(កោះកុង)៖ យោងតាមសេចក្តីរាយការណ៍ពីខេត្តកោះកុង បានឲ្យដឹងថា ជំងឺគ្រុនឈាមបាននិងកំពុងកើនឡើងគួរឲ្យកត់សម្គាល់នៅក្នុងឆ្នាំ២០២៦នេះ ដោយមន្ទីរពេទ្យបង្អែកខេត្តកោះកុងបានរកឃើញអ្នកជំងឺសរុបចំនួន ៣៧៤នាក់។ ការកើនឡើងនេះ គឺខ្ពស់ជាងអត្រាក្នុងរយៈពេលដូចគ្នាកាលពីឆ្នាំ២០២៥ ដែលតម្រូវឲ្យមានការយកចិត្តទុកដាក់ខ្ពស់ពីសំណាក់អាជ្ញាធរសុខាភិបាល និងប្រជាពលរដ្ឋ។

លោកវេជ្ជបណ្ឌិត ហៃ ឡៃសុន ប្រធានមន្ទីរពេទ្យបង្អែកខេត្តកោះកុង បានថ្លែងប្រាប់នៅថ្ងៃទី៦ ខែកក្កដា ឆ្នាំ២០២៦ នេះថា ចំនួនអ្នកជំងឺគ្រុនឈាមដែលបានមកពិនិត្យ និងព្យាបាលនៅមន្ទីរពេទ្យបង្អែកខេត្ត ក្នុងឆ្នាំ២០២៦ មានចំនួន ៣៧៤នាក់។

លោកវេជ្ជបណ្ឌិតបានបញ្ជាក់ថា អត្រានេះគឺខ្ពស់ជាងឆ្នាំ២០២៥ ទៅដល់ ២៥០នាក់ គិតជាភាគរយស្មើនឹង ២០១.៨% បើធៀបនឹងរយៈពេលដូចគ្នាកាលពីឆ្នាំមុន។ ទោះបីជាមានការកើនឡើងក៏ដោយ ក្រុមគ្រូពេទ្យនៅតែអាចគ្រប់គ្រង និងព្យាបាលអ្នកជំងឺបានយ៉ាងល្អ ដោយបានកែប្រែស្ថានភាពពីកម្រិតធ្ងន់មកជាសះស្បើយវិញ ដែលនេះជាកាតព្វកិច្ច និងការខិតខំប្រឹងប្រែងរបស់ក្រុមគ្រូពេទ្យទាំងអស់។

លោកវេជ្ជបណ្ឌិត ហៃ ឡៃសុន ក៏បានអំពាវនាវដល់ប្រជាពលរដ្ឋទាំងអស់ ឲ្យមានការប្រុងប្រយ័ត្នខ្ពស់ចំពោះជំងឺគ្រុនឈាម ជាពិសេសក្នុងរដូវវស្សានេះ។ លោកបានណែនាំថា ប្រសិនបើអាណាព្យាបាលសង្ស័យថា កូនចៅមានកម្តៅខុសពីប្រក្រតីរយៈពេល ២ ទៅ ៣ថ្ងៃ ហើយលេបថ្នាំមិនត្រជាក់ ត្រូវប្រញាប់បញ្ជូនអ្នកជំងឺមកមន្ទីរពេទ្យជាបន្ទាន់ ដើម្បីពិភាក្សាជាមួយលោកគ្រូពេទ្យ។ ការធ្វើបែបនេះ គឺដើម្បីចៀសវាងការទុកឲ្យហួសពេល ដែលអាចនាំឲ្យមានវិប្បដិសរីក្នុងគ្រួសារ។

