(កោះកុង)៖ ឧកញ៉ា តែ តាំងប៉ ប្រធានសម្ព័ន្ធសមាគមសហគ្រាសធុនតូច និងមធ្យមកម្ពុជា (FASMEC) នៅព្រឹកថ្ងៃទី៨ ខែកក្កដា ឆ្នាំ២០២៦ បានដឹកនាំគណៈប្រតិភូសមាជិកក្រុមប្រឹក្សាភិបាល អញ្ជើញចូលជួបសម្តែងការគួរសម និងពិភាក្សាការងារជាមួយ លោកជំទាវ ឈី វ៉ា អភិបាលនៃគណៈអភិបាលខេត្តកោះកុង ដើម្បីពង្រឹងកិច្ចសហប្រតិបត្តិការរវាងរដ្ឋ និងវិស័យឯកជន និងជំរុញការអភិវឌ្ឍវិស័យសហគ្រាសធុនតូច និងមធ្យម (SMEs) នៅក្នុងខេត្តកោះកុង។

ក្នុងជំនួបនេះ ឧកញ៉ា តែ តាំងប៉ បានជម្រាបជូនលោកជំទាវអភិបាលខេត្ត អំពីវឌ្ឍនភាព និងកំណើនគួរឱ្យកត់សម្គាល់នៃផលិតផលក្នុងស្រុក ជាពិសេសផលិតផលកសិ-ឧស្សាហកម្ម និងចំណីអាហារកែច្នៃរបស់កម្ពុជា។ ដោយផ្អែកលើទស្សនទាន «រួមគ្នាផលិត រួមគ្នាប្រើប្រាស់ផលិតផលជាតិ» លោកឧកញ៉ាបានលើកឡើងពីគម្រោងរៀបចំបង្កើត តំបន់ប្រមូលផ្តុំសហគ្រាសធុនតូច និងមធ្យម (SME Cluster) និង FASMEC Shop នៅក្នុងខេត្តកោះកុង ដើម្បីពង្រឹងសមត្ថភាពផលិតកម្ម និងពង្រីកទីផ្សារផលិតផលក្នុងស្រុក។

ឧកញ៉ា តែ តាំងប៉ បានមានប្រសាសន៍ថា ការបង្កើត SME Cluster នឹងជួយប្រមូលផ្តុំខ្សែច្រវាក់ផលិតកម្ម សម្រួលដល់ការទទួលបានហេដ្ឋារចនាសម្ព័ន្ធគាំទ្រ ដូចជា អគ្គិសនី ទឹក និងប្រព័ន្ធឡូជីស្ទីក ដែលអាចកាត់បន្ថយថ្លៃដើមផលិត និងពង្រឹងការត្រួតពិនិត្យគុណភាពផលិតផល។ លោកបានបញ្ជាក់ថា ខេត្តកោះកុងមានសក្តានុពលខ្ពស់ ដោយសារជាខេត្តជាប់តំបន់ឆ្នេរ និងព្រំដែន ដែលអំណោយផលដល់សកម្មភាពសេដ្ឋកិច្ច និងពាណិជ្ជកម្ម។

ទន្ទឹមនឹងនេះ លោកឧកញ៉ាក៏បានលើកឡើងអំពីការបង្កើត FASMEC Shop ដែលនឹងដើរតួនាទីជាមជ្ឈមណ្ឌលដាក់តាំងបង្ហាញ លក់ និងចែកចាយផលិតផលរបស់សហគ្រាសធុនតូច និងមធ្យម នៅតាមបណ្តាខេត្តនានាទូទាំងប្រទេស ដើម្បីពង្រីកទីផ្សារ និងបង្កើនឱកាសអាជីវកម្មសម្រាប់សហគ្រិនខ្មែរ។

ជាការឆ្លើយតប លោកជំទាវ ឈី វ៉ា អភិបាលនៃគណៈអភិបាលខេត្តកោះកុង បានសម្តែងការស្វាគមន៍យ៉ាងកក់ក្តៅ និងវាយតម្លៃខ្ពស់ចំពោះកិច្ចខិតខំប្រឹងប្រែងរបស់ FASMEC ក្នុងការជំរុញការអភិវឌ្ឍវិស័យ SMEs។ លោកជំទាវបានសម្តែងការគាំទ្រយ៉ាងពេញទំហឹងចំពោះគំនិតផ្តួចផ្តើមបង្កើត SME Cluster ដោយចាត់ទុកថា ស្របទៅនឹងទិសដៅអភិវឌ្ឍន៍របស់រដ្ឋបាលខេត្ត។

លោកជំទាវអភិបាលខេត្ត ក៏បានបញ្ជាក់ពីការត្រៀមខ្លួនជាស្រេចក្នុងការផ្តល់កិច្ចសហការ និងសម្របសម្រួលតាមនីតិវិធីរដ្ឋបាល ដើម្បីជំរុញឱ្យគម្រោងនេះអាចអនុវត្តបានដោយជោគជ័យ ដែលនឹងរួមចំណែកបង្កើតការងារ បង្កើនប្រាក់ចំណូលជូនប្រជាពលរដ្ឋ និងពង្រឹងសេដ្ឋកិច្ចមូលដ្ឋាន។

ជំនួបពិភាក្សាការងារនេះ បានបញ្ចប់ទៅក្រោមបរិយាកាសស្និទ្ធស្នាល យោគយល់គ្នាខ្ពស់ និងប្រកបដោយផ្លែផ្កា ដែលជាសញ្ញាវិជ្ជមានក្នុងការពង្រឹងភាពជាដៃគូរវាងរដ្ឋ និងវិស័យឯកជន ដើម្បីរួមគ្នាលើកស្ទួយវិស័យសហគ្រាសធុនតូច និងមធ្យមកម្ពុជាឱ្យកាន់តែរឹងមាំ និងមានសមត្ថភាពប្រកួតប្រជែងកាន់តែខ្ពស់៕⁩