(ប៉េកាំង)៖ ប្រព័ន្ធផ្សព្វផ្សាយក្នុងប្រទេសចិន បានរាយការណ៍ថា នាថ្ងៃព្រហស្បតិ៍ ទី៩ ខែកក្កដា ឆ្នាំ២០២៦ តួលេខមនុស្សស្លាប់ ដោយសារគ្រោះទឹកជំនន់ធ្ងន់ធ្ងរ នៅខេត្ត Guangxi ភាគខាងត្បូងប្រទេសចិន បានបន្តកើនដល់៣៩នាក់ ហើយ៩នាក់ផ្សេងទៀត នៅបន្តបាត់ខ្លួន។ នេះបើតាមការចេញផ្សាយដោយ ទីភ្នាក់ងារព័ត៌មាន AFP។

ក្នុងសប្តាហ៍នេះ លក្ខខណ្ឌអាកាសធាតុអាក្រក់បង្កឡើងដោយព្យុះត្រូពិក Maysak បានវាយលុកតំបន់ភាគខាងត្បូង និងភាគកណ្តាលប្រទេសចិន ដោយបាននាំមកជាមួយ​នូវភ្លៀងធ្លាក់ខ្លាំងនិងទឹកជំនន់យ៉ាងលិចលង់ ក្នុងខេត្ត Guangxi ស្របពេលដែលព្យុះទីហ្វុងដ៏មានឥទ្ធិពលមួយទៀត ក៏កំពុងតែសំដៅមករកភាគខាងកើតប្រទេសចិនផងដែរ។

យោងតាម​ទីភ្នាក់ងារព័ត៌មានចិន Xinhua មនុស្ស២៦នាក់ ក្នុងចំណោមអ្នកស្លាប់ទាំងប៉ុន្មានខាងលើ គឺពាក់ព័ន្ធជាមួយការលេចធ្លាយ​ទំនប់ នៅឯអាងស្តុកទឹក Liulan ហើយមនុស្ស ៧នាក់បាត់ខ្លួននៅទីនោះ។ ដោយឡែក ព្យុះទីហ្វុងឈ្មោះ Bavi​ ត្រូវបានព្យាករថា នឹងធ្វើដំណើរកាត់ក្បែរភាគខាងជើងកោះតៃវ៉ាន់ ហើយបន្ទាប់មក បោកបក់​មកដល់ខេត្ត Zhejiang ឬ Fujian របស់ចិន នាថ្ងៃសៅរ៍ចុងសប្តាហ៍នេះ៕

គួរបញ្ជាក់ថា ក្នុងឆ្នាំ២០២៦នេះ មានការព្រួយបារម្ភរឹតតែខ្លាំង ខណៈដែលបាតុភូត El Nino អាចនឹងជំរុញអាកាសធាតុកាន់តែក្ដៅ ហើយធ្វើឱ្យព្យុះទីហ្វុងកើតឡើងកាន់តែញឹកញាប់ ថែមទៀត។ បើតាមគេហទំព័រ AccuWeather ប្រសិនបើ ព្យុះ Bavi អាចរក្សាបានឥទ្ធិពលរបស់ខ្លួនដូចការព្យាករមែន នោះវានឹងក្លាយជាព្យុះទីហ្វុងដ៏មានឥទ្ធិពលបំផុតមួយ ក្នុងតំបន់អាស៊ីប៉ាស៊ីហ្វិក ចាប់តាំងពីព្យុះទីហ្វុង Kong-rey ក្នុងឆ្នាំ២០២៤៕