(បរទេស)៖ បណ្តាក្រុមទាំងឡាយដែលបានឈានមកដល់វគ្គ ៨ក្រុមចុងក្រោយនៃព្រឹត្តិការណ៍បាល់ទាត់ជើងឯក ពិភពលោក FIFA World Cup 2026 គេសង្កេតឃើញថា គោជល់អេស្ប៉ាញ ជាក្រុមតែមួយគត់ដែលធ្វើបានល្អជាងគេ និងផ្តួលសុទ្ធតែគូប្រជែងនៅតំបន់អឺរ៉ុបដូចគ្នាថែមទៀត។

អេស្ប៉ាញ អតីតម្ចាស់ជើងឯក World Cup តែ ១លើកកាលឆ្នាំ២០១០ នៅអាហ្រ្វិកខាងត្បូង ពុំទាន់មានក្រុមណាមួយទាត់បញ្ចូលទីពួកគេឡើយ ក្នុងចំណោម ៥ប្រកួតកន្លងមកនេះ។

ពួកគេបានបិទសំណាញ់ទីជិតឈឹងតែម្តង (clean sheet) ពីការរារាំងដោយកីឡាករចាំទីដៃស្អិត Unai Simon ដែលត្រូវបានជ្រើសរើសចេញពីក្លិបក្នុងស្រុក Athletic Bilbao ក្នុងនាមជាក្រុមដែលបានវាយបកឈ្នះតោកំណាចអង់គ្លេស ២-១ កាលផ្តាច់ព្រ័ត្រ Euro 2024 នៅប្រទេសអាល្លឺម៉ង់។

អេស្ប៉ាញ បានបំបាក់ក្រុមនៅអឹរ៉ុបដូចគ្នា អូទ្រីស ៣-០ នៃវគ្គ ៣២ក្រុម បើទោះបីគូប្រជែងខិតខំវាយសម្រុកយ៉ាងណាក៏ដោយ និងជាពិសេសពេលលេងទល់នឹងបច្ចខែលព័រទុយហ្គាល់ ដែលពួកគេបានទម្លាក់ ១-០ ចេញពី World Cup 2026 ត្រឹមវគ្គ ១៦ក្រុម បើទោះបីជា Ronaldo, Silva និង Vitinha ខិតខំដើម្បីទម្លុះសំណាញ់ទីយ៉ាងណាក៏ដោយ។

I. ស្ថិតិរបស់ក្រុមជម្រើសជាតិអេស្ប៉ាញ ក្រោយឆ្លងកាត់ ៥ប្រកួតកន្លងមកមានដូចខាងក្រោម៖

១៖ អេស្ប៉ាញ ០-០ កាប់វ៉េ (អាហ្រ្វិក) ពូល H

២៖ អេស្ប៉ាញ ៤-០ អារ៉ាប៊ីសាអូឌីត (អាស៊ី) ពូល H

៣៖ អេស្ប៉ាញ ១-០ អ៊ុយរូហ្គាយ (ឡាទីន) ពូល H

៤៖ អេស្ប៉ាញ ៣-០ អូទ្រីស (វគ្គ ៣២ក្រុម)

៥៖ អេស្ប៉ាញ ១-០ ព័រទុយហ្គាល់ (វគ្គ ១៦ក្រុម)។

II. ខាងក្រោមនេះជាកាលបរិច្ឆេទ និងគូប្រកួតក្នុងវគ្គ ៨ក្រុម World Cup 2026 (ម៉ោងនៅកម្ពុជា)

១៖ បារាំង (អឺរ៉ុប) ប៉ះ ម៉ារ៉ុក (អាហ្រ្វិក) ម៉ោង ៣ទៀបភ្លឺ (ព្រឹកថ្ងៃទី១០ ខែកក្កដា)

២៖ អេស្ប៉ាញ (អឺរ៉ុប) ប៉ះ ប៊ែលហ្ស៊ិក (អឺរ៉ុប) ម៉ោង ២រំលងអាធ្រាត្រ (ព្រឹកថ្ងៃទី១១ ខែកក្កដា)

៣៖ អង់គ្លេស (អឺរ៉ុប) ប៉ះ ន័រវេស (អឺរ៉ុប) ម៉ោង ៤ទៀបភ្លឺ (ព្រឹកថ្ងៃទី១២ ខែកក្កដា)

៤៖ អាហ្សង់ទីន (ឡាទីន) ប៉ះ ស្វីស (អឺរ៉ុប) ម៉ោង ៨ព្រឹក (ព្រឹកថ្ងៃអាទិត្យ ទី១២ ខែកក្កដា)៕