(បរទេស)៖ លោក Chris Sutton អ្នកជំនាញសារព័ត៌មានកីឡារបស់ BBC និងបញ្ញាសិប្បនិមិត្ត AI បានធ្វើការព្យាករណ៍ដូចគ្នាថា មាន់គកបារាំង នឹងយកម៉ារ៉ុក ២-១ ក្នុងវគ្គ ៨ក្រុមនៃ FIFA World Cup 2026 នាម៉ោង ៣ទៀបភ្លឺ ឈានចូលព្រឹកថ្ងៃសុក្រ ទី១០ ខែកក្កដា (ម៉ោងនៅកម្ពុជា)។

លោក Sutton បានចាប់យកក្រុមបារាំង នឹងឈ្នះពានតាំងពីមុន World Cup 2026 ចាប់ផ្តើមទៅទៀត ហើយក៏នឹងមិន ផ្លាស់ចិត្តនោះដែរ។

- ម៉ារ៉ុក

លោកបានធ្វើការពន្យល់ថា ក្រុមមកពីទ្វីបអាហ្រ្វិក ម៉ារ៉ុកក៏មានសមត្ថភាពអាចយកឈ្នះបារាំងបានដែរ លុះត្រាតែពួកគេលេងឱ្យល្អបំផុត ដែលពុំធ្លាប់ធ្វើនាពេលកន្លងមក ជាពិសេសនៅ World Cup លើកនេះ ក្នុងរយៈពេល ៩០នាទី។

ពួកគេចាប់ផ្តើមមិនបានល្អឡើយសម្រាប់តង់ទី១ ទល់នឹងសហម្ចាស់ផ្ទះកាណាដា នៃវគ្គ ១៦ក្រុម មុនពេលរកបាន ៣គ្រាប់ជ័យជម្នះក្នុងវគ្គទី២។ ប្រសិនបើពួកគេលេងបែបនេះទល់នឹងបារាំង នោះប្រាកដណាស់នឹងមានបញ្ហាមិនខាន។

ម៉ារ៉ុក ជាក្រុមដែលពោរពេញដោយថាមពល និងជំនាញផងដែរ ក៏ប៉ុន្តែខ្សែប្រយុទ្ធស្នូលរបស់ពួកគេ Ismael Saibari មានបញ្ហារបួស និងស្ថិតក្នុងភាពស្រពិចស្រពិលនៃជំនួបទល់នឹងក្រុមនៅអឺរ៉ុបនេះដែរ។

- បារាំង

ចំណែកឯបារាំងវិញ ត្រូវតែបន្តភាពអត់ធ្មត់ដដែលដូចកាលទម្លាក់ប៉ារ៉ាហ្គាយចុងក្រោយនៃវគ្គ ១៦ក្រុម បើទោះបីជាដឹងពីគុណភាពរបស់គូប្រជែងរាត្រីនេះក៏ដោយ។

ក្នុងជំនួបទល់នឹងប៉ារ៉ាហ្គាយ មកពីតំបន់អាមេរិកឡាទីន ខ្សែប្រយុទ្ធវ័យក្មេង Desire Doue បានចូលលេងក្នុងនាមកីឡាករបម្រុង ដើម្បីញាំងឱ្យប្រព័ន្ធលេងមានការផ្លាស់ប្តូរ ក្នុងការបង្កើនភាពខ្លាំង និងដាក់សម្ពាធលើគូប្រកួតទៀតផង។ កតា្តនេះញាំងឱ្យបារាំងមានប្រៀប គ្រាដែល Saibari របួសថែមទៀត៕