(កំពត)៖ នៅព្រឹកថ្ងៃទី៨ ខែកក្កដា ឆ្នាំ២០២៦ តំណាងអង្គការសង្គមស៊ីវិលក្នុងខេត្តកំពត និងខេត្តកែប រួមជាមួយ​តំណាងមន្ទីរជំនាញចំណុះរដ្ឋបាលខេត្តទាំងពីរ បានអញ្ជើញចូលរួមក្នុងវេទិកាសន្ទនា «ការពង្រឹងសមត្ថភាពអង្គការ សង្គមស៊ីវិលក្នុងយុគសម័យឌីជីថល» ដែលសហការរៀបចំដោយវេទិកាសម្ព័ន្ធសង្គមស៊ីវិល (វ.ស.ស.) រដ្ឋបាលខេត្តកំពត និងរដ្ឋបាលខេត្តកែប។

វេទិកាសន្ទនានេះបានប្រព្រឹត្តទៅក្រោមអធិបតីភាពលោក ដួង វីរ័ត្ន អនុប្រធានប្រចាំការនៃក្រុមប្រឹក្សាភិបាល វ.ស.ស. តំណាងលោក កឹមរ័ត្ន វិសិដ្ឋ នាយករងខុទ្ទកាល័យសម្តេចធិបតី ហ៊ុន ម៉ាណែត និងជាប្រធានក្រុមប្រឹក្សាភិបាល វ.ស.ស. រួមជាមួយលោក អ៊ឹង ឆាយ អភិបាលខេត្តកំពត និងលោក ញ៉ន សិទ្ធិ អភិបាលរងខេត្តកែប។

ថ្លែងក្នុងអង្គវេទិកាសន្ទនានាព្រឹកនោះលោក ដួង វីរ័ត្ន បានកោតសរសើរ និងវាយតម្លៃខ្ពស់ចំពោះកិច្ចខិតខំប្រឹងប្រែងរបស់អង្គការសង្គមស៊ីវិលក្នុងមូលដ្ឋានខេត្តទាំងពីរ ដែលបានសហការយ៉ាងជិតស្និទ្ធជាមួយអាជ្ញាធរ​មូលដ្ឋានក្នុងការបំពេញបេសកកម្មតាមវិស័យរៀងៗខ្លួន និងសម្រេចបានសមិទ្ធផលយ៉ាងធំធេងនាពេលកន្លងមក។

លោកបានគូសបញ្ជាក់ថា វ.ស.ស. នឹងបន្តពង្រឹងវប្បធម៌សន្ទនារវាងអង្គការសង្គមស៊ីវិលនិងអាជ្ញាធរ​មូលដ្ឋាន ដើម្បីរួមគ្នាដោះស្រាយបញ្ហាប្រឈមនានា សំដៅបម្រើដល់ផលប្រយោជន៍របស់ប្រជាពលរដ្ឋ។

ទន្ទឹមនឹងនេះ លោកបានបន្ថែមថា រាជរដ្ឋាភិបាល នីតិកាលទី៧ នៃរដ្ឋសភា ក្រោមការដឹកនាំប្រកបដោយគតិបណ្ឌិតរបស់សម្តេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា តែងតែយកចិត្តទុកដាក់ខ្ពស់ចំពោះអង្គការសង្គមស៊ីវិល ដែលជាដៃគូមិនអាចខ្វះបានសម្រាប់ជំរុញការអភិវឌ្ឍលើគ្រប់វិស័យ​នៅថ្នាក់មូលដ្ឋាន។ ស្របពេលដែលកម្ពុជាមានទស្សនវិស័យឈានទៅបង្កើតសេដ្ឋកិច្ចនិងសង្គមឌីជីថល បរិវត្តកម្មឌីជីថលពិតជាមានសារៈសំខាន់ណាស់ សម្រាប់អង្គការសង្គមស៊ីវិលក្នុងការបង្កើនសមត្ថភាពខ្លួន ឱ្យឆ្លើយតបទៅនឹងការវិវត្តនៃបច្ចេកវិទ្យានាពេលបច្ចុប្បន្ន និងដើម្បីចូលរួមជាមួយរាជរដ្ឋាភិបាលក្នុងការសម្រេចបាន​នូវគោលដៅអភិវឌ្ឍន៍កម្ពុជាឆ្នាំ២០៥០។

ក្នុងឱកាសនោះដែរលោក អ៊ឹង ឆាយ បានជំរុញឱ្យអង្គការសង្គមស៊ីវិលក្នុងមូលដ្ឋានបន្តពង្រឹងសមត្ថភាពផ្នែក​ចំណេះដឹងឌីជីថល ដើម្បីបង្កើនប្រសិទ្ធភាពការងារ​ឱ្យកាន់តែប្រសើរឡើងថែមទៀត។ ជាមួយគ្នានេះលោក​ក៏បានលើកទឹកចិត្តឱ្យអង្គការសង្គមស៊ីវិលបន្តចូលរួមចំណែកជាមួយរាជរដ្ឋាភិបាល ក្នុងការអភិវឌ្ឍសេដ្ឋកិច្ចសង្គម ដោយផ្តោតជាសំខាន់លើផែនការវិនិយោគឃុំ-សង្កាត់ ដើម្បីបន្ស៊ីផែនការវិនិយោគមូលដ្ឋានជាមួយគម្រោង​ជំនួយអភិវឌ្ឍន៍របស់អង្គការសង្គមស៊ីវិល។

ដើម្បីផ្តល់ឱកាសឱ្យតំណាងអង្គការសង្គមស៊ីវិលក្នុងខេត្តទាំងពីរបានឈ្វេងយល់អំពីបរិវត្តកម្មឌីជីថល ដែលជា​អាទិភាពគន្លឹះមួយរបស់រាជរដ្ឋាភិបាល នីតិកាលទី៧ វ.ស.ស. បានរៀបចំឱ្យមានបទបង្ហាញស្តីពី «ការយល់ដឹង​អំពីអក្ខរកម្មឌីជីថលនិងសុវត្ថិភាពតាមប្រព័ន្ធបច្ចេកវិទ្យាសម្រាប់អង្គការសង្គមស៊ីវិល» ដោយមន្ត្រីជំនាញមកពី​ក្រសួងប្រៃសណីយ៍និងទូរគមនាគមន៍។ នេះគឺជាការចូលរួមចំណែករបស់ វ.ស.ស. ក្នុងការពង្រឹងសមត្ថភាពបន្ថែម សម្រាប់អង្គការសង្គមស៊ីវិល ក្នុងការអភិវឌ្ឍសេដ្ឋកិច្ចសង្គមនៅថ្នាក់មូលដ្ឋានឱ្យកាន់តែល្អប្រសើរ៕