(ភ្នំពេញ)៖ លោក ឃួង ស្រេង សមាជិកគណៈកម្មាធិការកណ្តាលគណបក្សប្រជាជនកម្ពុជា និងជាប្រធានគណៈកម្មាធិការគណបក្សប្រជាជនកម្ពុជារាជធានីភ្នំពេញ ​បានណែនាំយ៉ាងម៉ឺងម៉ាត់ដល់អាជ្ញាធរខណ្ឌ និងចៅសង្កាត់ ឱ្យរៀបចំសណ្តាប់ធ្នាប់នៅក្នុងមូលដ្ឋានរបស់ខ្លួនឱ្យបានល្អប្រសើរ ជាពិសេសចំពោះអ្នកលក់ដូរអនាធិបតេយ្យលើដងផ្លូវ និងចិញ្ចើមផ្លូវ ដែលធ្វើឱ្យរាជធានីភ្នំពេញបាត់បង់សោភ័ណភាព។

លោកណែនាំបែបនេះ ក្នុងឱកាសដែលលោក បានជួបសំណេះសំណាលជាមួយសមាជិក សមាជិកាគណៈកម្មាធិការគណបក្សនៃសង្កាត់បឹងកេងកង៣ សង្កាត់អូឡាំពិក និងសង្កាត់ទំនប់ទឹក ខណ្ឌបឹងកេងកង នៅសាលាប៊ែលធី ខណ្ឌបឹងកេងកង នាល្ងាចថ្ងៃទី០៨ ខែកក្កដា ឆ្នាំ២០២៦នេះ ​។

ក្នុងឱកាសនោះ លោកបានសង្កត់ធ្ងន់ថា ការរៀបចំសណ្តាប់ធ្នាប់សាធារណៈ គឺជាឧត្ដមភាពក្នុងការឆក់យកបេះដូងរបស់ប្រជាពលរដ្ឋ ហើយការងារនេះត្រូវធ្វើដោយភាពរលូន តាមរយៈការផ្សព្វផ្សាយឱ្យបានទូលំទូលាយ មុននឹងចាប់ផ្តើមអនុវត្ត។

លោកក៏បានជំរុញឱ្យអាជ្ញាធរពាក់ព័ន្ធ ពិនិត្យមើលជាប្រចាំចំពោះប្រព័ន្ធលូ ផ្លូវ និងសណ្តាប់ធ្នាប់សាធារណៈ ដើម្បីធានាថារាជធានីភ្នំពេញនៅតែជាទីក្រុងស៊ីវិល័យ និងជាគោលដៅទេសចរណ៍ដ៏ល្អបំផុត។

ជាមួយគ្នានេះ លោក ឃួង ស្រេង បានណែនាំឱ្យសមាជិក សមាជិកាបក្សសង្កាត់ និងខណ្ឌ ត្រូវបម្រើសេវាសាធារណៈជូនប្រជាពលរដ្ឋឱ្យបានល្អ និងលឿន ដោយមិនត្រូវយកសេវាក្រៅច្បាប់ឡើយ គឺត្រូវអនុវត្តតាមប្រសាសន៍របស់សម្តេចមហាបវរធិបតី ហ៊ុន ម៉ាណែត ដែលថា«ធ្វើឱ្យលឿន ធ្វើឱ្យលះ បើស្ទះស្នើសុំគោលការណ៍»។

លោក ឃួង ស្រេង បានបន្តទៀតថា សមាជិក សមាជិកាបក្សគឺជាឃោសនិកដ៏ឧត្តុង្គឧត្តមរបស់គណបក្សប្រជាជនកម្ពុជា ដូច្នេះត្រូវយកគោលនយោបាយរបស់បក្ស និងអំពើល្អៗរបស់មេដឹកនាំបក្សទៅផ្សព្វផ្សាយឱ្យប្រជាពលរដ្ឋបានយល់ជ្រួតជ្រាបកាន់តែច្បាស់។

លោកបានបង្ហាញជំនឿទុកចិត្តយ៉ាងមុតមាំលើការដឹកនាំរបស់សម្តេចតេជោ ហ៊ុន សែន និងសម្តេចធិបតី ហ៊ុន ម៉ាណែត ក្នុងការការពារបូរណភាពទឹកដី។

ក្នុងឱកាសនោះ ចៅសង្កាត់ និងមេភូមិ ក៏បានលើកឡើងពីសមិទ្ធផលរបស់បក្ស និងផែនការសកម្មភាពដែលកំពុងអនុវត្ត ដូចជាការកសាងសមាជិកបក្ស ការរក្សាសន្តិសុខសណ្តាប់ធ្នាប់ និងការបន្តបង្ក្រាបបទល្មើសឆបោកតាមប្រព័ន្ធបច្ចេកវិទ្យាជាដើម៕