(ភ្នំពេញ)៖ លោក គង់ ផល្លៈ រដ្ឋលេខាធិការក្រសួងប្រៃសណីយ៍ និងទូរគមនាគមន៍ (ក.ប.ទ.) និងលោក Gidon Windecker អនុប្រធានផ្នែកសហប្រតិបត្តិការអភិវឌ្ឍន៍ នៃស្ថានទូតអាល្លឺម៉ង់ប្រចាំកម្ពុជា បានអញ្ជើញជាអធិបតី ក្នុងកម្មវិធីបណ្តុះបណ្តាលស្តីពី «ការរៀបចំសេចក្តីព្រាងប្រកាស ស្តីពីកិច្ចការពារអ្នកប្រើប្រាស់ក្នុងវិស័យទូរគមនាគមន៍» នៅសណ្ឋាគារ សាន់វ៉េ ភ្នំពេញ ក្រោមគម្រោង EU-German GATE។

កម្មវិធីនេះ ដោយមានការអញ្ជើញចូលរួមពីទីប្រឹក្សាបច្ចេកទេសជាតិ និងអន្តរជាតិ មន្ត្រីជំនាញផ្នែកច្បាប់របស់ ក.ប.ទ. និយ័តករទូរគមនាគមន៍កម្ពុជា និងអគ្គលេខាធិការដ្ឋាននៃគណៈកម្មាធិការរដ្ឋាភិបាលឌីជីថលព្រមទាំងអ្នកតំណាងគម្រោង EU-German GATE សរុបចំនួន២២រូប នៅថ្ងៃទី៦-៧ ខែកក្កដា ឆ្នាំ២០២៦។

កម្មវិធីបណ្តុះបណ្តាលនេះ មានគោលបំណងពង្រឹងការយល់ដឹង អំពីគោលការណ៍កិច្ចការពារអ្នកប្រើប្រាស់ ឧត្តមានុវត្តន៍អន្តរជាតិ និងក្របខណ្ឌច្បាប់របស់កម្ពុជា ដើម្បីរៀបចំប្រកាសដែលមានលក្ខណៈជាក់ស្តែង អាចអនុវត្តបាន និងស្របតាមច្បាប់ និងបទប្បញ្ញត្តិពាក់ព័ន្ធក្នុងវិស័យទូរគមនាគមន៍។

លោក Gidon Windecker បានគូសបញ្ជាក់អំពីការគាំទ្ររបស់គម្រោង EU-German GATE ក្នុងការពង្រឹងក្របខ័ណ្ឌច្បាប់ តាមរយៈការរៀបចំលិខិតបទដ្ឋានគតិយុត្ត សម្រាប់កិច្ចការពារអ្នកប្រើប្រាស់ក្នុងវិស័យទូរគមនាគមន៍ ឱ្យកាន់តែមានប្រសិទ្ធភាព និងឆ្លើយតបទៅនឹងការវិវត្តយ៉ាងឆាប់រហ័សនៃបច្ចេកវិទ្យា។

ក្នុងមតិបើកសិក្ខាសាលា រដ្ឋលេខាធិការ គង់ ផល្លៈ បានលើកទឹកចិត្តឱ្យមន្ត្រីដែលបានចូលរួមកម្មវិធីបណ្តុះបណ្តាល យកចំណេះដឹងដែលទទួលបាន មកអនុវត្តក្នុងការរៀបចំ​ សេចក្តីព្រាងប្រកាស ដោយបានគូសបញ្ជាក់ថា «នៅថ្ងៃស្អែក សូមកុំគ្រាន់តែរៀបចំបទប្បញ្ញត្តិច្បាប់ ប៉ុន្តែសូមរៀបចំដំណោះស្រាយ ជាមួយគ្នានេះ មាត្រានីមួយៗដែលរៀបចំ គួរតែដោះស្រាយបញ្ហាពិតប្រាកដដែលអ្នកប្រើប្រាស់សេវាទូរគមនាគមន៍កំពុងជួបប្រទះ»។

លោករដ្ឋលេខាធិការ បានបន្ថែមថា ប្រសិនបើយើងដាក់អ្នកប្រើប្រាស់ ជាចំណុចកណ្តាលនៃការងាររបស់យើង យើងនឹងអាចរៀបចំប្រកាសមួយ​ដែលមានប្រសិទ្ធភាព អាចអនុវត្តបាន និងសមស្របសម្រាប់អនាគតឌីជីថលរបស់កម្ពុជា។

ជាចុងក្រោយ លោករដ្ឋលេខាធិការ បានផ្តាំផ្ញើថា «សូមចងចាំថា ការរៀបចំសេចក្តីព្រាងបានល្អនាំឱ្យមានបទប្បញ្ញត្តិល្អ បទប្បញ្ញត្តិល្អកសាងទំនុកចិត្តសាធារណៈ​ លើសេវាទូរគមនាគមន៍ ហើយទំនុកចិត្តនោះ គឺជាកម្លាំងជំរុញដ៏សំខាន់សម្រាប់ការរីកចម្រើននៃសេដ្ឋកិច្ចឌីជីថលរបស់កម្ពុជា»៕