(ព្រះវិហារ)៖ លោកស្រី គីម គន្ធារីន ត្រូវបានតែងតាំងឱ្យកាន់មុខតំណែងជា ប្រធានមន្ទីរអប់រំ យុវជន និងកីឡា ខេត្តព្រះវិហារ ជំនួសលោក ចេង លីមហ៊ាន់ ដែលត្រូវបានដាក់ឱ្យចូលនិវត្តន៍។ ការតែងតាំងនេះ ធ្វើឡើងក្នុងគោលបំណងពង្រឹងប្រសិទ្ធភាពការងារ និងបន្តជំរុញវិស័យអប់រំ យុវជន និងកីឡា ក្នុងខេត្តព្រះវិហារ ឱ្យកាន់តែរីកចម្រើនស្របតាមគោលនយោបាយរបស់រាជរដ្ឋាភិបាល។

យោងតាមអនុក្រឹត្យលេខ ៥៧៦ អនក្រ.តត ចុះថ្ងៃទី០៣ ខែកក្កដា ឆ្នាំ២០២៦ បានបញ្ជាក់យ៉ាងច្បាស់ថា លោកស្រី គីម គន្ធារីន ដែលមានអត្តលេខ ២៧១១៣០០០០៧ និងមានអត្តសញ្ញាណជាគ្រូបង្រៀនកម្រិតមូលដ្ឋានដើមខ្សែពិសេស ថ្នាក់លេខ២ នៃក្របខណ្ឌគ្រូបង្រៀនកម្រិតមូលដ្ឋាន ត្រូវបានរាជរដ្ឋាភិបាលជឿទុកចិត្ត និងសម្រេចប្រគល់ភារកិច្ចថ្មីនេះ។ ការតែងតាំងលោកស្រី គីម គន្ធារីន ឱ្យមកដឹកនាំមន្ទីរអប់រំ យុវជន និងកីឡា ខេត្តព្រះវិហារ គឺជាការឆ្លុះបញ្ចាំងពីការទទួលស្គាល់នូវសមត្ថភាព បទពិសោធន៍ និងការប្តេជ្ញាចិត្តរបស់លោកស្រី ក្នុងការរួមចំណែកអភិវឌ្ឍន៍ធនធានមនុស្ស។

ការប្រគល់ភារកិច្ចថ្មីនេះ គឺធ្វើឡើងដើម្បីបំពេញមុខតំណែងជំនួស លោក ចេង លីមហ៊ាន់ ដែលត្រូវបានដាក់ឱ្យចូលនិវត្តន៍ ទៅតាមកាលកំណត់នៃអាយុការងារ។ រាជរដ្ឋាភិបាលតែងតែយកចិត្តទុកដាក់ខ្ពស់ចំពោះការរៀបចំរចនាសម្ព័ន្ធដឹកនាំស្ថាប័នរដ្ឋ ដើម្បីធានាបាននូវដំណើរការរលូន និងប្រសិទ្ធភាពការងារ ជាពិសេសក្នុងវិស័យអប់រំ ដែលជាឆ្អឹងខ្នងដ៏សំខាន់សម្រាប់ការកសាងអនាគតប្រទេសជាតិ។ ការផ្លាស់ប្តូរតំណែងនេះ គឺជាផ្នែកមួយនៃយន្តការគ្រប់គ្រងធនធានមនុស្សរបស់រដ្ឋាភិបាល ដើម្បីធានាថា ស្ថាប័ននីមួយៗមានថ្នាក់ដឹកនាំដែលមានសមត្ថភាព និងភាពជាអ្នកដឹកនាំច្បាស់លាស់។

នៅក្នុងអនុក្រឹត្យដដែលនោះ សម្តេចធិបតី ហ៊ុន ម៉ាណែត ក៏បានបង្គាប់ឱ្យ រដ្ឋមន្ត្រីទទួលបន្ទុកទីស្តីការគណៈរដ្ឋមន្ត្រី រដ្ឋមន្ត្រីក្រសួងសេដ្ឋកិច្ចនិងហិរញ្ញវត្ថុ រដ្ឋមន្ត្រីក្រសួងអប់រំ យុវជន និងកីឡា រដ្ឋមន្ត្រីក្រសួងមុខងារសាធារណៈ រដ្ឋបាលខេត្តព្រះវិហារ និងប្រធានគ្រប់ស្ថាប័នដែលពាក់ព័ន្ធ ព្រមទាំងសាមីខ្លួន (លោកស្រី គីម គន្ធារីន) ត្រូវទទួលបន្ទុកអនុវត្តអនុក្រឹត្យនេះតាមភារកិច្ចរៀងៗខ្លួន ចាប់ពីថ្ងៃចុះហត្ថលេខានេះតទៅ។ ការណែនាំនេះបង្ហាញពីការយកចិត្តទុកដាក់របស់ប្រមុខរាជរដ្ឋាភិបាល ក្នុងការធានាឱ្យការអនុវត្តភារកិច្ចថ្មីនេះ ប្រព្រឹត្តទៅដោយរលូន និងមានការសហការល្អពីគ្រប់ភាគីពាក់ព័ន្ធ។

ការតែងតាំងលោកស្រី គីម គន្ធារីន ក្នុងតំណែងជាប្រធានមន្ទីរអប់រំ យុវជន និងកីឡា ខេត្តព្រះវិហារ ត្រូវបានគេរំពឹងថា នឹងបន្តរួមចំណែកយ៉ាងសកម្មក្នុងការលើកកម្ពស់គុណភាពអប់រំ ពង្រឹងសមត្ថភាពយុវជន និងជំរុញវិស័យកីឡាឱ្យកាន់តែរីកចម្រើនថែមទៀតនៅក្នុងខេត្ត។ វិស័យអប់រំ យុវជន និងកីឡា គឺជាមូលដ្ឋានគ្រឹះដ៏សំខាន់សម្រាប់ការអភិវឌ្ឍសង្គមជាតិប្រកបដោយចីរភាព និងការកសាងធនធានមនុស្សប្រកបដោយគុណភាព ស្របតាមចក្ខុវិស័យរបស់រាជរដ្ឋាភិបាលសម្រាប់កម្ពុជាឆ្នាំ២០៥០៕