(ភ្នំពេញ)៖ គណៈបញ្ជាការឯកភាពរដ្ឋបាលរាជធានីភ្នំពេញ បានរកឃើញជនជាតិវៀតណាមចំនួន ០៥នាក់ ដែលសង្ស័យជាប់ពាក់ព័ន្ធនឹងបទល្មើសឆបោកតាមប្រព័ន្ធបច្ចេកវិទ្យា (Online Scams) ក្នុងប្រតិបត្តិការចុះត្រួតពិនិត្យទីតាំងអគារ ខុនដូ អាផាតមិន បុរី ផ្ទះសំណាក់ និងសណ្ឋាគារ ក្នុងភូមិសាស្ត្ររាជធានីភ្នំពេញ កាលពីថ្ងៃទី៨ ខែកក្កដា ឆ្នាំ២០២៦។

លោកស្រី ដោ សម្ផស្ស នាយករងរដ្ឋបាល និងជាអ្នកនាំពាក្យរដ្ឋបាលរាជធានីភ្នំពេញ បានបញ្ជាក់នៅព្រឹកថ្ងៃទី០៩ ខែកក្កដានេះថា គណៈបញ្ជាការឯកភាពរដ្ឋបាលរាជធានីភ្នំពេញ បានដឹកនាំគណៈបញ្ជាការឯកភាពរដ្ឋបាលខណ្ឌទាំង១៤ ចុះត្រួតពិនិត្យទីតាំងចំនួន ៨៨កន្លែង ក្នុងគោលដៅបោសសម្អាតទីតាំងសង្ស័យប្រព្រឹត្តបទល្មើសឆបោកតាមប្រព័ន្ធបច្ចេកវិទ្យា។ ក្នុងចំណោមទីតាំងដែលបានត្រួតពិនិត្យ ក្រុមការងារបានរកឃើញជនបរទេសស្នាក់នៅចំនួន ២៥២នាក់ (ស្រី ៨៤នាក់) ដែលមានលិខិតឆ្លងដែនត្រឹមត្រូវ។

ក្នុងកិច្ចប្រតិបត្តិការនោះ ក្រុមការងារបានចុះពិនិត្យនៅខុនដូ R&F អគារ A-5 ជាន់ទី២៧ បន្ទប់លេខ ២៧០៨ ស្ថិតនៅផ្លូវ៦០ម៉ែត្រ ភូមិព្រែកតាគង់ទី១ សង្កាត់ចាក់អង្រែលើ ខណ្ឌមានជ័យ។ នៅទីនោះគេបានរកឃើញជនបរទេសចំនួន ០៥នាក់ ជាជនជាតិវៀតណាម រួមជាមួយសម្ភារមួយចំនួន រួមមាន៖ កុំព្យូទ័រយួរដៃចំនួន ០៥គ្រឿង និងទូរស័ព្ទដៃចំនួន ១៨គ្រឿង ក្នុងនោះទូរស័ព្ទដៃផ្ទាល់ខ្លួនចំនួន ០៦គ្រឿង។

តាមការសន្និដ្ឋានបឋម ករណីនេះត្រូវបានសង្ស័យថាជាប់ពាក់ព័ន្ធនឹងបទល្មើសឆបោកតាមប្រព័ន្ធបច្ចេកវិទ្យា។ ក្រោយបញ្ចប់ប្រតិបត្តិការ ជនសង្ស័យ និងវត្ថុតាងទាំងអស់ត្រូវបានបញ្ជូនទៅស្នងការដ្ឋាននគរបាលរាជធានីភ្នំពេញ ដើម្បីបន្តនីតិវិធីតាមផ្លូវច្បាប់។ បន្ទប់ដែលរកឃើញជនសង្ស័យក៏ត្រូវបានបិទឃ្លុំបណ្ដោះអាសន្នផងដែរ។

ប្រតិបត្តិការនេះបង្ហាញពីការប្តេជ្ញាចិត្តរបស់អាជ្ញាធរក្នុងការប្រយុទ្ធប្រឆាំងបទល្មើសតាមប្រព័ន្ធបច្ចេកវិទ្យា ដើម្បីរក្សាសន្តិសុខ និងសណ្តាប់ធ្នាប់សាធារណៈជូនប្រជាពលរដ្ឋ៕