(បន្ទាយមានជ័យ)៖ លោក អ៊ុំ រាត្រី អភិបាលខេត្តបន្ទាយមានជ័យ បានដាក់បទបញ្ជាយ៉ាងម៉ឺងម៉ាត់ទៅដល់ក្រុង-ស្រុកទាំងអស់ ព្រមទាំងមេឃុំ-ចៅសង្កាត់ និងភូមិ ទូទាំងខេត្ត បន្តបោសសម្អាតករណីឆបោកតាមប្រព័ន្ធបច្ចេកវិទ្យា (Online Scams) ដែលក្រុមនេះក៏បានធ្វើការផ្តាច់ខ្លួនពីក្រុមធំៗ មកជាក្រុមតូច ដែលកំពុងបង្កប់ខ្លួននៅតាមផ្ទះសំណាក់ និងតាមរថយន្តជាដើម។

លោកអភិបាលខេត្ត បានដាក់បទបញ្ជាយ៉ាងម៉ឺងម៉ាត់បែបនេះ ខណៈដឹកនាំកិច្ចប្រជុំពិភាក្សាការងារមួយចំនួន ជាមួយអភិបាលរងខេត្ត អភិបាលក្រុង-ស្រុក ចំនួន៨ (ក្នុងចំណោម៩ក្រុង-ស្រុក) រួមនឹងមេឃុំ-ចៅសង្កាត់ ប្រារព្ធធ្វើឡើងនៅសាលប្រជុំ ក សាលាខេត្តបន្ទាយមានជ័យ នារសៀលថ្ងៃទី០៧ ខែកក្កដា ឆ្នាំ២០២៦។

ពាក់ព័ន្ធទៅនឹងបញ្ហានេះផងដែរ ក្រោយមានការរកឃើញ និងចុះបង្ក្រាបទីតាំងឆបោកតាមប្រព័ន្ធបច្ចេកវិទ្យា (Online Scams) នៅក្នុងភូមិសាស្រ្តក្រុងសិរីសោភ័ណនាពេលថ្មីៗ ដោយក្រុមឧក្រិដ្ឋជនបានបំបែកខ្លួនពីក្រុងប៉ោយប៉ែត មកសម្ងំលាក់ខ្លួនប្រព្រឹត្តការឆបោកតាមប្រព័ន្ធបច្ចេកវិទ្យា (Online Scams) ក្នុងក្រុងសិរីសោភ័ណ។ ជាមួយគ្នានោះ អាជ្ញាធរ និងសមត្ថកិច្ចកំពុងបន្តស្រាវជ្រាវទីតាំងសង្ស័យបន្ថែមទៀត ដើម្បីធ្វើការបង្ក្រាបបោសសម្អាតឱ្យអស់។

ដើម្បីឱ្យកិច្ចការងារនេះសម្រេចទៅបាន, លោក អ៊ុំ រាត្រី បានណែនាំដល់ក្រុង-ស្រុក ជាពិសេសមេឃុំ-ចៅសង្កាត់ និងភូមិ ត្រូវសហការក្នុងការចុះស្រង់ទិន្នន័យចំនួនជនបរទេស ដែលស្ថិតនៅក្នុងមូលដ្ឋានរបស់ខ្លួន។ ប្រសិនបើមានករណីសង្ស័យថា មានកន្លែងលួចបង្កប់ការឆបោកតាមប្រព័ន្ធបច្ចេកវិទ្យា (Online Scams) សូមរាយការណ៍មកអាជ្ញាធរមានសមត្ថកិច្ច ដើម្បីធ្វើការចុះប្រតិបត្តិការបង្ក្រាបឱ្យបានទាន់ពេលវេលា។

ជាមួយគ្នានោះ លោកអភិបាលខេត្ត ក៏បានក្រើនរំលឹកដល់អាជ្ញាធរពាក់ព័ន្ធ បន្តផ្សព្វផ្សាយអនុក្រឹត្យលេខ ០៣ អនក្រ.បក ចុះថ្ងៃទី៥ ខែមករា ឆ្នាំ២០២៦ របស់រាជរដ្ឋាភិបាល ស្តីពីការគ្រប់គ្រងសន្តិសុខសុវត្ថិភាពតាមទីតាំងរស់នៅប្រមូលផ្តុំ ដល់ម្ចាស់ទីតាំងសណ្ឋាគារ ផ្ទះសំណាក់ ឱ្យចូលរួមសហការជាមួយអាជ្ញាធរ រាយការណ៍ពីជនបរទេសដែលមកស្នាក់នៅ។ ប្រសិនបើរកឃើញម្ចាស់ទីតាំងណាផ្តល់ទីតាំងឱ្យជនបរទេសស្នាក់នៅប្រព្រឹត្តការឆបោកតាមប្រព័ន្ធបច្ចេកវិទ្យា (Online Scams) នឹងប្រឈមទៅនឹងការផ្តន្ទាទោសទៅតាមផ្លូវច្បាប់។ ការអនុវត្តបទបញ្ជានេះ គឺដើម្បីធានាសន្តិសុខ សណ្តាប់ធ្នាប់សាធារណៈ និងការពារប្រជាពលរដ្ឋពីបទល្មើសឆបោកគ្រប់រូបភាព៕