(បរទេស)៖ អាហ្សង់ទីន ម្ចាស់ការពារតំណែងជើងឯកបានបន្តឆ្លងទៅវគ្គ ៨ក្រុមនៃ FIFA World Cup 2026 ជាបន្តទៀត បន្ទាប់ពីវាយបកបាន ៣គ្រាប់ត្រឹម ២៣នាទីដែលនៅសល់ ដើម្បីយកឈ្នះអេហ្ស៊ីប ៣-២ ដ៏អស្វារ្យនារាត្រីថ្ងៃអង្គារ ទី០៧ ខែកក្កដា។

អេហ្ស៊ីបមកពីតំបន់អាហ្រ្វិក ដែលមានកីឡាករស្នូល Mohamed Salah ជាប្រធានក្រុមផងនោះ បានបើកការនាំមុខ ២គ្រាប់មុននៅនាទី១៥ និងនាទី៦៧ នៅពេលប្រធានក្រុម Lionel Messi មានឱកាសទាត់បាល់ប៉េណាល់ទីតាមស្មើ ១-១ ប៉ុន្តែត្រូវបានអ្នកចាំទីសង្រ្គោះបាន។

ទោះជាយ៉ាងណា អាហ្សង់ទីនដែលជាក្រុមតែមួយគត់មកពីតំបន់អាមេរិកឡាទីន និងព្យាយាមឈ្នះជើងឯក World Cup ជាលើកទី៤ ដើម្បីតាមស្មើអាល្លឺម៉ង់ និងអ៉ីតាលីផងនោះ បានខិតខំវាយបក និងដាក់សម្ពាធយ៉ាងខ្លាំងទៅលើអេហ្ស៊ីបរហូតរកបានគ្រាប់បាល់ជាបន្តបន្ទាប់នៅនាទី៧៩ ពីការបញ្ជូនរបស់ Messi និង ៤នាទីបន្ទាប់គ្រាប់តាមស្មើ ២-២ របស់ Messi។

កីឡាករ Enzo Fernandez មកពីក្លិបតោខៀវ Chelsea ជាអ្នករកបានគ្រាប់ជ័យជម្នះ ៣-២ នៅនាទី៩០+២ ពីការបញ្ជូនរបស់ Lautaro Martinez ធ្វើឱ្យអេហ្ស៊ីបកកឈាម និងហាលអាវត្រឡប់ផ្ទះវិញត្រឹមវគ្គ ១៦ក្រុមនេះ។

អាហ្សង់ទីន ត្រូវប៉ះក្រុមនៅអឺរ៉ុប អឌ្ឍចន្ទក្រហម ស្វីស ដែលបានទម្លាក់ក្រុមមកពីតំបន់អាមេរិកឡាទីន កូឡុំប៊ី ដោយបាល់ប៉េណាល់ទីកាត់សេចក្តី ៤-៣ ក្រោយប្រកួត ៩០នាទីពេញ និងថែម ១៥នាទី ២ដងស្មើគ្នា ០-០ នៅពេលម៉ារ៉ុក ប៉ះបារាំង, ន័រវេស ជួបអង់គ្លេស និងអេស្ប៉ាញ ប៉ះប៊ែលហ្ស៊ិក នៃវគ្គ ៨ក្រុមដែលចាប់ផ្តើមប្រកួតពីរាត្រីថ្ងៃទី១០ ខែកក្កដាតទៅ៕