(តាកែវ)៖ លោកឱសថការី ផាន់ វ៉ាន់ ប្រធានមន្ទីរសុខាភិបាលនៃរដ្ឋបាលខេត្តតាកែវ បានដឹកនាំក្រុមការងារប្រយុទ្ធនឹងជំងឺគ្រុនឈាម ចុះធ្វើសកម្មភាពអប់រំ ផ្សព្វផ្សាយ និងអនុវត្តវិធានការបង្ការជំងឺគ្រុនឈាមយ៉ាងសកម្ម នៅតាមបណ្ដាភូមិ ក្រុង ស្រុកនានាក្នុងខេត្ត។ យុទ្ធនាការនេះធ្វើឡើងក្នុងគោលបំណងពង្រឹងការយល់ដឹង និងជំរុញការចូលរួមរបស់ប្រជាពលរដ្ឋក្នុងការទប់ស្កាត់ការរីករាលដាលនៃជំងឺគ្រុនឈាម ដែលជាក្ដីបារម្ភចំពោះសុខភាពសាធារណៈ ជាពិសេសក្នុងរដូវវស្សា។

ក្នុងរយៈពេលប៉ុន្មានថ្ងៃកន្លងមកនេះ លោកឱសថការី ផាន់ វ៉ាន់ រួមជាមួយក្រុមការងារជំនាញរបស់មន្ទីរសុខាភិបាល និងប្រធានការិយាល័យស្រុកប្រតិបត្តិក្រុងស្រុក បានចុះផ្ទាល់ដល់មូលដ្ឋាន ដើម្បីពន្យល់ណែនាំប្រជាពលរដ្ឋអំពីសារៈសំខាន់នៃការរក្សាអនាម័យបរិស្ថាន។ សកម្មភាពសំខាន់ៗដែលបានអនុវត្តរួមមាន ការលុបបំបាត់ថ្លុកទឹកដែលដក់នៅជុំវិញផ្ទះ ការកាប់ឆ្ការព្រៃ និងគុម្ពោតព្រៃដែលជាជម្រកមូស ការបាញ់ថ្នាំសម្លាប់មូសពេញវ័យ និងការដាក់ថ្នាំអាបែត (Abate) ទៅក្នុងពាង អាងទឹក ឬធុងទឹកនានា ដើម្បីសម្លាប់ដង្កូវទឹក។ វិធានការទាំងនេះ គឺដើម្បីកាត់បន្ថយប្រភពបង្កាត់ពូជមូសខ្លា ដែលជាភ្នាក់ងារចម្លងជំងឺគ្រុនឈាម។

លោកឱសថការី ផាន់ វ៉ាន់ បានថ្លែងបញ្ជាក់ថា យុទ្ធនាការនេះគឺអនុវត្តតាមការណែនាំរបស់ក្រសួងសុខាភិបាល ស្ដីពីការទប់ស្កាត់ និងបង្ការជំងឺគ្រុនឈាម។ មន្ទីរសុខាភិបាលខេត្តតាកែវ បាននិងកំពុងបន្តពង្រីកសកម្មភាពរបស់ខ្លួនទៅកាន់គ្រប់ទីកន្លែង រួមមានតាមផ្ទះប្រជាពលរដ្ឋ សាលារៀន មណ្ឌលសុខភាព និងទីប្រជុំជននានា។ ក្រៅពីការអនុវត្តវិធានការជាក់ស្ដែង ក្រុមការងារក៏បានយកចិត្តទុកដាក់ខ្ពស់លើការផ្សព្វផ្សាយអប់រំសុខភាព និងពន្យល់ប្រជាពលរដ្ឋឱ្យយល់ច្បាស់អំពីរបៀបការពារខ្លួន និងក្រុមគ្រួសារពីជំងឺគ្រុនឈាម ព្រមទាំងរោគសញ្ញានៃជំងឺនេះ។

លោកប្រធានមន្ទីរសុខាភិបាល ក៏បានអំពាវនាវដល់បងប្អូនប្រជាពលរដ្ឋទាំងអស់ និងអាជ្ញាធរពាក់ព័ន្ធគ្រប់លំដាប់ថ្នាក់ ឱ្យបន្តចូលរួមយ៉ាងសកម្មក្នុងការលុបបំបាត់ប្រភពបង្កាត់ពូជមូស។ ការសម្អាតបរិវេណផ្ទះឱ្យបានស្អាតជានិច្ច មិនទុកឱ្យមានដង្កូវទឹក និងការគេងក្នុងមុង គឺជាវិធានការដ៏មានប្រសិទ្ធភាពក្នុងការការពារក្រុមគ្រួសារ និងសហគមន៍ទាំងមូលឱ្យជៀសផុតពីជំងឺគ្រុនឈាម។ ការចូលរួមពីគ្រប់ភាគី គឺជាកត្តាចាំបាច់ដើម្បីធានាបាននូវប្រសិទ្ធភាពយូរអង្វែងនៃយុទ្ធនាការនេះ។

ឆ្លៀតក្នុងឱកាសនេះ លោកឱសថការី ផាន់ វ៉ាន់ ក៏បានអំពាវនាវជាពិសេសដល់មាតាបិតា អាណាព្យាបាល និងប្រជាពលរដ្ឋទូទៅ ឱ្យយកចិត្តទុកដាក់ខ្ពស់ចំពោះសុខភាពកុមារ និងសមាជិកគ្រួសារ។ ប្រសិនបើមានរោគសញ្ញាសង្ស័យថាមានជំងឺគ្រុនឈាម ដូចជា គ្រុនក្ដៅខ្លាំង ឈឺក្បាល ឈឺខ្លួនប្រាណ ក្អួតចង្អោរ ឬមានស្នាមកន្ទួលក្រហមលើស្បែក ត្រូវប្រញាប់បញ្ជូនអ្នកជំងឺទៅកាន់មណ្ឌលសុខភាព ឬមន្ទីរពេទ្យរដ្ឋដែលនៅជិតបំផុតឱ្យបានឆាប់រហ័ស។ ការស្វែងរកការពិនិត្យ និងព្យាបាលទាន់ពេលវេលា គឺជារឿងសំខាន់បំផុតដើម្បីជៀសវាងផលវិបាកធ្ងន់ធ្ងរ ឬគ្រោះថ្នាក់ដល់អាយុជីវិត ដែលអាចកើតឡើងប្រសិនបើការព្យាបាលមានភាពយឺតយ៉ាវ។ យុទ្ធនាការនេះនឹងបន្តពង្រឹងការងារបង្ការ និងអប់រំ ដើម្បីធានាបាននូវសុខភាពល្អរបស់ប្រជាពលរដ្ឋក្នុងខេត្តតាកែវ៕