(ឧត្តរមានជ័យ)៖ កិត្តិសង្គហបណ្ឌិត គន់ គីម ទេសរដ្ឋមន្រ្តី អនុប្រធានទី១ គណៈកម្មាធិការជាតិគ្រប់គ្រងគ្រោះមហន្តរាយ នៅរសៀលថ្ងៃទី៧ ខែកក្កដា ឆ្នាំ២០២៦ បានអញ្ជើញចុះសួរសុខទុក្ខប្រជាពលរដ្ឋភៀសសឹកស្នាក់នៅមណ្ឌលសុវត្ថិភាព និងសំណេះសំណាលជាមួយប្រជាពលរដ្ឋភៀសសឹកស្នាក់នៅផ្ទះបណ្តោះអាសន្ន ក្នុងភូមិស្រះកែវ ស្រុកចុងកាល់ ខេត្តឧត្តរមានជ័យ។

អំឡុងពេលសួរសុខទុក្ខ ទេសរដ្ឋមន្រ្តី គន់ គីម មានប្រសាសន៍ថា មកទល់ពេលនេះ ក្រោមការយកចិត្តទុកដាក់ខ្ពស់ពីសំណាក់ប្រមុខរាជរដ្ឋាភិបាល ដឹកនាំដោយសម្តេចបវរធិបតី ហ៊ុន ម៉ាណែត នាយករដ្ឋមន្រ្តី បានធ្វើការដោះស្រាយការលំបាកជូនប្រជាពលរដ្ឋភៀសសឹក តាមបណ្តាខេត្តជាប់ព្រំដែន ដែលមិនទាន់អាចត្រឡប់ទៅរស់នៅលំនៅឋានរបស់ខ្លួនវិញ ដោយសារកងទ័ពថៃបានបំផ្លិចបំផ្លាញ រាយបន្លាលួស និងពង្រាយទូកុងតឺន័រ លើអធិបតេយ្យភាពរបស់កម្ពុជារួមមាន ខេត្តបន្ទាយមានជ័យ ខេត្តព្រះវិហារ និងខេត្តឧត្តរមានជ័យ។

ទេសរដ្ឋមន្រ្តី បានបន្តថា ចាប់តាំងពីមានជម្លោះព្រំដែន សម្តេចតេជោ ហ៊ុន សែន ប្រធានព្រឹទ្ធសភា និងសម្តេចធិបតី ហ៊ុន ម៉ាណែត នាយករដ្ឋមន្រ្តី បានផ្តល់អនុសាសន៍យ៉ាងម៉ឺងម៉ាត់ក្នុងការគិតគូរយកចិត្តទុកដាក់ដល់ប្រជាពលរដ្ឋភៀសសឹកទាំងអស់ដែលស្នាក់នៅមណ្ឌលសុវត្ថិភាព និងផ្ទះបណ្តោះអាសន្ន ជាពិសេសបញ្ហាប្រជាពលរដ្ឋភៀសសឹក ត្រូវចាត់ទុកជាអាទិភាពហើយមិនទុកឲ្យប្រជាពលរដ្ឋភៀសសឹកណាម្នាក់នៅឯកោនោះទេ។

បន្ទាប់ពីអញ្ជើញចុះសួរសុខទុក្ខ, ទេសរដ្ឋមន្រ្តី គន់ គីម រួមជាមួួយរដ្ឋបាលខេត្តឧត្តរមានជ័យ ព្រមទាំងមន្ទីរជំនាញ និងអាជ្ញាធរមូលដ្ឋាន បានចុះពិនិត្យទីតាំងដី ដើម្បីសាងសង់ផ្ទះបណ្តោះអាសន្នជំហានទី២បន្ថែមទៀតសម្រាប់ប្រជាពលរដ្ឋភៀសសឹកស្នាក់នៅជម្រកចល័ត និងមិនអាចត្រឡប់ទៅលំនៅឋានវិញ។

ទេសរដ្ឋមន្រ្តី បានថ្លែងថា ការសាងសង់ផ្ទះបណ្តោះអាសន្ន គឺជាយុទ្ធសាស្ត្រគិតគូរវែងឆ្ងាយរបស់រាជរដ្ឋាភិបាល ដែលមិនទុកបងប្អូនប្រជាពលរដ្ឋភៀសសឹករងការខូចខាតលំនៅឋានជួបការលំបាកឡើយ ពោលបូករួមជាមួយការគិតគូរឧបត្ថម្ភគាំទ្រដល់ជីវភាពរស់នៅ និងដើម្បីធានាថាបងប្អូនប្រជាពលរដ្ឋភៀសសឹកមានកន្លែងស្នាក់នៅសមរម្យ ប្រកបដោយសុវត្ថិភាព និងសុខុមាលភាពបំផុត។

ក្រៅពីនោះ ទេសរដ្ឋមន្រ្តី បានរម្លឹកដល់អាជ្ញាធរខេត្តគ្រប់ជាន់ថ្នាក់ ត្រូវតាមដានជាប់ជាប្រចាំ ដើម្បីដោះស្រាយចំពោះតម្រូវការចាំបាច់ ព្រមទាំងក្រុមគ្រូពេទ្យសម្រាប់ជួយថែទាំសុខភាពជូនជនភៀសសឹក ពិសេសកុមារ និងស្រ្តីមានផ្ទៃពោះ និងធានាសន្តិសុខសណ្តាប់ធ្នាប់ មិនថាទាំងក្នុងមណ្ឌលសុវត្ថិភាព និងផ្ទះបណ្តោះអាសន្នឱ្យបានល្អប្រសើរ។

សូមជម្រាបថា រាជរដ្ឋាភិបាលបានសាងសង់ផ្ទះបណ្តោះអាសន្នជូនប្រជាពលរដ្ឋភៀសសឹកក្នុងខេត្តឧត្តរមានជ័យ ចំនួន ២៥០ខ្នងផ្ទះ ស្មើនឹងចំនួនគ្រួសាររស់នៅជាក់ស្តែងចំនួន ២៧៩គ្រួសារ៕