សហជីពនៅរោងចក្រខូហ្ស៊ី នីត ទាត់ចោលការលើកឡើងថា ការបិទផ្លូវជាតិលេខ ៣របស់បងប្អូនកម្មករដោយសារការបណ្តេញសហជីព «ត្បិតជារឿងមិនពិតព្រោះមិនមានការជជែកលើករណីនេះឡើយ»
09-07-2026 11:59
(ភ្នំពេញ)៖ លោក ឈុំ វាសនា ប្រធានសហភាពសហជីពយុវជនកម្មករកម្ពុជា (CYTUC）នៅថ្ងៃទី៨ ខែកក្កដា ឆ្នាំ២០២៦នេះ បានទាត់ចោលការផ្សព្វផ្សាយ និងការលើកឡើងថា ការបិទផ្លូវជាតិលេខ៣របស់បងប្អូនកម្មករ ដោយសារការបណ្តេញសហជីព។
សម្រាប់ប្រធានសហជីពដែលមានមូលដ្ឋាននៅក្នុងរោងចក្រខាងលើនេះ ការផ្សាយមានចេតនាបំភ្លៃការពិត និងបានបង្កើតឱ្យមានការយល់ច្រឡំព្រោះមិនមានរបៀបវារៈស្តីពីការបណ្តេញសហជីពក្នុងការជជែកឡើយ ដោយសារមិនមានសហជីពណាម្នាក់ត្រូវបានបណ្តេញចេញ។
លោក ឈុំ វាសនា បានបញ្ជាក់យ៉ាងដូច្នេះថា៖ ក្នុងនាមជាសហជីពមូលដ្ឋាននៅក្រុមហ៊ុន ខូហ្ស៊ី នីត ដែលមានភាពជាតំណាងបំផុតខ្ញុំសូមបញ្ជាក់ថា ការលើកឡើងថាការបិទផ្លូវជាតិលេខ ៣ ដោយសារតែការរើសអើសសិទ្ធសេរីភាពសហជីពជារឿងមិនពិត ព្រោះការចរចានៅព្រឹកថ្ងៃពុធ មិនមានប្រធានបទណាមួយជជែករឿងរើសអើងសហជីព ហើយក៏មិនមានសហជីពណាម្នាក់ត្រូវបានក្រុមហ៊ុនបញ្ឈប់ដែរ។
ជាមួយគ្នានេះ លោកសូមអំពាវនាវដល់អង្គការសង្គមស៊ីវិល និងអ្នកសារព័ត៌មានទាំងអស់ មេត្តាស្វែងរកព័ត៌មានដែលមានប្រភពច្បាស់លាស់ ធ្វើការពិភាក្សា ជាមួយសហជីពមូលដ្ឋាននៅក្នុងក្រុមហ៊ុនដើម្បីទទួលបានព័ត៌មានដែលមានតុល្យភាព និងជៀសវាងការផ្សព្វផ្សាយព័ត៌មាន ដែលមិនមានប្រភពច្បាស់លាស់ ដែលអាចបង្កឱ្យមានការយល់ច្រឡំ។ ការគូសបញ្ជាក់នេះគឺធ្វើឡើងបន្ទាប់ពីការសង្គមស៊ីវិល និងសារព័ត៌មានមួយចំនួន បានផ្សព្វផ្សាយថា ការឈានដល់ការបិទផ្លូវជាតិលេខ៣ពីសំណាក់បងប្អូនកម្មករនិយោជិតនៅរោងចក្រ ខូហ្ស៊ី នីត គឺដោយសារតែការបណ្តេញកម្មករដែលជាសមាជិកសហជីព។
សូមបញ្ជាក់ថា តាមរយៈការអន្តរាគមន៍សម្របសម្រួលភ្លាមៗរបស់ក្រសួងការងារ និងបណ្តុះបណ្តាលវិជ្ជាជីវៈ ការទាមទាររបស់បងប្អូនកម្មករនិយោជិតនៅរោងចក្រ ខូហ្ស៊ី នីត ត្រូវបានដោះស្រាយភា្លមៗនៅថ្ងៃពុធ ទី៨ ខែកក្កដា ឆ្នាំ២០២៦ដដែល លើចំណុចទាមទារចំនួន១៨ ខណៈដែលបងប្អូនកម្មករនិយោជិត នឹងចូលធ្វើការវិញ នៅថ្ងៃស្អែកទី៩ ខែកក្កដា ឆ្នាំ២០២៦៕
