»។

ជាមួយគ្នានេះ លោកក៏បានជូនពរដល់បេក្ខជនទាំងអស់ សូមឱ្យទទួលបានជោគជ័យក្នុងការប្រឡងដ៏សំខាន់នេះ ដើម្បីបន្តការសិក្សា និងក្លាយជាធនធានមនុស្សប្រកបដោយគុណភាព សម្រាប់បម្រើជាតិ មាតុភូមិ និងប្រជាជននាពេលអនាគត។

សូមបញ្ជាក់ថា មណ្ឌលប្រឡងអនុវិទ្យាល័យស្រុកឆែប មានចំនួន ៤បន្ទប់ប្រឡង ដោយមានបេក្ខជនសរុប ៩១នាក់ ក្នុងនោះស្រី ៥១នាក់។ ដំណើរការប្រឡងបានប្រព្រឹត្តទៅដោយរលូន មានភាពស្ងប់ស្ងាត់ សណ្ដាប់ធ្នាប់ និងសុវត្ថិភាពល្អ។ជាពិសេស មិនមានអ្នកលក់នំចំណីនៅក្នុងមណ្ឌលប្រឡង ហើយមានការរៀបចំកន្លែងទុកដាក់យានជំនិះបានត្រឹមត្រូវ សមស្របតាមការកំណត់៕