(សៀមរាប)៖ ថ្នាក់ដឹកនាំក្លិបបាល់ទាត់អង្គរថាយហ្គឺរ និងក្រុមបាល់ទាត់ខ្លាចាស់ (ក្រុមហ៊ុនអាវNT) ព្រមទាំងសប្បុរសជន កាលពីថ្ងៃសៅរ៍ ទី៤ ខែកក្កដា ឆ្នាំ២០២៦ បានរួមគ្នាប្រកួតបាល់ទាត់មិត្តភាព ក្នុងឱកាសខួបទំនាក់ទំនងជាដៃគូអាជីវកម្មអស់រយៈពេល១០ឆ្នាំ របស់ខ្លួន ដើម្បីរឹតបន្តឹងភាពជាដៃគូកាន់តែល្អបន្ថែមទៀត ព្រមទាំងចូលរួមជួយគាំទ្រ និងលើកកម្ពស់វិស័យទេសចរណ៍ក្នុងស្រុក ជាពិសេសទេសចរណ៍ក្នុងខេត្តសៀមរាប។

អ្វីដែលកាន់តែពិសេសនោះ ថ្នាក់ដឹកនាំក្រុមទាំងពីរបានរៀបចំនូវកម្មវិធីសប្បុរសធម៌ និងចែករំលែកសេចក្តីស្រឡាញ់ ស្នាមញញឹម ទៅកាន់យុវជនជំនាន់ក្រោយ ដោយបានចែកអាវកីឡាជូនប្អូនៗ ក្មួយៗសិស្សានុសិស្សនៅខេត្តសៀមរាប ប្រមាណ ១០០០អាវ ទុកជាអនុស្សាវរីយ នៅកីឡាដ្ឋាន Akihiro Kato ខេត្តសៀមរាប ថែមទៀតផង។

ក្រោយបញ្ចប់ការប្រកួតយ៉ាងស្វិតស្វាញប្រកបដោយមិត្តភាព និងស្នាមញញឹម ក្នុងស្មារតីកីឡា ថ្នាក់ដឹកនាំក្រុមទាំងពីរបានផ្តាំផ្ញើជូនប្អូនៗ ក្មួយៗឱ្យប្រឹងប្រែងសិក្សារៀនសូត្រ ស្តាប់គ្រូ អនុវត្តតាមវិន័យសាលា ជាពិសេសត្រូវចៀសផុតពីក្រុមក្មេងទំនើង គ្រឿងញៀន ល្បែងស៊ីសង និងអំពើខុសច្បាប់ផ្សេងៗ ហើយងាកមកប្រឹងលេងកីឡា ដើម្បីសុខភាពល្អ កាយសម្បទារឹងមាំ ដើម្បីក្លាយជាទំពាំងស្នងឫស្សីដ៏ល្អសម្រាប់ក្រុមគ្រួសារ និងសង្គមជាតិទាំងមូល ក្រោមពាក្យស្លោក៖ «កីឡារស់ក្នុងសន្តិភាព» «ប្រជាពលរដ្ឋម្នាក់លេងកីឡាមួយប្រភេទ» «កីឡានាំមកនូវសុខភាពល្អ មិត្តភាព សាមគ្គី និងភាពជាដៃគូសហការល្អ» «ចូលរួមលើកកម្ពស់កីឡាបាល់ទាត់នៅកម្ពុជា»៕