(កណ្តាល)៖ បេក្ខជន និងសកម្មជនគណបក្សភ្លើងទៀនចំនួន ៥៨នាក់ នៅខេត្តកណ្ដាល បានប្រកាសផ្ដាច់ខ្លួនជាផ្លូវការពីគណបក្សប្រឆាំង និងគោរពស្នើសុំចូលរួមជីវភាពនយោបាយជាមួយគណបក្សប្រជាជនកម្ពុជា។

ការប្រកាសនេះធ្វើឡើងនៅថ្ងៃទី៨ ខែកក្កដា ឆ្នាំ២០២៦ ដោយមានការចូលរួមពីលោកបណ្ឌិត ឃួន សុវណ្ណ ទីប្រឹក្សាសម្ដេចតេជោ ហ៊ុន សែន ប្រធានគណបក្សប្រជាជនកម្ពុជា និងជាអនុប្រធានក្រុមការងារចលនាកសាងសមាជិកគណបក្សនៅមូលដ្ឋានខេត្ត។

លោកបណ្ឌិត ឃួន សុវណ្ណ និងលោក លី សុផាន់ ប្រធានក្រុមការងារចលនាកសាងសមាជិកគណបក្សប្រជាជនកម្ពុជាចុះស្រុកកៀនស្វាយ បានបញ្ជាក់ថា ការសម្រេចចិត្តរបស់បេក្ខជន និងសកម្មជនទាំងនេះ គឺដោយសារការយកចិត្តទុកដាក់ និងភាពកក់ក្ដៅពីលោក គួច ចំរើន ប្រធានគណៈកម្មាធិការគណបក្សខេត្ត។

ក្រុមការងារចលនាកសាងសមាជិកគណបក្សប្រជាជនកម្ពុជាចុះមូលដ្ឋានខេត្តកណ្ដាល ដឹកនាំដោយលោក ស៊ុយ ឆៃលាង បានចុះជួបផ្ទាល់ជាមួយបងប្អូនទាំង ៥៨នាក់ ដែលមកពីឃុំបឹងគ្រំ ស្រុកល្វាឯម ចំនួន ៦នាក់ និងឃុំបន្ទាយដែក ស្រុកកៀនស្វាយ ចំនួន ២២នាក់។

បេក្ខជន និងសកម្មជនទាំងនោះបានថ្លែងថា ពួកគេបានឈប់មានទំនាក់ទំនងជាមួយបក្សប្រឆាំងបន្តទៀតហើយ បន្ទាប់ពីបានមើលឃើញថាសកម្មភាពនយោបាយរបស់បក្សប្រឆាំងពុំបានជួយអ្វីដល់ជាតិឡើយ។ ផ្ទុយទៅវិញ ពួកគេបានមើលឃើញយ៉ាងច្បាស់ថា គណបក្សប្រជាជនកម្ពុជា គឺជាបក្សនយោបាយតែមួយគត់ដែលមានគុណបំណាច់ដ៏ធំធេងសម្រាប់ជាតិ និងប្រជាជនកម្ពុជា។ ជាពិសេស សម្ដេចតេជោ ហ៊ុន សែន ជាមេដឹកនាំដ៏ខ្លាំងពូកែ ដែលបានប្រឹងប្រែងរំដោះអាយុជីវិតជាតិ និងប្រជាជនពីរបបប្រល័យពូជសាសន៍នាថ្ងៃទី៧ ខែមករា ឆ្នាំ១៩៧៩ និងបានដឹកនាំប្រទេសឆ្ពោះទៅរកការបង្រួបបង្រួមជាតិ និងការអភិវឌ្ឍរីកចម្រើនដូចពេលបច្ចុប្បន្ន។

ក្រុមសកម្មជនទាំងអស់បានសង្កត់ធ្ងន់ថា គណបក្សប្រជាជនកម្ពុជាមានគោលនយោបាយច្បាស់លាស់ក្នុងការដឹកនាំ និងកសាងជាតិឆ្ពោះទៅរកភាពរុងរឿង ជាបង្អែក និងជាទីទុកចិត្តរបស់ប្រជាពលរដ្ឋ ក្នុងការធានារក្សាបានសុខសន្តិភាព និងស្ថិរភាពសង្គម ដែលជាលក្ខខណ្ឌចាំបាច់សម្រាប់ធានាការរស់នៅប្រកបដោយភាពរីករាយ។

ជាមួយគ្នានេះ ពួកគេក៏បានអំពាវនាវដល់អ្នកបម្រើបក្សប្រឆាំងទាំងអស់ឱ្យភ្ញាក់រលឹក និងចូលរួមសកម្មភាពនយោបាយជាមួយគណបក្សប្រជាជនកម្ពុជា ដើម្បីរួមចំណែកកសាងជាតិមាតុភូមិឱ្យកាន់តែរុងរឿង៕