(ភ្នំពេញ)៖ សម្តេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភានៃព្រះរាជាណាចក្រកម្ពុជា បានចេញសារលិខិតរំលែកទុក្ខ ជូនឯកឧត្តមសន្តិបណ្ឌិត នេត សាវឿន និងលោកជំទាវ ចំពោះដំណឹងដ៏ក្រៀមក្រំពីមរណភាពរបស់ឧបាសិកា នេត សុគន្ធ ដែលត្រូវជាបងស្រីបង្កើត និងបងថ្លៃជាទីគោរពស្រឡាញ់របស់ឯកឧត្តម និងលោកជំទាវ នៅវេលាម៉ោង ១៣៖៥៧ នាទីរសៀល ក្នុងជន្មាយុ ៧៨ឆ្នាំ ដោយរោគាពាធ។

សារលិខិតរំលែកមរណទុក្ខ មានខ្លឹមសារដូចតទៅ៖ «ក្នុងនាមថ្នាក់ដឹកនាំ សមាជិក សមាជិកាព្រឹទ្ធសភា នៃព្រះរាជាណាចក្រកម្ពុជា និងខ្លួនខ្ញុំផ្ទាល់ ព្រមទាំង ភរិយា ខ្ញុំមានក្តីរន្ធត់ក្ដុកក្ដួល និងសោកស្តាយឥតឧបមា ក្រោយពីបានទទួលដំណឹងដ៏ក្រៀមក្រំពីមរណភាពរបស់ ឧបាសិកា នេត សុគន្ធ ដែលត្រូវជាបងស្រីបង្កើត និងបងថ្លៃជាទីគោរពស្រឡាញ់របស់ឯកឧត្តម និងលោកជំទាវ នាថ្ងៃចន្ទ ៧រោច ខែបឋមាសាឍ ឆ្នាំមមី អដ្ឋស័ក ព.ស.២៥៧០ ត្រូវនឹងថ្ងៃទី៦ ខែកក្កដា ឆ្នាំ២០២៦ វេលាម៉ោង ១៣:៥៧ នាទីរសៀល ក្នុងជន្មាយុ ៧៨ឆ្នាំ ដោយរោគាពាធ។

ក្នុងឱកាសប្រកបដោយសមានទុក្ខដ៏ក្រៀមក្រំនេះ ខ្ញុំ និងភរិយា ព្រមទាំងសហការី សូមចូលរួមរំលែកទុក្ខ និងសូមចូលរួមសោកស្តាយស្រណោះ អាឡោះអាល័យជាអនេក ជាមួយឯកឧត្តម និងលោកជំទាវ ព្រមទាំងក្រុម គ្រួសារ ចំពោះការបាត់បង់នូវភរិយា បងស្រីបង្កើត បងស្រីថ្លៃ ម្តាយបង្កើត ម្តាយក្មេក ជីដូន ជាទីគោរពស្រលាញ់បំផុត ដែលមិនអាចកាត់ថ្លៃបានប្រកបដោយព្រហ្មវិហារធម៌ និងសង្គហធម៌គំរូមួយរូបដែលតែងតែខិតខំចិញ្ចឹម បីបាច់ ថែរក្សា អប់រំទូន្មានប្អូនប្រុសស្រី បុត្រធីតា និងចៅៗ រហូតក្លាយជាកុលបុត្រ កុលធីតាជាធនធានដ៏ឆ្នើមរបស់សង្គម ជាតិ។ ពិសេសជាងនេះទៅទៀត មរណភាព ឧបាសិកា នេត សុគន្ធ គឺជាការបាត់បង់នូវពុទ្ធសាសនិកមួយរូបដែល មានសទ្ធាជ្រះថ្លាក្រៃលែង ដែលបានបូជាអស់កម្លាំងកាយចិត្ត ពេលវេលា និងថវិកា ចូលរួមចំណែកក្នុងការងារ មនុស្សធម៌ និងទ្រទ្រង់លើកស្ទួយវិស័យព្រះពុទ្ធសាសនានៅប្រទេសកម្ពុជា។

ខ្ញុំសូមឧទ្ទិសបួងសួងដល់វត្ថុស័ក្តិសិទ្ធិក្នុងលោក តេជះបារមី នៃព្រះពុទ្ធ ព្រះធម៌ ព្រះសង្ឃ សូមតាមជួយ បីបាច់ថែរក្សាដល់ដួងវិញ្ញាណក្ខន្ធរបស់ ឧបាសិកា នេត សុគន្ធ សូមបានទៅចាប់បដិសន្ធិ និងសោយសុខក្នុង សុគតិភពកុំបីឃ្លៀងឃ្លាតឡើយ»៕