(ភ្នំពេញ)៖ កូនឈើចម្រុះជាច្រើនប្រភេទ រាប់ចាប់ពីកូនឈើព្រៃ កូនឈើហូបផ្លែ រហូតដល់កូនត្នោត បាននិងកំពុងដឹកជញ្ជូនមកដល់ជាបន្តបន្ទាប់ ដើម្បីត្រៀមរៀបចំក្នុងពិព័រណ៍ និងចែកជូនប្រជាពលរដ្ឋដោយឥតគិតថ្លៃ ក្នុងយុទ្ធនាការ «ពន្លកបៃតង» ឆ្នាំ២០២៦។

យុទ្ធនាការដ៏សំខាន់នេះ នឹងប្រព្រឹត្តទៅនៅមុខទីស្តីការក្រសួងបរិស្ថាន រាជធានីភ្នំពេញ ចាប់ពីថ្ងៃទី១០ ដល់ថ្ងៃទី១៣ ខែកក្កដា ឆ្នាំ២០២៦ ខាងមុខនេះ។

ក្រសួងបរិស្ថានបានត្រៀមរៀបចំពិព័រណ៍ និងផ្សព្វផ្សាយក្រោមមូលបទ «ពន្លកបៃតង» ឆ្នាំ២០២៦ ក្នុងគោលបំណងពង្រីកគម្របបៃតងនៅកម្ពុជា។ សកម្មភាពនេះ គឺដើម្បីឆ្លើយតបទៅនឹងការប្រែប្រួលអាកាសធាតុជាសកល បង្កើតទ្រព្យសម្បត្តិធម្មជាតិ និងជាខែលការពារបរិស្ថានដ៏មានតម្លៃបំផុតសម្រាប់ម្លប់នៃការរស់នៅប្រកបដោយចីរភាពរបស់កូនចៅជំនាន់ក្រោយ។

នៅក្នុងឆ្នាំ២០២៦ ក្រសួងបរិស្ថានបានបណ្តុះកូនឈើបានជាង ៥,៣ លានដើម នៅតាមថ្នាលបណ្តុះកូនឈើរបស់មន្ទីរបរិស្ថានរាជធានី-ខេត្តទូទាំងប្រទេស និងថ្នាលបណ្តុះកូនឈើថ្នាក់តំបន់ទាំង៥ រួមមាននៅខេត្តត្បូងឃ្មុំ សៀមរាប កំពង់ស្ពឺ មណ្ឌលគិរី និងកោះកុង។ បច្ចុប្បន្ននេះ កូនឈើចម្រុះជាង ១លានដើម បានដឹកមកដល់ហើយ ដើម្បីត្រៀមរៀបចំចូលរួមក្នុងពិព័រណ៍ និងចែកជូនប្រជាពលរដ្ឋដោយឥតគិតថ្លៃ។

តាមផែនការដែលបានគ្រោងទុក ក្រសួងបរិស្ថានគ្រោងនឹងចែកកូនឈើសរុបចំនួន ៥លានដើមនៅក្នុងឆ្នាំ២០២៦ ដែលក្នុងនោះរួមមានកូនត្នោតចំនួន ១,៥លានដើម ព្រមទាំងឈើប្រណីត ឈើហូបផ្លែ និងឈើលម្អជាច្រើនប្រភេទទៀត។ យុទ្ធនាការនេះបង្ហាញពីការប្តេជ្ញាចិត្តខ្ពស់របស់រាជរដ្ឋាភិបាលកម្ពុជា ក្នុងការលើកកម្ពស់បរិស្ថាន និងធនធានធម្មជាតិសម្រាប់អនាគតដ៏យូរអង្វែង៕