(ព្រះវិហារ)៖ លោកស្រី Julia Battle ជាប្រធានផ្នែកសុខភាព និងអាហារូបត្ថម្ភ របស់អង្គការយូនីសេហ្វ (UNICEF) ប្រចាំប្រទេសកម្ពុជា នៅថ្ងៃទី៧ ខែកក្កដា ឆ្នាំ២០២៦ ចុះពិនិត្យការផ្តល់សេវានៅមណ្ឌលសុខភាពតាកឹង ស្រុកគូលែន ខេត្តព្រះវិហារ។

ពិធីនេះសម្របសម្រួលលោកវេជ្ជបណ្ឌិត គួង ឡូ ទីប្រឹក្សាក្រសួងសុខាភិបាល និងជាប្រធានមន្ទីរសុខាភិបាលខេត្តព្រះវិហារ ដោយមានការអមដំណើរពីលោកវេជ្ជបណ្ឌិត យុន សោភ័ណតារា ប្រធានការិយាល័យសុខាភិបាលស្រុកប្រតិបត្តិត្បែងមានជ័យ ព្រមទាំងសហការីផងដែរ។

គោលបំណងសំខាន់នៃដំណើរទស្សនកិច្ចនេះ គឺដើម្បីស្វែងយល់ឱ្យកាន់តែស៊ីជម្រៅអំពីលទ្ធផលនៃកិច្ចសហប្រតិបត្តិការរវាងក្រសួងសុខាភិបាល និងអង្គការយូនីសេហ្វ ក្នុងការលើកកម្ពស់គុណភាពសេវាសុខាភិបាលនៅតាមមូលដ្ឋាន។ ជាពិសេស គឺការកសាងសមត្ថភាពមន្ត្រីសុខាភិបាល តាមរយៈកម្មវិធីបណ្តុះបណ្តាល ការបង្វឹកជំនាញ និងការផ្គត់ផ្គង់ឧបករណ៍សង្គ្រោះជីវិត ដែលទាំងអស់នេះ ត្រូវបានគាំទ្រដោយរដ្ឋាភិបាលសាធារណរដ្ឋកូរ៉េ សហរដ្ឋអាមេរិក និងអង្គការ Gavi។

ក្នុងឱកាសនោះ ក្រុមការងារបានចុះពិនិត្យដោយផ្ទាល់លើដំណើរការផ្តល់សេវាសុខភាពនៅមណ្ឌលសុខភាពតាកឹង និងការប្រើប្រាស់សម្ភារៈបរិក្ខារវេជ្ជសាស្ត្រសំខាន់ៗ។ សម្ភារៈទាំងនោះរួមមាន ម៉ាស៊ីនស្តាប់ចង្វាក់បេះដូងទារកក្នុងផ្ទៃ សម្ភារៈសង្គ្រោះទារកទើបនឹងកើត ខោបន្ថយស្លក់ ជញ្ជីង ម៉ែត្រវាស់កម្ពស់ និងប្រវែង ព្រមទាំងបរិក្ខារចាំបាច់ផ្សេងៗទៀត ដែលបានផ្តល់ជូនដើម្បីគាំទ្រដល់ការផ្តល់សេវាសុខភាពមាតា ទារក និងកុមារ។

លោកវេជ្ជបណ្ឌិត គួង ឡូ បានកោតសរសើរយ៉ាងខ្លាំងចំពោះកិច្ចសហការដ៏ល្អរវាងអង្គការយូនីសេហ្វ និងដៃគូអភិវឌ្ឍន៍ទាំងអស់ ដែលបានរួមចំណែកយ៉ាងសកម្មក្នុងការលើកកម្ពស់គុណភាពសេវាសុខាភិបាលនៅតាមមូលដ្ឋាន។

ទន្ទឹមនឹងនេះ លោកក៏បានណែនាំដល់មន្ត្រីសុខាភិបាលទាំងអស់ ឱ្យបន្តយកចិត្តទុកដាក់ខ្ពស់ក្នុងការប្រើប្រាស់ ថែទាំ និងរក្សាទុកសម្ភារៈបរិក្ខារវេជ្ជសាស្ត្រទាំងនេះឱ្យបានត្រឹមត្រូវ និងមានប្រសិទ្ធភាពខ្ពស់។ ការណែនាំនេះ គឺដើម្បីធានាថាប្រជាពលរដ្ឋ ជាពិសេសស្ត្រីមានផ្ទៃពោះ មាតា ទារកទើបនឹងកើត និងកុមារ ទទួលបានសេវាសុខាភិបាលប្រកបដោយគុណភាព សុវត្ថិភាព និងទាន់ពេលវេលា។

បន្ទាប់ពីបញ្ចប់ការពិនិត្យមើលការផ្តល់សេវារបស់មណ្ឌលសុខភាពតាកឹង លោកវេជ្ជបណ្ឌិត គួង ឡូ និងសហការី បានបន្តដឹកនាំក្រុមការងាររបស់អង្គការយូនីសេហ្វ ចុះពិនិត្យមើលស្ថានភាពជនភៀសសឹកនៅក្នុងភូមិតាកឹងបៃតង។ ដំណើរទស្សនកិច្ចទីពីរនេះ មានគោលបំណងពិនិត្យទីតាំងប៉ុស្តិ៍សុខភាព ដែលត្រូវបានរៀបចំឡើងសម្រាប់ផ្តល់សេវាជូនជនភៀសសឹក។ ក្នុងឱកាសនោះ ក៏មានសកម្មភាពផ្តល់សេវាថែទាំផ្ទៃពោះមុនសម្រាល និងថែទាំក្រោយសម្រាលជូនដល់ស្ត្រីដែលជាជនភៀសសឹកកំពុងស្នាក់នៅទីនោះផងដែរ។

ប្រធានមន្ទីរសុខាភិបាលខេត្តព្រះវិហារ បានបញ្ជាក់ថា ដំណើរទស្សនកិច្ចទាំងមូលនេះ បានបង្ហាញយ៉ាងច្បាស់ពីការប្តេជ្ញាចិត្តរួមគ្នារវាងក្រសួងសុខាភិបាល អង្គការយូនីសេហ្វ និងដៃគូអភិវឌ្ឍន៍នានា ក្នុងការបន្តពង្រឹងប្រព័ន្ធសុខាភិបាលនៅថ្នាក់មូលដ្ឋាន។ គោលដៅចុងក្រោយ គឺធានាឱ្យប្រជាពលរដ្ឋគ្រប់រូប ទទួលបានសេវាសុខភាពប្រកបដោយសមធម៌ និងគុណភាពខ្ពស់ ដើម្បីលើកកម្ពស់សុខុមាលភាពសង្គមទាំងមូល៕