ទន្ទឹមនឹងការអំពាវនាវឲ្យមកព្យាបាលទាន់ពេលវេលា លោកវេជ្ជបណ្ឌិតក៏បានធ្វើការអប់រំ និងណែនាំដល់ប្រជាពលរដ្ឋគ្រប់រូប ឲ្យចូលរួមយ៉ាងសកម្មក្នុងការសម្អាតអនាម័យបរិស្ថានជុំវិញលំនៅដ្ឋាន។ ការលុបបំបាត់ជម្រកមូសខ្លាញី គឺជាវិធានការដ៏មានប្រសិទ្ធភាពបំផុតក្នុងការទប់ស្កាត់ការកើតជំងឺគ្រុនឈាម។ ក្រុមគ្រូពេទ្យនៅតែបន្តបង្កើនការផ្សព្វផ្សាយអប់រំឲ្យយល់ដឹងកាន់តែច្រើន អំពីវិធីកម្ចាត់ប្រភពដែលនាំឲ្យកើតជំងឺគ្រុនឈាមនារដូវវស្សា ដោយបានចែកជូនថ្នាំអាបែត ជំរុញឲ្យពលរដ្ឋលុបបំបាត់ជម្រកសត្វមូសខ្លា ត្រូវគេងដាក់មុង ពាក់អាវដៃវែងៗ និងបាញ់ថ្នាំសម្លាប់មូសនៅតាមលំនៅដ្ឋាន ឬសហគមន៍។ វិធានការការពារ គឺប្រសើរជាងការព្យាបាល។

អាណាព្យាបាលអ្នកជំងឺគ្រុនឈាមមួយចំនួន បានសម្តែងនូវក្តីសប្បាយរីករាយ និងកោតសរសើរចំពោះក្រុមគ្រូពេទ្យ ដែលបានបំពេញនូវកាតព្វកិច្ចប្រកបដោយក្រមសីលធម៌ និងវិជ្ជាជីវៈខ្ពស់។ ពួកគាត់បានលើកឡើងថា ក្រុមគ្រូពេទ្យបានខិតខំយកចិត្តទុកដាក់មើលថែអ្នកជំងឺគ្រប់ពេល ដោយមិនគិតពីការនឿយហត់ឡើយ ឲ្យតែអ្នកជំងឺបានសម្រាកព្យាបាលក្នុងមន្ទីរពេទ្យ។ ក្រៅពីការព្យាបាល ក្រុមគ្រូពេទ្យក៏បានធ្វើការអប់រំឲ្យពួកគាត់ចេះថែរក្សាសុខភាព និងថែរក្សាបរិស្ថានជុំវិញលំនៅដ្ឋាន ដែលជាជម្រកមូសខ្លា។

ពួកគាត់ក៏បានសំណូមពរឲ្យមន្ទីរសុខាភិបាលជួយបាញ់ថ្នាំ ឬដាក់អាបែតនៅតាមមូលដ្ឋាន ឬសហគមន៍ ដើម្បីកម្ចាត់ជម្រកមូសខ្លាឲ្យបានទាន់ពេលវេលា ព្រោះនេះជាអំឡុងពេលរដូវវស្សា ដែលជាពេលវេលាប្រឈមខ្លាំងនឹងការរីករាលដាលនៃជំងឺគ្រុនឈាម។

សរុបមក ការកើនឡើងនៃករណីជំងឺគ្រុនឈាមនៅខេត្តកោះកុងក្នុងឆ្នាំ២០២៦នេះ គឺជាការដាស់តឿនមួយសម្រាប់ប្រជាពលរដ្ឋទាំងអស់ ឲ្យបង្កើនការប្រុងប្រយ័ត្ន និងចូលរួមយ៉ាងសកម្មក្នុងការទប់ស្កាត់ការរីករាលដាលនៃជំងឺនេះ។ ការថែរក្សាអនាម័យបរិស្ថាន ការការពារខ្លួនពីមូសខាំ និងការស្វែងរកការព្យាបាលទាន់ពេលវេលា គឺជាគន្លឹះដ៏សំខាន់ក្នុងការកាត់បន្ថយហានិភ័យ និងរក្សាសុខភាពក្រុមគ្រួសារ និងសហគមន៍ឲ្យបានល្អប្រសើរ៕