វាគ្មិន ៤រូបដែលមានបទពិសោធន៍ជាង ២០ឆ្នាំក្នុងការជំរុញ SMEs នឹងចូលរួមចែករំលែកចំណេះដឹងក្នុងសិក្ខាសាលាក្រោមប្រធានបទ៖ ហេតុអ្វីបានជាអាជីវកម្មគួរវិនិយោគលើប្រព័ន្ធបច្ចេកវិទ្យា?
07-07-2026 11:12
(ភ្នំពេញ)៖ ក្លឹបគណនេយ្យកម្ពុជា CAC និងសហគមន៍ឌីជីថល «ចតុមុខ» បានសហការគ្នារៀបចំសិក្ខាសាលាមួយក្រោមប្រធានបទ៖ «ហេតុអ្វីបានជាអាជីវកម្មគួរវិនិយោគលើប្រព័ន្ធបច្ចេកវិទ្យា?» ដែលគ្រោងនឹងប្រព្រឹត្តទៅនាថ្ងៃសៅរ៍ ទី១១ ខែកក្កដា ឆ្នាំ២០២៦ នៅសណ្ឋាគារ Oakwood Premier Phnom Penh ចាប់ពីម៉ោង ៨:០០ ព្រឹក ដល់ម៉ោង ១២:០០ ថ្ងៃត្រង់។
សិក្ខាសាលាដ៏មានសារៈសំខាន់នេះ មានគោលបំណងដោះស្រាយបញ្ហាកង្វះប្រសិទ្ធភាព និងការចំណាយមិនចាំបាច់នានាដែលបណ្តាលឱ្យលំហូរការងារមានភាពរអាក់រអួលក្នុងប្រព័ន្ធអាជីវកម្ម ។ អ្នកចូលរួមនឹងទទួលបានចំណេះដឹង និងយុទ្ធសាស្ត្រជាក់ស្តែងអំពីការប្រើប្រាស់ធនធានឱ្យចំគោលដៅ កាត់បន្ថយការចំណាយមិនចាំបាច់ និងជំរុញដំណើរការសម្រេចចិត្តឱ្យកាន់តែរហ័ស តាមរយៈការដាក់ឱ្យប្រើប្រាស់ប្រព័ន្ធបច្ចេកវិទ្យាវៃឆ្លាតនៅក្នុងប្រព័ន្ធអាជីវកម្ម។
សិក្ខាសាលានេះរៀបចំឡើងដោយមានការចូលរួមឧបត្ថម្ភពីធនាគារ កាណាឌីយ៉ា និង ដៃគូគាំទ្រគឺមជ្ឈមណ្ឌលបណ្តុះធុរកិច្ចថ្មី “តេជោ” និងមជ្ឈមណ្ឌលទិន្នន័យដូនពេញ អមជាមួយនឹងការចូលរួមពីវាគ្មិនកិត្តិយស ដែលជាអ្នកជំនាញក្នុងការប្រើប្រាស់ប្រព័ន្ធបច្ចេកវិទ្យា និងជាទីប្រឹក្សាអាជីវកម្មជើងចាស់ដែលមានបទពិសោធន៍ជាង ២០ឆ្នាំក្នុងការជំរុញបរិវត្តកម្មឌីជីថលសម្រាប់សហគ្រាសធុនតូច និងមធ្យម (SMEs)។
សមាសភាពវាគ្មិនកិត្តិយសជាអ្នកសម្របសម្រួលគឺ លោក សាន រិទ្ធី (ស្ថាបនិកនៃ ក្លឹបគណនេយ្យកម្ពុជា និងជាម្ចាស់ភាគហ៊ុននៃ Acclime) រួមទាំងវាគ្មិនកិត្តិយសចំនួន ៤ រូបទៀត គឺលោក ទុយ ហុង (ស្ថាបនិក និងជានាយកគ្រប់គ្រងនៃក្រុមហ៊ុន Localize Tech Solution), លោក ឈឹម ទិតប៉ូរ៉ាស៊ី (ស្ថាបនិកនៃ KrubKrong), លោក រ៉ាត់ ម៉េងហ៊ាង (ស្ថាបនិកនៃ Point Hub POS) និង លោក ភូ លីន (ស្ថាបនិកនៃ BeOne HR)។ កិច្ចពិភាក្សានេះនឹងជជែកពីបញ្ហាប្រឈម និង បទពិសោធន៍ពិតក្នុងការដឹកនាំសហគ្រានធុន តូច និងមធ្យម និងធុរកិច្ចថ្មី (Startup) ព្រមទាំងបើកឱកាសតភ្ជាប់បណ្តាញទំនាក់ទំនងយ៉ាងទូលំទូលាយនៅក្នុងប្រព័ន្ធអេកូឡូស៊ីទាំងមូលផងដែរ៕
