(ភ្នំពេញ)៖ គិតត្រឹមថ្ងៃទី៨ ខែកក្កដា ឆ្នាំ២០២៦ ក្រុមការងាររដ្ឋបាលខណ្ឌដង្កោ បាននិងកំពុងបន្តប្រតិបត្តិការស្តារកាយភក់ និងសំរាមចេញពីប្រឡាយម័ល ក្នុងភូមិម័ល សង្កាត់ដង្កោ ខណ្ឌដង្កោ រាជធានីភ្នំពេញ ដោយសម្រេចបានប្រវែង ៧៩០ម៉ែត្រ ក្នុងចំណោមប្រវែងសរុប ៣៣០០ម៉ែត្រ។ កិច្ចការនេះ ធ្វើឡើងក្នុងគោលបំណងដ៏សំខាន់ ដើម្បីត្រៀមរំដោះជំនន់ទឹកភ្លៀង និងបញ្ចៀសការជន់លិចផ្ទះសម្បែងប្រជាពលរដ្ឋ ក៏ដូចជាហេដ្ឋារចនាសម្ព័ន្ធនានា ក្នុងរដូវវស្សាឆ្នាំនេះ។

លោកស្រី ដោ សម្ផស្ស នាយករងរដ្ឋបាល និងជាអ្នកនាំពាក្យរដ្ឋបាលរាជធានីភ្នំពេញ បានប្រាប់អ្នកសារព័ត៌មាននៅថ្ងៃទី០៨ ខែកក្កដា ឆ្នាំ២០២៦ថា ការងារស្តារប្រឡាយម័ល ដែលមានប្រវែងសរុប ៣៣០០ម៉ែត្រ និងទទឹងពី ២៥ ទៅ ៣០ម៉ែត្រ នេះ បានចាប់ផ្តើមតាំងពីថ្ងៃទី២៥ ខែមិថុនា ឆ្នាំ២០២៦ មកម្ល៉េះ។ គិតមកដល់បច្ចុប្បន្ននេះ មានរយៈពេល ១៤ថ្ងៃហើយ ដែលក្រុមការងារបានប្រើប្រាស់គ្រឿងចក្រចំនួន ២គ្រឿង ដើម្បីអនុវត្តការងារនេះយ៉ាងសកម្ម និងប្រកបដោយការទទួលខុសត្រូវខ្ពស់។ លទ្ធផលបឋមនៃការងាររយៈពេលពីរ សប្តាហ៍នេះ គឺសម្រេចបានការស្តារប្រឡាយប្រវែង ៧៩០ម៉ែត្រ ដែលជាសញ្ញាណវិជ្ជមានមួយ ឆ្ពោះទៅរកការបញ្ចប់គម្រោងទាំងស្រុង។

លោកស្រី ដោ សម្ផស្ស ក៏បានបញ្ជាក់បន្ថែមទៀតថា បន្ទាប់ពីការងារស្តារកាយភក់ និងសំរាមចេញពីប្រឡាយបានរួចរាល់ជាស្ថាពរ ក្រុមការងារនឹងបន្តអនុវត្តការងារបុកស៊ីផាយ ដើម្បីពង្រឹង និងបញ្ចប់នៅចំណុច ដែលនៅសេសសល់។ នេះជាការបង្ហាញពីការប្តេជ្ញាចិត្តខ្ពស់របស់រដ្ឋបាលរាជធានីភ្នំពេញ ក្នុងការធានាថា ប្រព័ន្ធលូបង្ហូរទឹកនៅក្នុងរាជធានីមានដំណើរការល្អប្រសើរ និងអាចទប់ទល់នឹងបរិមាណទឹកភ្លៀងដ៏ច្រើន ក្នុងរដូវវស្សា។

កិច្ចការដ៏សំខាន់នេះ ត្រូវបានធ្វើឡើងក្រោមការយកចិត្តទុកដាក់ខ្ពស់ និងការណែនាំផ្ទាល់ពីលោក ឃួង ស្រេង អភិបាល នៃគណៈអភិបាលរាជធានីភ្នំពេញ។ ផែនការយុទ្ធសាស្ត្រនេះ គឺមានគោលដៅចម្បងក្នុងការរំដោះជំនន់ទឹកភ្លៀង ប្រកបដោយប្រសិទ្ធភាព ដើម្បីការពារទ្រព្យសម្បត្តិ និងធានាសុវត្ថិភាពជូនប្រជាពលរដ្ឋ ក៏ដូចជាថែរក្សាហេដ្ឋារចនាសម្ព័ន្ធសាធារណៈនានា ឱ្យស្ថិតស្ថេរគង់វង្ស។

ជាមួយគ្នានេះ លោកស្រី ដោ សម្ផស្ស ក៏បានធ្វើការអំពាវនាវយ៉ាងទទូចដល់បងប្អូនប្រជាពលរដ្ឋទាំងអស់ ដែលរស់នៅជាប់នឹងប្រឡាយម័ល ក៏ដូចជាប្រឡាយនានា សូមមេត្តាចូលរួមថែរក្សាប្រឡាយដែលបានស្តាររួច ដោយទុកដាក់សំរាមវេចខ្ចប់ឱ្យបានត្រឹមត្រូវ និងមានអនាម័យ។ ការចូលរួមរបស់ប្រជាពលរដ្ឋ គឺជាកត្តាចាំបាច់បំផុតក្នុងការរក្សាបាននូវអនាម័យបរិស្ថានល្អប្រសើរ បញ្ចៀសការលិចលង់ដោយសារសំរាមស្ទះប្រឡាយ និងរួមចំណែកកសាងសោភ័ណភាពរាជធានីភ្នំពេញរបស់យើងឱ្យកាន់តែស្រស់ស្អាត និងប្រកបដោយផាសុកភាពសម្រាប់ទាំងអស់គ្នា។ ការថែរក្សាប្រព័ន្ធលូបង្ហូរទឹកឱ្យបានល្អ គឺជាទំនួលខុសត្រូវរួម ដែលធានាដល់ការរស់នៅប្រកបដោយសុខដុមរមនា និងការអភិវឌ្ឍប្រកបដោយចីរភាពរបស់រាជធានីភ្នំពេញ៕