(កណ្ដាល)៖ លោកស្រី រិន ចាន់ម៉ារីណា ប្រធានគណៈកម្មការពិគ្រោះយោបល់កិច្ចការស្ត្រី និងកុមារ ក្រុងតាខ្មៅ នាពេលថ្មីៗនេះ បានដឹកនាំក្រុមការងារចុះសួរសុខទុក្ខ និងចែកអំណោយដល់ ចាស់ជរាមានជម្ងឺរ៉ាំរ៉ៃ ក្មេងកំព្រា ស្ត្រីមានផ្ទៃពោះក្រីក្រ និងជនពិការចំនួន៨គ្រួសារ នៅសង្កាត់រកាខ្ពស់ និងសង្កាត់ព្រែកហូរ ក្រុងតាខ្មៅ។

នាឱកាសនេះ លោកស្រីប្រធានបានឲ្យដឹងថា គោលបំណងសំខាន់គឺ ដើម្បីជួយសម្រួលការលំបាកផ្សេងៗ ការថែទាំសុខភាព ការការពារពីជម្ងឺគ្រុនឈាម ការរក្សាអនាម័យផ្សេងៗ ពិសេសបើសិនជាមានករណីគ្រុនក្ដៅ សង្ស័យកើតគ្រុនឈាម សូមរួសរាន់ទៅមន្ទីរពេទ្យបង្អែកជ័យជំនះភ្លាម កុំទុកយូរ ខ្លាចមានបញ្ហាធ្ងន់ធ្ងរ។

សូមជម្រាបថា គណៈកម្មការពិគ្រោះយោបល់កិច្ចការស្ត្រី និងកុមារ ក្រុងតាខ្មៅ ដែលដឹកនាំលោកស្រី រិន ចាន់ម៉ារីណា តែងតែចុះសួរសុខទុក្ខ និងចែកអំណោយដល់ជនរងគ្រោះខាងលើ ដែលសកម្មភាពនេះ ទទួលបានការសាទរជាអនេកពីសំណាក់បងប្អូនប្រជាពលរដ្ឋនៅក្រុងតាខ្មៅ និងខេត្តកណ្ដាល៕