(ព្រះវិហារ)៖ លោកវេជ្ជបណ្ឌិត គួង ឡូ ទីប្រឹក្សាក្រសួងសុខាភិបាល និងជាប្រធានមន្ទីរសុខាភិបាលខេត្តព្រះវិហារ បានណែនាំប្រជាពលរដ្ឋ ឱ្យពង្រឹងវិធានការប្រយុទ្ធនឹងជំងឺគ្រុនឈាម ដោយត្រូវសម្អាតបរិស្ថានជុំវិញលំនៅឋាន លុបបំបាត់ប្រភពទឹកដក់ បិទគម្របធុង និងពាងទឹក និងបំផ្លាញជម្រកមូសខ្លា។

ការថ្លែងរបស់លោកវេជ្ជបណ្ឌិត គួង ឡូ ក្នុងឱកាសដែលលោកបានណែនាំដល់ក្រុមការងារប្រយុទ្ធនឹងជំងឺគ្រុនឈាម នៃមន្ទីរសុខាភិបាលខេត្តព្រះវិហារ សហការជាមួយប្រជាការពារភូមិ បានចុះបាញ់ថ្នាំសម្លាប់មូសខ្លា ដែលជាភ្នាក់ងារចម្លងជំងឺគ្រុនឈាម នៅភូមិហ្មសែត សង្កាត់ប៉ាលហាល ក្រុងព្រះវិហារ ខេត្តព្រះវិហារ នៅថ្ងៃទី៧ ខែកក្កដា ឆ្នាំ២០២៦។

សកម្មភាពចុះបាញ់ថ្នាំនេះ ធ្វើឡើងបន្ទាប់ពីមានការកើនឡើងនៃករណីជំងឺគ្រុនឈាមក្នុងមូលដ្ឋាន ដោយក្រុមការងារបានចុះបាញ់ថ្នាំនៅតាមលំនៅឋានប្រជាពលរដ្ឋ សាលារៀន និងទីតាំងដែលមានហានិភ័យខ្ពស់ ដើម្បីកាត់បន្ថយចំនួនមូសខ្លា និងទប់ស្កាត់ការរាតត្បាតនៃជំងឺឱ្យមានប្រសិទ្ធភាព។

លោកវេជ្ជបណ្ឌិត គួង ឡូ បានថ្លែងណែនាំឱ្យមន្ត្រីសុខាភិបាលគ្រប់លំដាប់ថ្នាក់ បន្តតាមដានស្ថានភាពជំងឺ ចុះអន្តរាគមន៍ឱ្យបានទាន់ពេលវេលា និងសហការយ៉ាងជិតស្និទ្ធជាមួយអាជ្ញាធរមូលដ្ឋាន ដើម្បីអនុវត្តវិធានការបង្ការ និងទប់ស្កាត់ជំងឺគ្រុនឈាមឱ្យមានប្រសិទ្ធភាពខ្ពស់។

ទន្ទឹមនឹងការចុះបាញ់ថ្នាំ លោកប្រធានមន្ទីរសុខាភិបាលខេត្តព្រះវិហារ ក៏បានថ្លែងអំពាវនាវដល់ប្រជាពលរដ្ឋទាំងអស់ ចូលរួមសម្អាតបរិស្ថានជុំវិញលំនៅឋាន លុបបំបាត់ប្រភពទឹកដក់ បិទគម្របធុងទឹក និងបំផ្លាញកន្លែងដែលមូសខ្លាអាចពងកូនបាន ព្រោះការចូលរួមពីសហគមន៍ គឺជាកត្តាសំខាន់ក្នុងការកាត់បន្ថយការរាតត្បាតនៃជំងឺគ្រុនឈាម។

លោកក៏បានថ្លែងអំពាវនាវឱ្យប្រជាពលរដ្ឋ ប្រសិនបើមានអាការៈក្តៅខ្លួនខ្លាំង ឈឺក្បាល ឈឺសាច់ដុំ ឬសង្ស័យថាមានជំងឺគ្រុនឈាម សូមប្រញាប់ទៅកាន់មណ្ឌលសុខភាព ឬមន្ទីរពេទ្យដែលនៅជិតបំផុត ដើម្បីទទួលបានការពិនិត្យ និងព្យាបាលទាន់ពេលវេលា៕