(ភ្នំពេញ)៖ អាជ្ញាធររាជធានីភ្នំពេញ ក្រោមកិច្ចសហការជាមួយអាជ្ញាធរខណ្ឌ និងមន្ទីរសុខាភិបាលរាជធានីភ្នំពេញ បានបន្តចុះបាញ់ថ្នាំកំចាត់មូសខ្លា នៅតាមមូលដ្ឋានខណ្ឌ សង្កាត់ និងភូមិនានា ដើម្បីទប់ស្កាត់ និងបង្ការជំងឺគ្រុនឈាមក្នុងរដូវវស្សា។ សកម្មភាពនេះធ្វើឡើងតាមការចង្អុលបង្ហាញ និងការគិតគូរពីបញ្ហាសុខភាពសាធារណៈរបស់ប្រជាពលរដ្ឋ ដោយលោក ឃួង ស្រេង អភិបាលរាជធានីភ្នំពេញ។

រដ្ឋបាលរាជធានីភ្នំពេញ បានអនុវត្តសកម្មភាពបាញ់ថ្នាំកំចាត់មូសនេះជាប្រចាំ សំដៅលុបបំបាត់ និងកំចាត់មូស ជាពិសេសក្នុងរដូវវស្សា ដើម្បីលើកកម្ពស់សុខុមាលភាពរបស់ប្រជាពលរដ្ឋនៅក្នុងមូលដ្ឋាន និងទប់ស្កាត់ការរីករាលដាលនៃជំងឺគ្រុនឈាម។ ការងារនេះស្របពេលជាមួយសេចក្តីណែនាំក្រើនរំលឹករបស់ក្រសួងសុខាភិបាល ស្តីពីការបង្ការជំងឺគ្រុនឈាមក្នុងរដូវវស្សា និងការបញ្ជូនអ្នកជំងឺមកព្យាបាលនៅមន្ទីរពេទ្យឱ្យទាន់ពេលវេលា ចុះថ្ងៃទី៨ ខែកក្កដា ឆ្នាំ២០២៦។

ក្រសួងសុខាភិបាលបានក្រើនរំលឹកថា ក្នុងអំឡុងពេលរដូវវស្សា ជាទូទៅធ្វើឱ្យមានការកើនឡើងនូវវត្ថុដក់ទឹក ដែលជាកន្លែងបង្កកំណើតមូសខ្លា។ ជាមួយគ្នានេះ ប្រទេសកម្ពុជាកំពុងទទួលឥទ្ធិពលពីបាតុភូតកើនកម្ដៅ (El Niño) ដែលអាចធ្វើឱ្យមានការកើនឡើងចំនួនមូសខ្លា និងជំងឺគ្រុនឈាមនៅតំបន់អាស៊ីប៉ាស៊ីហ្វិក រួមទាំងព្រះរាជាណាចក្រកម្ពុជាផងដែរ។ ស្ថានភាពនេះទាមទារឱ្យមានការចូលរួមយ៉ាងសកម្មពីបុគ្គលម្នាក់ៗ គ្រួសារ និងសហគមន៍។

មូសខ្លាចូលចិត្តរស់នៅកន្លែងទឹកដក់ ដូចជា សំបកកង់ឡាន/កង់ម៉ូតូ ត្រឡោកដូង កែវ ចានជ័រ/ស្ងោរ ក្រឡ ពាង អាង ធុងដាក់ទឹក ទឹកថូផ្កា ចានទ្រជើងតុ ទូ និងពែង ដែលបង្កើតជាប្រភពដក់ទឹក និងជំរកមូសខ្លា។ ក្រសួងសុខាភិបាលបានអំពាវនាវដល់បងប្អូនប្រជាពលរដ្ឋ និងអាជ្ញាធរគ្រប់ជាន់ថ្នាក់ ចូលរួមចលនាកាត់បន្ថយ តាមដាន និងទប់ស្កាត់ការកកើតមូស ដោយប្រកាន់ខ្ជាប់នូវពាក្យស្លោក «ខ្ញុំ និងគ្រួសារខ្ញុំ ជាគ្រួសារគំរូ ព្រោះផ្ទះខ្ញុំ និងលំនៅដ្ឋានរបស់ខ្ញុំ គ្មានដង្កូវទឹក»។ លោក ងី មានហេង ប្រធានមន្ទីរសុខាភិបាលរាជធានីភ្នំពេញ ក៏បានអំពាវនាវឱ្យប្រជាពលរដ្ឋរស់នៅរាជធានីភ្នំពេញ ចូលរួមលុបបំបាត់ជម្រកមូសខ្លា ដើម្បីរួមចំណែកទប់ស្កាត់ការចម្លងជំងឺគ្រុនឈាម៕